ಹರಿಣಗಳ ದಾಳಿಗೆ ಕುಸಿದ ಭಾರತ

ಡರ್ಬನ್: ಸರಣಿಯ ಮೊದಲ ಪಂದ್ಯದಲ್ಲಿ ವಿಜಯದೊಂದಿಗೆ ಗೆಲುವಿನ ಮುನ್ನುಡಿ ಬರೆಯುವ ಕನಸು ಕಂಡ ಭಾರತದ ಆಸೆ ನುಚ್ಚು ನೂರಾಯಿತು.
ಕಿಂಗ್ಸ್‌ಮೇಡ್ ಕ್ರೀಡಾಂಗಣದಲ್ಲಿ ಬುಧವಾರ ರಾತ್ರಿ ನಡೆದ ಐದು ಪಂದ್ಯಗಳ ಸರಣಿಯ ಮೊದಲ ಏಕದಿನ ಪಂದ್ಯದಲ್ಲಿ ಮಹೇಂದ್ರ ಸಿಂಗ್ ದೋನಿ ಬಳಗಕ್ಕೆ ‘ಟಾಸ್’ ಸೋಲಿನ ಆಘಾತ. ಎದುರಾಳಿಗಳನ್ನು ಬೇಗ ಕಟ್ಟಿಹಾಕಬೇಕು ಎನ್ನುವ ಉತ್ಸಾಹವಿದ್ದರೂ, ಅದಕ್ಕೆ ತಕ್ಕಂತೆ ಬೌಲಿಂಗ್ ಅಸ್ತ್ರಗಳು ಬತ್ತಳಿಕೆಯಿಂದ ಹೊರಬರಲಿಲ್ಲ.ಎದುರಾಳಿಗಳನ್ನು ಚಕಿತಗೊಳಿಸಲಿಲ್ಲ. ಬ್ಯಾಟಿಂಗ್ ವಿಭಾಗದಲ್ಲಿಯೂ ಕುಸಿತ ಕಂಡ ದೋನಿ ಬಳಗಕ್ಕೆ ಮೊದಲ ಪಂದ್ಯದಲ್ಲಿ ಸೋಲು ಉಂಟಾಯಿತು.

ಭಾರತಕ್ಕೆ 289 ರನ್‌ಗಳ ಸವಾಲು ನೀಡಿದ್ದ ದಕ್ಷಿಣ ಆಫ್ರಿಕಾದ ಮೊತ್ತಕ್ಕೆ ಉತ್ತರ ನೀಡುವಲ್ಲಿ ಎಡವಿದ ಭಾರತ 35.4 ಓವರ್‌ಗಳಲ್ಲಿ 154 ರನ್ ಗಳಿಸಿ ಆಲೌಟ್ ಆಯಿತು.ಇದರಿಂದ ಐದು ಪಂದ್ಯಗಳ ಸರಣಿಯಲ್ಲಿ ದಕ್ಷಿಣ ಆಫ್ರಿಕಾ 1-0 ಮುನ್ನಡೆ ಸಾಧಿಸಿತು. ಸವಾಲಿನ ಮೊತ್ತಕ್ಕೆ ಉತ್ತರ ನೀಡಲು ಬಂದ ಭಾರತದ ಆಟಗಾರರು ಒಬ್ಬರ ನಂತರ ಒಬ್ಬರಂತೆ ಪೆವಿಲಿಯನ್‌ನತ್ತ ಹೆಜ್ಜೆ ಹಾಕಿದರು. ತಂಡದ ಒಟ್ಟು ಮೊತ್ತ 100 ಆಗುವಷ್ಟರಲ್ಲಿ ಪ್ರಮುಖ ಐದು ಬ್ಯಾಟ್ಸ್‌ಮನ್‌ಗಳು ಔಟಾಗಿದ್ದರು. ತಂಡವನ್ನು ಗೆಲುವಿನ ದಡ ಸೇರಿಸಲು ವಿರಾಟ್ ಕೊಹ್ಲಿ (54; 122 ನಿ,, 70 ಎಸೆತ,, 2 ಬೌಂಡರಿ, 1 ಸಿಕ್ಸರ್) ನಡೆಸಿದ ಹೋರಾಟ ವ್ಯರ್ಥವಾಯಿತು.

ಇದಕ್ಕೂ ಮೊದಲ ಬ್ಯಾಟ್ ಮಾಡಿದ ದಕ್ಷಿಣ ಆಫ್ರಿಕಾದ ಅಬ್ರಹಾಮ್ ಡಿ ವೀಲಿಯರ್ಸ್ (76; 94 ನಿ., 69 ಎ., 7 ಬೌಂಡರಿ, 1 ಸಿಕ್ಸರ್) ಹಾಗೂ ಜೆನ್ ಪಾಲ್ ಡುಮಿನಿ (73; 110 ನಿ., 89 ಎ., 1 ಬೌಂಡರಿ, 1 ಸಿಕ್ಸರ್) ನಡುವಣ ಉತ್ತಮ ಜೊತೆಯಾಟ ಭಾರತಕ್ಕೆ ದುಬಾರಿಯಾಗಿ ಪರಿಣಮಿಸಿತು. ದಕ್ಷಿಣ ಆಫ್ರಿಕಾದ ಬ್ಯಾಟ್ಸ್‌ಮನ್‌ಗಳು ಅಕ್ಷರಶಃ ಭಾರತದ ಬೌಲರ್‌ಗಳನ್ನು ಬ್ಯಾಟ್ ಮೂಲಕವೇ ‘ರೈಡ್’ ಮಾಡಿದರು.