ಸ್ಟೀಫನ್ ಹಾಕಿಂಗ್ ಜತೆ ನಡಿಗೆ ಮಾತು

ನಮ್ಮೂರ ನಾಲ್ಕು ಚದರಡಿ
ಭೂಮಿಯ ಆಮೆ ನಾನು.
ಕೇಳಿಸಿಕೋ ಹಿರೀಕರ ಹಾಗೆ ಕಿವಿ
ಸಡಿಲ: ಏನೊಂದೂ ಗೊತ್ತಿಲ್ಲದೆ
ತರ್ಕದ ಮಾತಾಡುತ್ತಿರುವುದಾಗಿ
ಹೆದರಿಸಬೇಡಪ್ಪೋ ಹುಡುಗಾಟಿಕಿ.

ಯಾವುದೋ ಒಂದು ದಿನ ಹುಟ್ಟಿದ
ನನಗೂ ಸಾವು ಬರುತ್ತದೆ- ನಿನಗೆ
ಬರುವ ಹಾಗೆ: ಏನಾಗುತ್ತೇವೆ ಸತ್ತ
ಮೇಲೆ? ಹುಟ್ಟಿಸಿದವರು ಯಾರು?

ನನಗೂ ನಿನಗೂ ಹುಟ್ಟು ಸಾವುಗಳ
ನಿರ್ಬಂಧ ಇರುವುದಾದಲ್ಲಿ ಆ ಭೂಮಿ
ಈ ಜಗತ್ತು ವಿಶ್ವದಾಚೆಯ ಎಲ್ಲಕೂ
ಇರಬೇಕಲ್ಲ ಹುಟ್ಟು ಸಾವಿನ ಅನಂತ.

ನಮ್ಮ ಮನೆಯ ನಾಯಿ ಇಪ್ಪತ್ತನೆ
ವರ್ಷಕ್ಕೆ ಸಾಯುವುದಾದಲ್ಲಿ, ಪಕ್ಕದ
ಮರ ಸಾವಿರಾರು ವರ್ಷ ಕಾಲ
ಬದುಕುವುದು ಯಾವ ದೊಡ್ಡ ಲೆಕ್ಕ.

ನದಿ ಈ ಸಮುದ್ರ ಆ ಗ್ರಹ ಈ
ತಾರೆ ನಕ್ಷತ್ರಗಳಾಚೆಗಿನ ಬ್ರಹ್ಮಾಂಡ,
ಯಾವುದೋ ಒಂದಿನ ಭೂಮಿ
ಹುಟ್ಟಿರಬಹುದಲವೆ- ನನ್ನ ನಿನ್ನ ಹಾಗೆ?

ಸೂರ್ಯನಿಗು- ನನಗೂ ನಿನಗೂ
ಇರುವ ಹಾಗೆ- ಅವನದೇ ಆದ
ಕಾಲಮಾನವೊಂದಿರಬಹುದಲ್ಲವೆ:
ಮಹಾಜ್ಞಾನಿಯ ವಿನಯ ಬರಲಿ.

ನಮ್ಮೂರಿನ ನೆಲದ ದೂಳಿನಲ್ಲೂ
ನೀನು ಕಾಣುವ ವಿಶ್ವದಾಚೆಗಿನ
ಕ್ಷಣ ಸತ್ಯದ ಕಣ ಅಡಗಿರಬಹುದು:
ಸೃಷ್ಟಿಯಲಿ ನಾನು ನನ್ನಲ್ಲಿ ಸೃಷ್ಟಿ.