ಬೆಂಗಳೂರು: ಸಮಬಲದ ಆಟ ಪ್ರದರ್ಶಿಸಿದ ಡಿವೈಎಸ್ಎಸ್ `ಎ~ ಹಾಗೂ ಐಟಿಐ ತಂಡಗಳ ನಡುವಿನ ರಾಜ್ಯ `ಎ~ ಡಿವಿಷನ್ ಹಾಕಿ ಲೀಗ್ ಚಾಂಪಿಯನ್ಷಿಪ್ನ ಪಂದ್ಯವು ಡ್ರಾ ದಲ್ಲಿ ಅಂತ್ಯ ಕಂಡಿತು.
ಕರ್ನಾಟಕ ರಾಜ್ಯ ಹಾಕಿ ಸಂಸ್ಥೆ ಆಶ್ರಯದಲ್ಲಿ ಇಲ್ಲಿನ ಅಕ್ಕಿ ತಿಮ್ಮನಹಳ್ಳಿ ರಾಜ್ಯ ಹಾಕಿ ಸಂಸ್ಥೆ ಕ್ರೀಡಾಂಗಣದಲ್ಲಿ ಗುರುವಾರ ನಡೆದ ಪಂದ್ಯದಲ್ಲಿ ಉಭಯ ತಂಡಗಳು ತಲಾ 2-2ಗೋಲುಗಳನ್ನು ಗಳಿಸಿದವು.
ಐಟಿಐ ತಂಡದ ಜಗನ್ನಾಥ್ 7 ಮತ್ತು 32ನೇ ನಿಮಿಷದಲ್ಲಿ ಗೋಲು ಗಳಿಸಿ ತಂಡವನ್ನು ಗೆಲುವಿನ ಹಾದಿಯಲ್ಲಿ ಸಾಗುವಂತೆ ಮಾಡಿದರು. ಆದರೆ ಡಿವೈಎಸ್ಎಸ್ `ಎ~ ತಂಡ ದ್ವಿತೀಯಾರ್ಧದಲ್ಲಿ ಚುರುಕಿನ ಆಟವಾಡಿ ಐಟಿಐ ತಂಡದ ಗೆಲುವಿಗೆ ಅಡ್ಡಿಯಾಯಿತು. ಡಿವೈಎಸ್ಎಸ್ ತಂಡದ ಕುಶ ಹಾಗೂ ಸಚಿನ್ ಮಲ್ಲಾಡಿ ತಲಾ ಒಂದು ಗೋಲು ತಂದಿತ್ತು ಸಮಬಲ ಸಾಧಿಸುವಂತೆ ನೋಡಿಕೊಂಡರು. ಅಷ್ಟೇ ಅಲ್ಲ ಎದುರಾಳಿ ತಂಡ ಮತ್ತೆ ಗೋಲು ಗಳಿಸಿದಂತೆ ಎಚ್ಚರಿಕೆ ವಹಿಸಿತು.