ಪ್ರಶ್ನೋತ್ತರ

ನಾನು ನಿವೃತ್ತ ನೌಕರ. ವಾರ್ಷಿಕ ಪಿಂಚಣಿ ₹ 7 ಲಕ್ಷ. ಠೇವಣಿ ಮೇಲಿನ ವಾರ್ಷಿಕ ಬಡ್ಡಿ ₹ 75,000. ಸೆಕ್ಷನ್ 80ಸಿ ಆಧಾರದ ಮೇಲೆ ₹ 1.50 ಲಕ್ಷ ಉಳಿತಾಯ ಮಾಡಿದ್ದೇನೆ. ನನಗೆ ಸ್ಟ್ಯಾಂಡರ್ಡ್‌ ಡಿಡಕ್ಷನ್‌ ಇದೆಯೇ. ಇದ್ದರೆ ಎಷ್ಟು? ಔಷಧೋಪಚಾರದ ವಾರ್ಷಿಕ ಖರ್ಚು ₹ 45 ಸಾವಿರ. ತೆರಿಗೆ–ರಿಟರ್ನ್ಸ್‌ ವಿಚಾರದಲ್ಲಿ ಮಾಹಿತಿ ನೀಡಿ.

ಉತ್ತರ: ನಿವೃತ್ತ ಪಿಂಚಣಿದಾರರಾಗಿರು ವುದರಿಂದ ಸೆಕ್ಷನ್‌ 16ರ ಆಧಾರದ ಮೇಲೆ ನಿಮಗೆ ವಾರ್ಷಿಕ ₹ 50 ಸಾವಿರ ವಿನಾಯಿತಿ ಸ್ಟ್ಯಾಂಡರ್ಡ್‌ ಡಿಡಕ್ಷನ್‌ನಲ್ಲಿ ಇದೆ. ಔಷಧೋಪಚಾರದ ಖರ್ಚು ಒಟ್ಟು ಆದಾಯದಿಂದ ಕಳೆಯುವಂತಿಲ್ಲ. ಆರೋಗ್ಯ ವಿಮೆ ಮಾಡಿದ್ದರೆ ಗರಿಷ್ಠ ₹ 50 ಸಾವಿರ ಸೆಕ್ಷನ್‌ 80ಡಿ ಆಧಾರದ ಮೇಲೆ ವಿನಾಯಿತಿ ಇದೆ. ಬ್ಯಾಂಕ್ ಠೇವಣಿ ಬಡ್ಡಿಯಲ್ಲಿ ಗರಿಷ್ಠ ₹ 50 ಸಾವಿರ ಸೆಕ್ಷನ್‌ 80ಟಿಟಿಬಿ ಆಧಾರದ ಮೇಲೆ ವಿನಾಯತಿ ಇದೆ. ಸೆಕ್ಷನ್‌ 16 ಮತ್ತು 80ಸಿ ಹಾಗೂ 80ಟಿಟಿಬಿ ಒಟ್ಟಾರೆ
₹ 2.50 ಲಕ್ಷ ನಿಮ್ಮ ಒಟ್ಟು ಆದಾಯ ₹ 7.75 ಲಕ್ಷದಿಂದ ಕಳೆದಾಗ ನಿಮ್ಮ ಆದಾಯ ₹ 5.25 ಲಕ್ಷ ಆಗಲಿದೆ. ನೀವು ಆರೋಗ್ಯ ವಿಮೆ ಮಾಡಿಸಿದ್ದರೆ ಆ ಮೊತ್ತ ₹ 5.25 ಲಕ್ಷದಿಂದ ಕಳೆದು ಸಂಪೂರ್ಣ ತೆರಿಗೆ ಉಳಿಸಿಬಹುದು. ಹೀಗೆ ಮಾಡದಿದ್ದರೆ ₹ 3 ಲಕ್ಷದಿಂದಲೇ ತೆರಿಗೆ ಕೊಡಬೇಕಾಗುತ್ತದೆ. ತೆರಿಗೆ ₹ 15,000 ಹಾಗೂ ₹ 15,000ದ ಮೇಲೆ ಶೇಕಡ 4ರಷ್ಟು ಶಿಕ್ಷಣ ಸೆಸ್ ಕೊಡಬೇಕಾಗುತ್ತದೆ. ಐ.ಟಿ ರಿಟರ್ನ್ಸ್‌ ನವೆಂಬರ್‌ 30ರ ಒಳಗಾಗಿ ಸಲ್ಲಿಸಿ.

ಮುರಳೀಧರ ಕುಲಕರ್ಣಿ, ಬೀದರ್

ನಾನು ಪಿಂಚಣಿದಾರ. ವಯಸ್ಸು 73. ₹ 5 ಲಕ್ಷ ವಾರ್ಷಿಕ ಪಿಂಚಣಿ, ₹ 1.50 ಲಕ್ಷ ಬ್ಯಾಂಕ್‌ ಠೇವಣಿ ಮೇಲಿನ ಬಡ್ಡಿ ಬಂದು ಸೆಕ್ಷನ್ 80ಸಿ ಯಲ್ಲಿ ₹ 1.50 ಲಕ್ಷ ಉಳಿತಾಯ ಮಾಡಿದರೆ ಎಷ್ಟು ತೆರಿಗೆ ಬರುತ್ತದೆ? ನಾನು ರಿಟರ್ನ್ಸ್‌ ತುಂಬಬೇಕಾ ತಿಳಿಸಿ. ಅಂಚೆ ಕಚೇರಿ ಠೇವಣಿಗೂ ಸೆಕ್ಷನ್‌ 80ಟಿಟಿಬಿ ಅನ್ವಯವಾಗುವುದೇ? ನಾನು ಪಿಪಿಎಫ್‌ ಖಾತೆ ಪ್ರಾರಂಭಿಸಲೇ?

ಉತ್ತರ: ಪಿಂಚಣಿ–ಬ್ಯಾಂಕ್‌ ಠೇವಣಿ ಮೇಲಿನ ಬಡ್ಡಿ ಸೇರಿದಾಗ ನಿಮ್ಮ ವಾರ್ಷಿಕ ಒಟ್ಟು ಆದಾಯ ₹ 6.50 ಲಕ್ಷ ಆಗುತ್ತದೆ. ನಿಮಗೆ ಸೆಕ್ಷನ್ 16, ₹ 50 ಸಾವಿರ, ಸೆಕ್ಷನ್‌ 80ಟಿಟಿಬಿಯಲ್ಲಿ ₹ 50 ಸಾವಿರ, 80ಸಿಯಲ್ಲಿ ₹ 1.50 ಲಕ್ಷ ಒಟ್ಟು ₹ 2.50 ಲಕ್ಷ ವಿನಾಯಿತಿ ಇರುವುದರಿಂದ ನಿಮ್ಮ ವಾರ್ಷಿಕ ಆದಾಯ ₹ 4 ಲಕ್ಷಕ್ಕೆ ಇಳಿಯುತ್ತದೆ. ನೀವು ತೆರಿಗೆಗೆ ಒಳಗಾವುದಿಲ್ಲ. ಆದರೆ, ₹ 3 ಲಕ್ಷ ದಾಟುವುದರಿಂದ ಐ.ಟಿ .ರಿಟರ್ನ್ಸ್‌ ತುಂಬಬೇಕು. ಪಿಪಿಎಫ್‌ 15 ವರ್ಷದ ಹೂಡಿಕೆಯಾದ್ದರಿಂದ ನಿಮ್ಮ ವಯಸ್ಸಿಗೆ ಅವಶ್ಯಕತೆ ಇಲ್ಲ. ಅಂಚೆ ಕಚೇರಿ ಠೇವಣಿಗೂ ಸೆಕ್ಷನ್‌ 80ಟಿಟಿಬಿ ವಿನಾಯಿತಿ ಇದೆ. (ಸೆಕ್ಷನ್‌ 80ಟಿಟಿಬಿ ಬ್ಯಾಂಕ್‌ ಹಾಗೂ ಅಂಚೆ ಕಚೇರಿ ಠೇವಣಿಗಳಿಗೆ ಮಾತ್ರ ಅನ್ವಯ)