ನ್ಯೂಯಾರ್ಕ್‌ (ಪಿಟಿಐ): ಪ್ರತಿಭಟನಾನಿರತ ಬಂಡುಕೋರರ ಮೇಲೆ ಸಿರಿಯಾ ಸರ್ಕಾರ ರಾಸಾಯನಿಕ ಅಸ್ತ್ರಗಳನ್ನು ಪ್ರಯೋಗ ಮಾಡಿರುವುದು ನಿಜ ಎಂದು ವಿಶ್ವಸಂಸ್ಥೆಯ ಜಂಟಿ ತನಿಖಾ ತಂಡ ದೃಢಪಡಿಸಿದೆ.
ವಿಶ್ವಸಂಸ್ಥೆಯ ಮಹಾ ಪ್ರಧಾನ ಕಾರ್ಯದರ್ಶಿ ಬಾನ್‌ ಕಿ ಮೂನ್‌ ಅವರಿಗೆ ತನಿಖಾ ತಂಡದ ಮುಖ್ಯಸ್ಥ ಅಕೆ ಸೆಲ್‌ಸ್ಟ್ರಾಮ್‌ ಶುಕ್ರವಾರ ಸಲ್ಲಿಸಿದ 82 ಪುಟಗಳ ಅಂತಿಮ ವರದಿಯಲ್ಲಿ ಈ ವಿಷಯವನ್ನು ಬಹಿರಂಗ ಪಡಿಸಲಾಗಿದೆ.
ಮಾರ್ಚ್‌ನಲ್ಲಿ ಸಿರಿಯಾ ಸರ್ಕಾರ ಹಾಗೂ ನಾಗರಿಕರ ನಡುವೆ ನಡೆದ ಘರ್ಷಣೆಯಲ್ಲಿ ರಾಸಾಯನಿಕ ಅಸ್ತ್ರ ಪ್ರಯೋಗ ಮಾಡಲಾಗಿದೆ ಎಂಬ ಆರೋಪದ ಹಿನ್ನೆಲೆಯಲ್ಲಿ ಈ ತನಿಖೆ ಕೈಗೊಳ್ಳಲಾಗಿತ್ತು.
‘ರಾಸಾಯನಿಕ ಅಸ್ತ್ರ ಬಳಸಿರುವುದು ಖಚಿತವಾಗಿದೆ. ಇದು ಅಂತರರಾಷ್ಟ್ರೀಯ ಕಾನೂನಿನ ಉಲ್ಲಂಘನೆ ಮತ್ತು ಮಾನವೀಯತೆಗೆ ಮಾಡಿದ ಅವಮಾನ. ಸಿರಿಯಾದಲ್ಲಷ್ಟೇ ಅಲ್ಲದೆ ಜಗತ್ತಿನಾದ್ಯಂತ ಇನ್ನು ಇಂತಹ ಮಾರಕ ಅಸ್ತ್ರಗಳ ಬಳಕೆಯಾಗುವುದಿಲ್ಲ ಎಂದು ನಾವು ಭರವಸೆ ನಿಡಬೇಕಾಗಿದೆ’ ಎಂದು ಮೂನ್‌ ಹೇಳಿದರು.
