ನವದೆಹಲಿ: ‘ಹಂಚಿಕೊಳ್ಳುವ ಮುನ್ನ ಯೋಚಿಸಿ’ ಎಂಬ ಸಂದೇಶವನ್ನು ಸಾಮಾಜಿಕ ಜಾಲತಾಣ ಫೇಸ್ಬುಕ್, ತನ್ನ ಯುವ ಬಳಕೆದಾರರಿಗೆ ನೀಡುತ್ತಿದೆ.
ಫೇಸ್ಬುಕ್ನಲ್ಲಿ ಪೋಸ್ಟ್ಗಳನ್ನು ಹಂಚುವ ಮುನ್ನ ಕೈಗೊಳ್ಳಬೇಕಾದ ಮುನ್ನೆಚ್ಚರಿಕೆಯ ಬಗ್ಗೆ ಈ ಸಂದೇಶವು ಮಾಹಿತಿ ನೀಡುತ್ತದೆ.
ಈ ಸಲುವಾಗಿ ಫೇಸ್ಬುಕ್ ರೂಪಿಸಿರುವ www.facebook.com/safety ಲಿಂಕ್ನಲ್ಲಿ ಕನ್ನಡ, ಹಿಂದಿ, ಗುಜರಾತಿ, ಮಲಯಾಳ, ಬಂಗಾಳಿ, ಮರಾಠಿ, ಪಂಜಾಬಿ, ತಮಿಳು ಮತ್ತು ತೆಲುಗು ಭಾಷೆಗಳಲ್ಲಿ ಮಾಹಿತಿ ಲಭ್ಯವಿದೆ.
ಯುವಜನತೆ ತಮ್ಮ ಚಿಂತನೆ, ಚಿತ್ರಗಳು ಮತ್ತು ಮಾಹಿತಿಯನ್ನು ಹಂಚಿಕೊಳ್ಳುವ ಮುನ್ನ ಅಗತ್ಯ ಮುನ್ನೆಚ್ಚರಿಕೆ ವಹಿಸಲಿ ಎಂಬ ಉದ್ದೇಶದಿಂದ ಫೇಸ್ಬುಕ್ ಮತ್ತು ಮೀಡಿಯಾಸ್ಮಾರ್ಟ್ ಜಂಟಿಯಾಗಿ ಈ ಸಂದೇಶ, ಮಾರ್ಗದರ್ಶಿಯನ್ನು ರೂಪಿಸಿವೆ.
ಯಾವುದೇ ಪೋಸ್ಟ್ಗಳನ್ನು ಹಂಚುವ ಮುನ್ನ ಈ ಮಾರ್ಗದರ್ಶಿಯು, ಪೋಸ್ಟ್ ಹಂಚಿಕೆಯಿಂದಾಗಬಹುದಾದ ದುಷ್ಪರಿಣಾಮಗಳ ಬಗ್ಗೆ ಬಳಕೆದಾರರಿಗೆ ಸೂಚನೆ ನೀಡಲಿದೆ. ನಿರ್ದಿಷ್ಟ ವಿಷಯಗಳ ಕುರಿತಾದ ಹೇಳಿಕೆಗಳು, ಅಭಿಪ್ರಾಯಗಳು ಮತ್ತು ಚಿತ್ರಗಳ ಹಂಚಿಕೆಯಿಂದ ಮತ್ತೊಬ್ಬರಿಗೆ ಕಿರಿಕಿರಿ ಮತ್ತು ನೋವು ಉಂಟಾಗಬಹುದಾದ ಸಾಧ್ಯತೆಯ ಬಗ್ಗೆ ಅದು ಎಚ್ಚರಿಕೆ ನೀಡಲಿದೆ.