ಬೆಂಗಳೂರು: ಸುಮಾರು 50 ವರ್ಷಗಳಷ್ಟು ಹಳೆಯದಾದ ಬೆಂಗಳೂರು ಷೇರು ವಿನಿಮಯ ಕೇಂದ್ರದ (ಬಿಜಿಎಸ್‌ಇ) ಮಾನ್ಯತೆ ಶೀಘ್ರದಲ್ಲೇ ರದ್ದುಗೊಳ್ಳಲಿದೆ.
ಮಾನ್ಯತೆ ರದ್ದುಪಡಿಸುವ ನಿರ್ಧಾರ ವನ್ನು ಶನಿವಾರ ಇಲ್ಲಿ ನಡೆದ ವಾರ್ಷಿಕ ಸರ್ವ ಸದಸ್ಯರ ಸಭೆಯಲ್ಲಿ ತೆಗೆದುಕೊಳ್ಳಲಾಯಿತು.
ಪ್ರಾದೇಶಿಕ ಷೇರು ವಿನಿಮಯ ಕೇಂದ್ರಗಳು ಮಾನ್ಯತೆ ಉಳಿಸಿಕೊಳ್ಳಬೇಕಾದರೆ ರೂ.1,000 ಕೋಟಿ ವಹಿವಾಟು ಹೊಂದಿರಬೇಕು ಎಂಬ ನಿಯಮವನ್ನು ಭಾರತೀಯ ಷೇರುಪೇಟೆ ನಿಯಂತ್ರಣ ಮಂಡಳಿ (ಸೆಬಿ) ಜಾರಿಗೊಳಿಸಿದೆ. ಆದರೆ, ‘ಬಿಜಿಎಸ್‌ಇ’ ವಹಿವಾಟು ಕೇವಲ ರೂ.110 ಕೋಟಿಯಷ್ಟಿದ್ದು, ಮಾನ್ಯತೆ ಮುಂದುವರಿಸಿಕೊಂಡು ಹೋಗುವುದು ಅಸಾಧ್ಯವಾಗಿದೆ. ಈ ಹಿನ್ನೆಲೆಯಲ್ಲಿ ಮಾನ್ಯತೆ ರದ್ದುಪಡಿಸುವ ನಿರ್ಧಾರ ತೆಗೆದುಕೊಳ್ಳಲಾಯಿತು ಎಂದು ‘ಬಿಜಿಎಸ್‌ಇ’ ಮೂಲಗಳು ತಿಳಿಸಿವೆ.
ಬೆಂಗಳೂರು ಷೇರು ವಿನಿಮಯ ಕೇಂದ್ರದ ಅಂಗಸಂಸ್ಥೆ ಬಿಜಿಎಸ್‌ಇ ಫೈನಾ-ನ್ಶಿಯಲ್ಸ್ ಲಿಮಿಟೆಡ್‌ ಬ್ರೋಕಿಂಗ್‌, ಸುಮಾರು 65 ಸಾವಿರ ಹೂಡಿಕೆದಾರರನ್ನು ನೋಂದಾಯಿಸಿಕೊಂಡು ಚಟುವಟಿಕೆ ನಡೆಸಲು ಅನುವು ಮಾಡಿಕೊಟ್ಟಿದೆ. ಷೇರು ವಿನಿಮಯ ಕೇಂದ್ರದ ಮಾನ್ಯತೆ ರದ್ದಾದರೂ ಬಿಜಿಎಸ್‌ಇ ಫೈನಾನ್ಶಿಯಲ್ಸ್‌ನಲ್ಲಿ ಸೇವೆ ನಿರಾತಂಕವಾಗಿ ಮುಂದುವರೆಯಲಿದೆ. ಆದ್ದರಿಂದ ಈ ಬಗ್ಗೆ ಆತಂಕ ಅನಾವಶ್ಯಕ ಎಂದೂ ‘ಬಿಜಿಎಸ್‌ಇ’ ಸ್ಪಷ್ಟಪಡಿಸಿದೆ.
