ಬೆಂಗಳೂರು: `ಬಹುಜನ ಸಮಾಜ ಪಕ್ಷದ (ಬಿಎಸ್‌ಪಿ) ರಾಜ್ಯ ಘಟಕದ ಅಧ್ಯಕ್ಷ ಮಾರಸಂದ್ರ ಮುನಿಯಪ್ಪ ಮತ್ತು ಅವರ ಸಹಚರರು ವೀರಣ್ಣ ಎಂಬುವವರ ಮೇಲೆ ಹಲ್ಲೆ ನಡೆಸಿದ್ದಾರೆ ಎಂಬ ಆರೋಪ ನಿರಾಧಾರವಾದದ್ದು~ ಎಂದು ಪಕ್ಷದ ರಾಜ್ಯ ಘಟಕದ ಉಪಾಧ್ಯಕ್ಷ ಗೋಪಿನಾಥ್ ಹೇಳಿದರು.
ನಗರದಲ್ಲಿ ಸೋಮವಾರ ಪತ್ರಿಕಾಗೋಷ್ಠಿಯಲ್ಲಿ ಅವರು ಮಾತನಾಡಿ, `ಈ ಹಲ್ಲೆ ಪ್ರಕರಣಕ್ಕೂ ಮಾರಸಂದ್ರ ಮುನಿಯಪ್ಪ ಅವರಿಗೂ ಯಾವುದೇ ಸಂಬಂಧವಿಲ್ಲ. ಆ ಘಟನೆ ನಡೆದಾಗ ಮುನಿಯಪ್ಪ ಅವರು ಕನಕಪುರದ ಕಾರ್ಯಕ್ರಮದಲ್ಲಿದ್ದರು~ ಎಂದು ಸ್ಪಷ್ಟಪಡಿಸಿದರು.
`ಈ ಪ್ರಕರಣದ ಹಿಂದೆ ಕೇಂದ್ರ ಸಚಿವರೊಬ್ಬರ ಕೈವಾಡವಿದೆ. ಆ ಸಚಿವರು ಬೆಂಗಳೂರು ಸಮೀಪದ ಮಂಚೇನಹಳ್ಳಿಯಲ್ಲಿನ ದಲಿತರ 150 ಕೋಟಿ ಮೌಲ್ಯದ ಜಮೀನನ್ನು ಕಬಳಿಸಲು ಪ್ರಯತ್ನ ನಡೆಸಿದ್ದರು. ಆಗ ದಲಿತರ ಪರವಾಗಿ ಮುನಿಯಪ್ಪ ಹೋರಾಟ ಮಾಡಿದ್ದರು. ಇದಕ್ಕೆ ಪ್ರತೀಕಾರವಾಗಿ ಆ ಸಚಿವರು ಮುನಿಯಪ್ಪನವರ ವಿರುದ್ಧ ಪಿತೂರಿ ನಡೆಸಿದ್ದಾರೆ~ ಎಂದು ಖಜಾಂಚಿ ಕೋರಮಂಗಲ ಮುನಿಯಪ್ಪ ಆರೋಪಿಸಿದರು. ರಾಜ್ಯ ಪ್ರಧಾನ ಕಾರ್ಯದರ್ಶಿ ಬಿ.ಕಮಲನಾಭನ್, ಕಾರ್ಯದರ್ಶಿ ವಿ.ಮುನಿಸ್ವಾಮಿ, ಸಮಿತಿ ಸದಸ್ಯೆ ನಹೀದಾ ಸಲ್ಮ ಮತ್ತಿತರರು ಪತ್ರಿಕಾಗೋಷ್ಠಿಯಲ್ಲಿ ಹಾಜರಿದ್ದರು.
