ಹೊಸಪೇಟೆ: ಹಂಪಿ ಉತ್ಸವದ ಎರಡು ಪ್ರಮುಖ ವೇದಿಕೆಯ ಕಾರ್ಯಕ್ರಮಗಳ ವೀಕ್ಷಣೆಗೆ ಜಿಲ್ಲಾಡಳಿತ ಪ್ಲಾಟಿನಂ ಮತ್ತು ಗೋಲ್ಡ್ ಕಾರ್ಡ್ ವಿತರಿಸುವ ಮೂಲಕ ರೂ. 18 ಲಕ್ಷ ಸಂಗ್ರಹಿಸುವ ಗುರಿ ಹೊಂದಿದೆ.
ಪ್ರಮುಖ ವೇದಿಕೆಯಲ್ಲಿ ನಡೆಯುವ ರಾಷ್ಟ್ರೀಯ ,ಅಂತರರಾಷ್ಟ್ರೀಯ ಮಟ್ಟದ ಕಲಾವಿದರ ಕಾರ್ಯಕ್ರಮಗಳ ವೀಕ್ಷಣೆಗೆ ಪ್ಲಾಟಿನಂ ಕಾರ್ಡ್ಗೆ ರೂ. 3000 ಮತ್ತು ಗೋಲ್ಡ್ ಕಾರ್ಡ್ ದರ ರೂ. 2,000 ನಿಗದಿಪಡಿಸಿದ್ದು ತಲಾ 3000 ಕಾರ್ಡ್ಗಳನ್ನು ವಿತರಿಸಲಾಗುತ್ತದೆ. ಇನ್ನೊಂದು ವೇದಿಕೆಯಲ್ಲಿ ನಡೆಯುವ ಕಾರ್ಯಕ್ರಮಗಳ ವೀಕ್ಷಣೆಗೆ ಪ್ಲಾಟಿನಂ ಕಾರ್ಡ್ಗೆ ರೂ. 2000 ಮತ್ತು ಗೋಲ್ಡ್ ಕಾರ್ಡ್ ದರ ರೂ. 1,000 ನಿಗದಿಪಡಿಸಿದ್ದು ತಲಾ 1000 ಕಾರ್ಡ್ಗಳನ್ನು ವಿತರಿಸಲಾಗುತ್ತದೆ ಎಂದು ಜಿಲ್ಲಾಧಿಕಾರಿ ಎ.ಎ.ಬಿಸ್ವಾಸ್ ‘ಪ್ರಜಾವಾಣಿ’ಗೆ ತಿಳಿಸಿದರು.
ಪ್ರಮುಖ ವೇದಿಕೆಗಳ ಕಾರ್ಯಕ್ರಮ ವೀಕ್ಷಣೆಗೆ ಹೆಚ್ಚು ಶುಲ್ಕ ವಿಧಿಸುವ ಮೂಲಕ ಹಂಪಿ ಉತ್ಸವ ಉಳ್ಳವರಿಗೆ ಸೀಮಿತವಾಗಲಿದೆ ಎಂಬ ಆರೋಪ ಕೇಳಿಬಂದಿದೆ. ಆದರೆ ಇದನ್ನು ಒಪ್ಪದ ಜಿಲ್ಲಾಧಿಕಾರಿಯವರು, ‘ಪ್ಲಾಟಿನಂ ಹಾಗೂ ಗೋಲ್ಡ್ ಕಾರ್ಡ್ ಮೂಲಕ ಆಸನ ಕಾಯ್ದಿರಿಸುವುದರಿಂದ ಸಾಮಾನ್ಯ ಜನರಿಗೆ ತೊಂದರೆಯೂ ಆಗುವುದಿಲ್ಲ. ಅವರಿಗೂ ಸ್ಥಳಾವಕಾಶ ಮಾಡಿಕೊಡಲಾಗುವುದು’ ಎನ್ನುತ್ತಾರೆ.
ವಿಶೇಷ ಆಹ್ವಾನಿತರಿಗೆ ಸುಮಾರು 2,500 ಪಾಸ್ಗಳನ್ನು ವಿತರಿಸಲಾಗಿದೆ. ಪ್ಲಾಟಿನಂ ಮತ್ತು ಗೋಲ್ಡ್ ಕಾರ್ಡ್ ವಿತರಿಸುವ ಮೂಲಕ ಹೆಚ್ಚಿನ ಆಸನಗಳು ಈ ವರ್ಗಕ್ಕೆ ಮೀಸಲಾಗುವುದರಿಂದ ಉತ್ಸವಕ್ಕೆ ಪ್ರೇಕ್ಷಕರ ಕೊರತೆ ಕಾಡಬಹುದು ಎಂಬ ಆತಂಕವೂ ಇದೆ.
‘ಹಂಪಿ ಉತ್ಸವ ಜನರ ಉತ್ಸವವಾಗುವ ಉದ್ದೇಶದಿಂದ ಆರಂಭಿಸಲಾಗಿತ್ತು. ಆದರೆ, ಉತ್ಸವದ ಅಂಗವಾಗಿ ಪ್ರತಿಯೊಂದರಲ್ಲೂ ಶುಲ್ಕ ವಿಧಿಸುವ ಮೂಲಕ ಉತ್ಸವದ ಕೆಲ ಕಾರ್ಯಕ್ರಮಗಳು ಹಾಗೂ ಸ್ಪರ್ಧೆಗಳು ಸಾಮಾನ್ಯ ಜನರಿಗೆ ನಿಲುಕದಂತಾಗಿವೆ. ಹಣದ ಕೊರತೆ ಇದ್ದರೆ ಉತ್ಸವವನ್ನು ಈ ವರ್ಷವೂ ರದ್ದು ಮಾಡಲಿ. ಆದರೆ, ಅನುದಾನದ ಕೊರತೆ ನೆಪವೊಡ್ಡಿ ಈ ರೀತಿ ಜನರ ಜೇಬಿಗೆ ಕತ್ತರಿ ಹಾಕುವ ಕೆಲಸಕ್ಕೆ ಜಿಲ್ಲಾಡಳಿತ ಮುಂದಾಗಬಾರದು’ ಎಂದು ಕಮಲಾಪುರದ ವಿಜಯನಗರ ಸ್ಮಾರಕ, ಸಂಸ್ಕೃತಿ ಸಂರಕ್ಷಣಾ ಸೇನೆ ಜಿಲ್ಲಾ ಸಂಚಾಲಕ ವಿಶ್ವನಾಥ ಮಾಳಗಿ ಅವರು ಅಭಿಪ್ರಾಯಪಟ್ಟರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.