ನವದೆಹಲಿ (ಪಿಟಿಐ): 2020ರ ಒಲಿಂಪಿಕ್ಸ್‌ನಲ್ಲೂ ಕುಸ್ತಿ ಸ್ಪರ್ಧೆ ಉಳಿಸಿಕೊಳ್ಳಲು ಅನುವು ಮಾಡಿಕೊಡುವ ನಿಟ್ಟಿನಲ್ಲಿ ಅಂತರರಾಷ್ಟ್ರೀಯ ಒಲಿಂಪಿಕ್‌ ಸಮಿತಿಯು (ಐಒಸಿ) ಮುಂಬರುವ ಅಧಿವೇಶನದಲ್ಲಿ ಈ ಬಗ್ಗೆ ಚರ್ಚೆ ನಡೆಸಬೇಕು ಎಂದು ಕೇಂದ್ರ ಕ್ರೀಡಾ ಸಚಿವಾಲಯ ಆಗ್ರಹಿಸಿದೆ.
ಈ ಸಂಬಂಧ ಕ್ರೀಡಾ ಕಾರ್ಯದರ್ಶಿ ಪಿ.ಕೆ.ದೇಬ್‌ ಐಒಸಿ ಸದಸ್ಯರಿಗೆ ಪತ್ರ ಬರೆದಿದ್ದಾರೆ. ಐಒಸಿಯ 125ನೇ ಅಧಿವೇಶನ ಸೆಪ್ಟೆಂಬರ್ 7ರಿಂದ 10ರವರೆಗೆ ಬ್ಯೂನಸ್‌ ಐರೀಸ್‌ನಲ್ಲಿ ನಡೆಯಲಿದೆ. ಈ ಸಂದರ್ಭದಲ್ಲಿ ಮತದಾನ ನಡೆಯಲಿದೆ. ಬೇಸ್‌ಬಾಲ್‌/ಸಾಫ್ಟ್‌ಬಾಲ್‌, ಸ್ಕ್ವಾಷ್‌ ಹಾಗೂ ಕುಸ್ತಿ ಕ್ರೀಡೆಗಳು ಸ್ಪರ್ಧೆಯಲ್ಲಿದ್ದು ಒಂದು ಕ್ರೀಡೆಗೆ ಮಾತ್ರ ಸ್ಥಾನ ದೊರೆಯಲಿದೆ.
‘1886ರ ಅಥ್ಲೆನ್ಸ್‌ ಒಲಿಂಪಿಕ್ಸ್‌ನಲ್ಲೂ ಕುಸ್ತಿ ಇತ್ತು. ಪ್ರಾಚೀನ ಒಲಿಂಪಿಕ್ಸ್‌ನ ಮುಖ್ಯ ಅಂಗವಾಗಿತ್ತು. ಹಾಗಾಗಿ ಈ ಕ್ರೀಡಾಮೇಳದಿಂದ ಯಾವುದೇ ಕಾರಣಕ್ಕೂ ಕುಸ್ತಿ ಕೈಬಿಡಬಾರದು’ ಎಂದು ದೇಬ್‌ ಪತ್ರದಲ್ಲಿ ಒತ್ತಾಯಿಸಿದ್ದಾರೆ.
