ನವದೆಹಲಿ (ಪಿಟಿಐ): ಮಾಜಿ ಹಾಕಿ ಆಟಗಾರ ಎಂ.ಕೆ. ಕೌಶಿಕ್ ಅವರನ್ನು 2016ರ ರಿಯೋ ಡಿ ಜನೈರೋದ ಒಲಿಂಪಿಕ್ ವರೆಗೂ ಭಾರತ ಪುರುಷರ ಹಾಕಿ ತಂಡದ ಸಹಾಯಕ ಕೋಚ್ ಆಗಿ `ಹಾಕಿ ಇಂಡಿಯಾ' ನೇಮಿಸಿದೆ. ಇವರು ಮುಖ್ಯ ಕೋಚ್ ಮೈಕಲ್ ನಾಬ್ಸ್ ಜತೆಗೂಡಿ ಕಾರ್ಯ ನಿರ್ವಹಿಸಲಿದ್ದಾರೆ.
ಲೈಂಗಿಕ ಕಿರುಕುಳ ಆರೋಪದ ಕಾರಣ (ನಂತರದಲ್ಲಿ ನಿರಪರಾಧಿ ಎಂದು ತಿಳಿದು ಬಂದಿತ್ತು) ಭಾರತ ಮಹಿಳಾ ಹಾಕಿ ತಂಡದ ಕೋಚ್ ಹುದ್ದೆಗೆ ಕೌಶಿಕ್ ರಾಜೀನಾಮೆ ನೀಡಿದ ಮೂರು ವರ್ಷಗಳ ಬಳಿಕ `ಹಾಕಿ ಇಂಡಿಯಾ'ದ ಈ ನಿರ್ಧಾರ ಹೊರಬಿದ್ದಿದೆ.
`ಇದೇ ಫೆಡರೇಷನ್ ನನ್ನ ವಿರುದ್ಧ ತನಿಖೆ ನಡೆಸಿತ್ತು. ಬಳಿಕ ನಾನು ದೋಷಮುಕ್ತ ಎಂದು ಸ್ಪಷ್ಟವಾಗಿತ್ತು.ಇದೀಗ ಅದೇ ಮತ್ತೆ ನನ್ನನ್ನು ಪುರುಷರ ತಂಡದ ಕೋಚ್ ಹುದ್ದೆಗೆ ಶಿಫಾರಸು ಮಾಡಿದೆ. ಇದುವೇ ನಾನು ನಿರಪರಾಧಿ ಎಂಬುದನ್ನು ಸಾಬೀತುಪಡಿಸುತ್ತದೆ' ಎಂದು ಕೌಶಿಕ್ ನುಡಿದ್ದಾರೆ.
