ಬೆಂಗಳೂರು: ವೈಮಾನಿಕ ಉದ್ಯಮಕ್ಕೆ ಅಗತ್ಯವಿರುವ ಬಿಡಿಭಾಗಗಳ ತಯಾರಿಕೆಗೆ ಬೇಕಿರುವ ಕಚ್ಚಾ ವಸ್ತುಗಳನ್ನು ಭಾರತದಲ್ಲಿ ಅಭಿವೃದ್ಧಿಪಡಿಸಲು ತಾನು ಮಿಶ್ರ ಧಾತು ನಿಗಮ್ ಲಿಮಿಟೆಡ್‌ (ಮಿಧಾನಿ) ಜೊತೆ ಪಾಲುದಾರಿಕೆಗೆ ಮುಂದಾಗುತ್ತಿರುವುದಾಗಿ ಬೋಯಿಂಗ್ ಇಂಡಿಯಾ ತಿಳಿಸಿದೆ.
ವೈಮಾನಿಕ ಉದ್ಯಮಕ್ಕೆ ಬೇಕಿರುವ ವಿಶೇಷ ವಸ್ತುಗಳು ಹಾಗೂ ಮಿಶ್ರಲೋಹಗಳು ದೇಶದಲ್ಲಿಯೇ ಲಭ್ಯವಾಗಬೇಕಿರುವುದು ದೇಶದ ರಕ್ಷಣಾ ಉದ್ಯಮವನ್ನು ಮತ್ತು ವೈಮಾನಿಕ ಉದ್ಯಮವನ್ನು ಸ್ವಾವಲಂಬಿ ಆಗಿಸುವಲ್ಲಿ ಮಹತ್ವದ್ದು ಎಂದು ಪ್ರಕಟಣೆ ಹೇಳಿದೆ.
‘ಬೋಯಿಂಗ್‌ನ ಪೂರೈಕೆ ವ್ಯವಸ್ಥೆಯಲ್ಲಿ ಸರ್ಕಾರಿ ಕಂಪನಿಗಳು ಮಹತ್ವದ ಸ್ಥಾನ ಪಡೆದಿವೆ. ಮಿಧಾನಿ ಜೊತೆ ಆಗಬಹುದಾದ ಪಾಲುದಾರಿಕೆಯು ಭಾರತದಲ್ಲಿ ಬೋಯಿಂಗ್‌ನ ಪೂರೈಕೆ ನೆಲೆಯನ್ನು ಗಟ್ಟಿಗೊಳಿಸಲಿದೆ’ ಎಂದು ಬೋಯಿಂಗ್ ಇಂಡಿಯಾ ಅಧ್ಯಕ್ಷ ಸಲೀಲ್ ಗುಪ್ತೆ ಹೇಳಿದ್ದಾರೆ. ಮಿಶ್ರ ಧಾತು ನಿಗಮವು ಕೇಂದ್ರ ಸರ್ಕಾರದ ಮಾಲೀಕತ್ವದಲ್ಲಿರುವ ಕಂಪನಿ.
