ನಾವುಗಳು ಈಗ ಹಂಪಿಯಲ್ಲಿ ಬೀದಿಗೆ ಬಿದ್ದವರು. ಹಂಪಿ ಮಂಟಪಗಳಲ್ಲಿ ನಾವು ಹಲವಾರು ವರ್ಷಗಳಿಂದ ಜೀವನ ನಡೆಸಿದ್ದೇವೆ. ಈಗ್ಗೆ 20 ವರ್ಷಗಳಿಂದಲೂ ಸರ್ಕಾರ ಮಂಟಪಗಳನ್ನು ಬಿಡಿ ಎಂದು ಹೇಳುತ್ತಲೇ ಬಂದಿತ್ತು. ನಾವುಗಳು ಬೇರೆ ಕಡೆ ಮನೆ ಕಟ್ಟಿಕೊಡಿ ಎಂದು ಸರ್ಕಾರವನ್ನು ಕೇಳುತ್ತ ಬಂದಿದ್ದೇವೆ. ಆದರೆ ಅದಾವುದೂ ಆಗಲಿಲ್ಲ.
ಈಚೆಗೆ ಜುಲೈ 28ರ ರಾತ್ರಿ ಒಂಬತ್ತು ಗಂಟೆಗೆ ಮನೆ ಖಾಲಿ ಮಾಡಿ ಎಂದು ಸರ್ಕಾರ ನೋಟೀಸು ಕೊಟ್ಟಿತ್ತು. ಜುಲೈ 29 ರಂದು ಬೆಳಗಿನಿಂದ ಬುಲ್ಡೋಜರ್ ಬಳಸಿ ನಮ್ಮ ಮನೆಗಳನ್ನು ಕೆಡವಲಾಯಿತು. ಇದರಿಂದಾಗಿ ನಾವು ಹಂಪಿಯ ಬೀದಿಗಳಲ್ಲಿ ದಿನಗಳನ್ನು ನೂಕುವಂತಾಗಿದೆ. ಈಗ ಮನೆ ಕೆಡವಿ ಎರಡು ತಿಂಗಳಾದರೂ ಸರ್ಕಾರವಾಗಲೀ, ಹೊಸಪೇಟೆಯ ಶಾಸಕರಾಗಲಿ ನಮ್ಮ ಬಳಿ ಸುಳಿದಿಲ್ಲ.
ಮಕ್ಕಳು, ಮಹಿಳೆಯರು, ವೃದ್ಧರನ್ನು ಒಳಗೊಂಡಂತೆ ಎಲ್ಲರೂ ನಿತ್ಯವೂ ನರಕ ಅನುಭವಿಸುವಂತಾಗಿದೆ. ಹಂಪಿಯ ಬಗ್ಗೆ ಕಾಳಜಿ ವ್ಯಕ್ತಪಡಿಸುವ ಎಂ. ಚಿದಾನಂದಮೂರ್ತಿಗಳು ನಮಗೆ ಮನೆ ಕೊಡಿಸುತ್ತಾರೆಂದು ನಾವು ಅವರಿಗಾಗಿ ಕಾಯುತ್ತಿದ್ದೇವೆ.
ಸರ್ಕಾರ ಕೆಡವಿದ 236 ಮನೆಗಳವರ ಬಗ್ಗೆ ಕೂಲಂಕಶವಾಗಿ ಪರಿಶೀಲಿಸಿ. ಹೊರಗೆಲ್ಲೂ ಮನೆ ಇಲ್ಲದವರಿಗೆ ಮೊದಲು ಮನೆಗಳನ್ನು ಒದಗಿಸಬೇಕೆಂದು ಮುಖ್ಯಮಂತ್ರಿಗಳಲ್ಲಿ ಮನವಿ ಮಾಡುತ್ತೇವೆ.
- ಬೀದಿಗೆ ಬಿದ್ದ ನಿವಾಸಿಗಳು ( 25 ಜನರ ಸಹಿ ಇದೆ) ಹಂಪಿ
