ಮುಂಬೈ: ಸರ್ಕಾರಿ ಸ್ವಾಮ್ಯದ ಕೆನರಾ ಬ್ಯಾಂಕ್‌, ಪ್ರಸಕ್ತ ಹಣಕಾಸು ವರ್ಷದ ಮೂರನೇ ತ್ರೈಮಾಸಿಕದಲ್ಲಿ ₹ 329.62 ಕೋಟಿ ನಿವ್ವಳ ಲಾಭ ಗಳಿಸಿದೆ.
ವರ್ಷದ ಹಿಂದಿನ ಇದೇ ಅವಧಿಯಲ್ಲಿನ ₹ 317 ಕೋಟಿ ಲಾಭಕ್ಕೆ ಹೋಲಿಸಿದರೆ, ಈ ಬಾರಿ ಶೇ 3.8ರಷ್ಟು ಏರಿಕೆ ದಾಖಲಿಸಿದೆ. ವಸೂಲಾಗದ ಸಾಲದ (ಎನ್‌ಪಿಎ) ಪ್ರಮಾಣ ಕಡಿಮೆಯಾಗಿರುವುದರಿಂದ ಲಾಭದಲ್ಲಿ ಹೆಚ್ಚಳ ಕಂಡು ಬಂದಿದೆ.
ಡಿಸೆಂಬರ್ ತ್ರೈಮಾಸಿಕದಲ್ಲಿನ ಒಟ್ಟಾರೆ ವರಮಾನವು ಹಿಂದಿನ ವರ್ಷದ ₹ 13,513 ಕೋಟಿಗೆ ಹೋಲಿಸಿದರೆ, ಈ ಬಾರಿ ₹ 14,001 ಕೋಟಿಗೆ ತಲುಪಿದೆ ಎಂದು ಬ್ಯಾಂಕ್‌ ಮುಂಬೈ ಷೇರುಪೇಟೆಗೆ ಮಾಹಿತಿ ನೀಡಿದೆ.
ನಿವ್ವಳ ‘ಎನ್‌ಪಿಎ’ ಒಟ್ಟು ಸಂಪತ್ತಿನ ಶೇ 5.05ರಷ್ಟಾಗಿದೆ. ವರ್ಷದ ಹಿಂದಿನ ಶೇ 6.37ಕ್ಕೆ ಹೋಲಿಸಿದರೆ ಕಡಿಮೆಯಾಗಿದೆ. ಹೀಗಾಗಿ ಭವಿಷ್ಯದ ಅಗತ್ಯಗಳಿಗೆ ತೆಗೆದು ಇರಿಸುವ ಮೊತ್ತವು ವರ್ಷದ ಹಿಂದಿನ ₹ 1,977 ಕೋಟಿಗಳಿಂದ ₹ 1,803 ಕೋಟಿಗೆ ಇಳಿದಿದೆ.
