ಹೂಡಿಕೆಸ್ನೇಹಿ ವಾತಾವರಣ ಸೃಷ್ಟಿಸಿ

ಹೀರೊ ಮೋಟೊ ಕಾರ್ಪ್ ಕಂಪೆನಿಯು ವರ್ಷಕ್ಕೆ 18 ಲಕ್ಷ  ದ್ವಿಚಕ್ರ ವಾಹನಗಳನ್ನು ಉತ್ಪಾದಿಸುವ ಬೃಹತ್‌ ಘಟಕವನ್ನು ಆಂಧ್ರ­ ಪ್ರದೇ­ಶದ ಚಿತ್ತೂರು ಜಿಲ್ಲೆಯಲ್ಲಿ ಸ್ಥಾಪಿಸುವ ಸಂಬಂಧ ಆ ರಾಜ್ಯ ಸರ್ಕಾರ­ದೊಂದಿಗೆ ಒಪ್ಪಂದ ಮಾಡಿಕೊಂಡಿದೆ. ಕರ್ನಾಟಕದ ಧಾರವಾಡ ಬಳಿ ಸ್ಥಾಪನೆಯಾಗ­ಬಹು­ದಾಗಿದ್ದ ಈ ಕಾರ್ಖಾನೆ ಆಂಧ್ರ ಪಾಲಾಗಲು ರಾಜ್ಯ ಸರ್ಕಾರದ ಮಂದ­ಗತಿ ಧೋರಣೆಯೂ ಒಂದು ಕಾರಣ ಆಗಿರಬಹುದು.

₨ 1,600 ಕೋಟಿ ಬಂಡ­­ವಾಳ ಹೂಡಿಕೆಯ ಈ ಕಾರ್ಖಾನೆಯನ್ನು ರಾಜ್ಯದಲ್ಲಿ ಸ್ಥಾಪಿಸುವ ಸಂಬಂಧ ಒಂದು ವರ್ಷದ ಹಿಂದೆಯೇ ಕಂಪೆನಿ ಸರ್ಕಾರಕ್ಕೆ ಅರ್ಜಿ ಸಲ್ಲಿಸಿತ್ತು. ಇಂತಹ ದೊಡ್ಡ ಕಂಪೆನಿಯು ಒಲವು ತೋರಿದ ತಕ್ಷಣ ಅದಕ್ಕೆ ಬೇಕಾದ ಭೂಮಿ, ಇತರೆ ಸೌಲಭ್ಯಗಳನ್ನು ಕಲ್ಪಿಸಲು ಸರ್ಕಾರ ಮತ್ತಷ್ಟು ಆಸ್ಥೆ ವಹಿಸ­ಬೇಕಿತ್ತು. ಆ ಕಂಪೆನಿ ಕೇಳಿದ್ದ ಕೆಲವು ರಿಯಾಯಿತಿಗಳಿಗೆ ಸಂಬಂಧಿಸಿದಂತೆ ನಿರ್ಧಾರ ತೆಗೆದುಕೊಳ್ಳಲು ಸರ್ಕಾರ ವಿಳಂಬ ನೀತಿ ಅನುಸರಿಸಿದ್ದು ಸರಿಯಲ್ಲ. ಕಾರ್ಖಾನೆಗೆ ಒಟ್ಟು 500 ಎಕರೆ ಭೂಮಿ ಹಂಚಿಕೆ ಮಾಡಿ ಸರ್ಕಾರ ಆದೇಶ ಹೊರ­ಡಿಸಿದೆ ಎಂದು ಧಾರವಾಡ ಜಿಲ್ಲಾ ಕೈಗಾರಿಕಾ ಕೇಂದ್ರದ ಜಂಟಿ ನಿರ್ದೇ­ಶ­ಕರು ಸ್ಪಷ್ಟಪಡಿಸಿದ್ದಾರೆ. ಆದರೆ ಈ ಆದೇಶದ ಪ್ರತಿ ಕೈಗಾರಿಕಾ ಇಲಾಖೆಯ ಅಧೀನದಲ್ಲಿಯೇ  ಇರುವ ಕರ್ನಾಟಕ ಕೈಗಾರಿಕಾ ಪ್ರದೇಶಾಭಿವೃದ್ಧಿ ಮಂಡ­ಳಿಗೆ ಸಿಕ್ಕಿಲ್ಲ ಎಂದರೆ ಅದು ಕಂಪೆನಿಗೆ ಯಾವಾಗ ಸಿಗುತ್ತಿತ್ತೊ? ಇದು ಆಡ­ಳಿ­ತಾ­ರೂಢರ ಇಚ್ಛಾಶಕ್ತಿ ಕೊರತೆಗೆ ಕನ್ನಡಿ. ರಾಜ್ಯದಲ್ಲಿ ಕೈಗಾರಿಕಾ ಖಾತೆಗೆ  ಪ್ರತ್ಯೇಕ  ಸಚಿವರೇ ಇಲ್ಲ. ಹತ್ತಾರು ಪ್ರಮುಖ ಖಾತೆಗಳನ್ನು ಮುಖ್ಯ­ಮಂತ್ರಿ ಸಿದ್ದರಾಮಯ್ಯ ಅವರೇ ನಿಭಾಯಿಸಲು ಸಾಧ್ಯವೇ?