ಹಸಿಕಡಲೆಗೆ ಕಾಯಿಕೊರಕ ಹುಳುಬಾಧೆ

ಚಾಮರಾಜನಗರ: ಜಿಲ್ಲೆಯಲ್ಲಿ ಹಿಂಗಾರು ಹಂಗಾಮಿನಡಿ ಬಿತ್ತನೆ ಮಾಡಿದ್ದ ಹಸಿಕಡಲೆಗೆ ಕಾಯಿಕೊರಕ (ಹೆಲಿಕೊವರ್ಪಾ ಆರ್ಮಿಜಿರಾ) ಹುಳುಬಾಧೆ ಕಾಣಿಸಿಕೊಂಡಿದ್ದು, ಉತ್ತಮ ಇಳುವರಿ ಪಡೆಯುವ ನಿರೀಕ್ಷೆಯಲ್ಲಿದ್ದ ರೈತರಿಗೆ ಆತಂಕ ತಂದಿದೆ.

ಸಕಾಲದಲ್ಲಿ ಮಳೆ ಬೀಳದ ಪರಿಣಾಮ ಜಿಲ್ಲೆ ಬರಪೀಡಿತವೆಂದು ಘೋಷಣೆ ಯಾಗಿದೆ. ಆದರೆ, ಹಿಂಗಾರು ಹಂಗಾಮಿ ನಲ್ಲಿ ಅಲ್ಪಸ್ವಲ್ಪ ಮಳೆ ಸುರಿದ ಹಿನ್ನೆಲೆ ಯಲ್ಲಿ ರೈತರು ಹಸಿಕಡಲೆ ಬಿತ್ತಿದ್ದರು. ಜಿಲ್ಲೆಯಲ್ಲಿ ಸುಮಾರು 25 ಸಾವಿರ ಎಕರೆಯಲ್ಲಿ ಹಸಿಕಡಲೆ ಬಿತ್ತನೆಯಾಗಿದೆ. ಮಳೆಯಾಶ್ರಿತ ಹಾಗೂ ನೀರಾವರಿ ಪ್ರದೇಶದಲ್ಲಿ ಬಿತ್ತನೆಯಾಗಿದ್ದ ಹಸಿಕಡಲೆ ಕಟಾವಿಗೆ ಬಂದಿದೆ. ಆದರೆ, ಹುಳುಬಾಧೆ ಕಾಣಿಸಿಕೊಂಡಿರುವ ಪರಿಣಾಮ ಅನ್ನದಾತರು ಕಂಗಾಲಾಗಿದ್ದಾರೆ.

ಹಸಿಕಡಲೆಯ ಉತ್ಪಾದನೆ ಕಡಿಮೆ ಮಾಡುವಲ್ಲಿ ಕಾಯಿಕೊರಕ ಹುಳು ಮುಖ್ಯ ಪಾತ್ರವಹಿಸುತ್ತದೆ. ಸಾಮಾನ್ಯವಾಗಿ ಬಿತ್ತನೆ ಮಾಡಿದ 15ದಿನದ ನಂತರ ಹುಳುಬಾಧೆ ಕಾಣಿಸಿಕೊಳ್ಳುತ್ತದೆ. ಕೊಯ್ಲು ಮುಗಿ ಯುವವರೆಗೂ ಇದರ ಹಾವಳಿ ತಪ್ಪುವುದಿಲ್ಲ.

ರೈತರು ಕೀಟನಾಶಕಗಳ ಮೇಲಿನ ಸಂಪೂರ್ಣ ಅವಲಂಬನೆ ಕೈಬಿಡಬೇಕು. ನೈಸರ್ಗಿಕವಾದ ದೀರ್ಘಾವಧಿ ಹಾಗೂ ನಿರಂತರವಾಗಿ ಪರಿಣಾಮಕಾರಿಯಾಗಬಲ್ಲ ವಿಧಾನ ಅನುಸರಿಸಬೇಕು. ಸಮಗ್ರ ಪೀಡೆ ನಿರ್ವಹಣೆ ಪದ್ಧತಿ ಅಳವಡಿಸಿಕೊಂಡರೆ ಹುಳುಬಾಧೆ ತಡೆಗಟ್ಟಬಹುದು ಎನ್ನುತ್ತಾರೆ ಕೃಷಿ ತಜ್ಞರು.

ದೂರದಿಂದ ಹೊಲದಲ್ಲಿರುವ ಬೆಳೆ ನೋಡಿದಾಗ ಎಲೆಯ ಮೇಲೆ ಬಿಳಿಮಚ್ಚೆ ಯಂತಹ ಕಲೆಗಳು ಕಂಡುಬರುತ್ತವೆ. ಹುಳುಬಾಧೆ ಹೆಚ್ಚಾದರೆ ಗಿಡಗಳು ಸಂಪೂರ್ಣವಾಗಿ ಒಣಗಿ ಹೋಗುತ್ತವೆ. ಕಾಯಿಕಟ್ಟುವ ಹಂತದಲ್ಲಿ ಒಂದು ಹುಳು ಸುಮಾರು 20ರಿಂದ 30 ಹಸಿಕಡಲೆ ಕಾಯಿ ನಾಶ ಮಾಡುವ ಸಾಮರ್ಥ್ಯ ಹೊಂದಿರುತ್ತದೆ. ಹುಳು ಸಾಧಾರಣ ಗಾತ್ರವಾಗಿದ್ದು, ತಿಳಿಕಂದು ಬಣ್ಣವಿರುತ್ತದೆ. ಮುಂದಿನ ರೆಕ್ಕೆಯ ಮೇಲೆ ಕಪ್ಪುಚುಕ್ಕೆ ಇರುತ್ತದೆ. ಹಿಂದಿನ ರೆಕ್ಕೆಗಳು ತಿಳಿಬಿಳಿ ಮತ್ತು ಹಿಂಭಾಗದ ಅಂಚು ಕಪ್ಪುಛಾಯೆಯಿಂದ ಕೂಡಿರುತ್ತದೆ. ಹಸಿಕಡಲೆ ಬೆಳೆಯ ಮೇಲೆ 21ರಿಂದ 28 ದಿನದವರೆಗೆ ಹುಳುಬಾಧೆ ವ್ಯಾಪಿಸುತ್ತದೆ.

`ರೈತರು ಅಂಗಡಿ ಮಾರಾಟಗಾರರು ನೀಡುವ ಔಷಧಿ ತಂದು ಸಿಂಪಡಣೆ ಮಾಡುತ್ತಾರೆ. ತಜ್ಞರ ಸಲಹೆ ಪಡೆಯುವುದಿಲ್ಲ. ಹೀಗಾಗಿ, ಹುಳುಬಾಧೆ ನಿಯಂತ್ರಣಕ್ಕೆ ಬರುವುದಿಲ್ಲ. ಕೆಲವು ರೈತರ ಜಮೀನಿನಲ್ಲಿ ಈಗಾಗಲೇ ಸಮಗ್ರ ಪೀಡೆ ನಿರ್ವಹಣಾ ಕ್ರಮಕೈಗೊಳ್ಳಲಾಗಿದೆ. ಹುಳುಬಾಧೆ ಹತೋಟಿಗೆ ಬಂದಿದೆ. ವಿಜ್ಞಾನ ಕೇಂದ್ರಕ್ಕೆ ಭೇಟಿ ನೀಡುವ ಎಲ್ಲ ರೈತರಿಗೂ ಸೂಕ್ತ ಮಾರ್ಗದರ್ಶನ ನೀಡಲಾಗುವುದು' ಎಂದು ಹರದನಹಳ್ಳಿಯ ಕೃಷಿ ವಿಜ್ಞಾನ ಕೇಂದ್ರದ ಕೀಟತಜ್ಞ ಡಾ.ಶಿವರಾಯ್ ನಾವಿ `ಪ್ರಜಾವಾಣಿ'ಗೆ ತಿಳಿಸಿದರು.

ಸಮಗ್ರ ಪೀಡೆ ನಿರ್ವಹಣೆ ಹೇಗೆ?
ರೈತರು ಬೀಜ ಬಿತ್ತನೆಯಿಂದ ಆರಂಭಿಸಿ ಗಿಡಗಳ ವಿವಿಧ ಬೆಳವಣಿಗೆ ಹಂತ ಹಾಗೂ ಕೋಯ್ಲು ಮುಗಿಯುವವರೆಗೂ ಸಮಗ್ರ ಪೀಡೆ ನಿರ್ವಹಣೆ ಮಾಡಿದರೆ ಹುಳುಬಾಧೆ ನಿಯಂತ್ರಿಸಬಹುದು ಎನ್ನುತ್ತಾರೆ ಕೃಷಿ ವಿಜ್ಞಾನ ಕೇಂದ್ರದ ತಜ್ಞರು.