ನವದೆಹಲಿ: ವಿಮಾನ ಇಂಧನ (ಜೆಟ್‌ ಇಂಧನ) ದರವನ್ನು ಪ್ರತಿ ಕಿಲೋ ಲೀಟರಿಗೆ ₹ 277.5ರಷ್ಟು (ಶೇ 0.2) ಏರಿಕೆ ಮಾಡಲಾಗಿದೆ.
ಶನಿವಾರದ ದರ ಏರಿಕೆಯನ್ನೂ ಒಳಗೊಂಡು ಈ ವರ್ಷದಲ್ಲಿ ಈವರೆಗೆ ಒಟ್ಟಾರೆ ಎಂಟು ಬಾರಿ ದರ ಹೆಚ್ಚಳ ಮಾಡಿದಂತಾಗಿದೆ. ಇದರಿಂದಾಗಿ ಪ್ರತಿ ಕಿಲೋ ಲೀಟರಿಗೆ ಒಟ್ಟಾರೆ ₹ 39,180ರಷ್ಟು ಏರಿಕೆ ಆಗಿದೆ. (ಒಂದು ಕಿಲೋ ಲೀಟರ್ ಎಂದರೆ ಒಂದು ಸಾವಿರ ಲೀಟರ್).
ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಇಂಧನ ದರ ಏರಿಕೆಗೆ ಅನುಗುಣವಾಗಿ ಸರ್ಕಾರಿ ಸ್ವಾಮ್ಯದ ತೈಲ ಮಾರಾಟ ಕಂಪನಿಗಳು ಈ ಪರಿಷ್ಕರಣೆ ಮಾಡಿವೆ.
ದೆಹಲಿಯಲ್ಲಿ ಶನಿವಾರ ಇಂಧನ ದರ ಪ್ರತಿ ಕಿಲೋ ಲೀಟರಿಗೆ ₹ 1.13 ಲಕ್ಷಕ್ಕೆ ಏರಿಕೆ ಆಗಿದೆ. ಮುಂಬೈನಲ್ಲಿ ₹ 1.11 ಲಕ್ಷಕ್ಕೆ ತಲುಪಿದೆ.
ಈ ಹಿಂದೆ ಮಾರ್ಚ್‌ 16ರಂದು ವಿಮಾನ ಇಂಧನ ದರವನ್ನು ಪ್ರತಿ ಕಿಲೋ ಲೀಟರಿಗೆ ಶೇ 18.3 ರಷ್ಟು (₹ 17,135.63) ಗರಿಷ್ಠ ಏರಿಕೆ ಮಾಡಲಾಗಿತ್ತು.
ವಿಮಾನವೊಂದರ ಒಟ್ಟಾರೆ ವೆಚ್ಚದಲ್ಲಿ ಇಂಧನದ ವೆಚ್ಚವೇ ಬಹುತೇಕ ಶೇ 40ರಷ್ಟು ಆಗುತ್ತದೆ.
ಪೆಟ್ರೋಲ್‌, ಡೀಸೆಲ್‌ ದರದಲ್ಲಿ ಯಾವುದೇ ಬದಲಾವಣೆ ಮಾಡಿಲ್ಲ. ಸತತ 10ನೇ ದಿನವೂ ಯಥಾಸ್ಥಿತಿ ಕಾ‌ಯ್ದುಕೊಳ್ಳಲಾಗಿದೆ.
