ಮುಂಬೈ: ವೈಯಕ್ತಿಕವಾಗಿ ₹ 7 ಕೋಟಿಗಿಂತ ಹೆಚ್ಚಿನ ಸಂಪತ್ತು ಹೊಂದಿರುವವರ ಪ್ರಮಾಣವು ದೇಶದಲ್ಲಿ 2021ರಲ್ಲಿ ಶೇಕಡ 11ರಷ್ಟು ಹೆಚ್ಚಳ ಆಗಿದೆ ಎಂದು ಹುರೂನ್ ವರದಿ ಹೇಳಿದೆ.
2021ರ ಅಂತ್ಯದ ವೇಳೆಗೆ ದೇಶದಲ್ಲಿ ₹ 7 ಕೋಟಿಗಿಂತ ಹೆಚ್ಚಿನ ಸಂಪತ್ತು ಹೊಂದಿರುವ ಕುಟುಂಬಗಳ ಸಂಖ್ಯೆಯು 4.58 ಲಕ್ಷಕ್ಕೆ ತಲುಪಿದೆ.
ಆದರೆ, ಇಷ್ಟು ಸಂಪತ್ತು ಹೊಂದಿರುವವರ ಪೈಕಿ, ‘ವೃತ್ತಿ ಬದುಕಿನಲ್ಲಿ ಹಾಗೂ ವೈಯಕ್ತಿಕ ಬದುಕಿನಲ್ಲಿ ಸಂತಸವಾಗಿದ್ದೇವೆ’ ಎಂದು ಹೇಳಿಕೊಳ್ಳುವವರ ಪ್ರಮಾಣವು ಶೇಕಡ 66ಕ್ಕೆ ಇಳಿಕೆಯಾಗಿದೆ. ಈ ಪ್ರಮಾಣವು 2020ರಲ್ಲಿ ಶೇ 72ರಷ್ಟು ಇತ್ತು.
ದೇಶದಲ್ಲಿ ಅಸಮಾನತೆ ಹೆಚ್ಚಾಗುತ್ತಿದೆ ಎಂಬ ಕಳವಳ ಜಾಸ್ತಿ ಆಗುತ್ತಿರುವ ಸಂದರ್ಭದಲ್ಲಿಯೇ ಈ ವರದಿಯು ಪ್ರಕಟವಾಗಿದೆ. 2026ರ ಸುಮಾರಿಗೆ ಇಷ್ಟು ಸಂಪತ್ತು ಹೊಂದಿರುವವರ ಪ್ರಮಾಣವು ಶೇ 30ರಷ್ಟು ಜಾಸ್ತಿ ಆಗಲಿದೆ ಎಂದು ವರದಿಯು ಅಂದಾಜು ಮಾಡಿದೆ.
ಮುಂಬೈನ ಒಟ್ಟು 20,300 ಕುಟುಂಬಗಳು ₹ 7 ಕೋಟಿಗಿಂತ ಹೆಚ್ಚಿನ ಸಂಪತ್ತು ಹೊಂದಿವೆ. ಹುರೂನ್ ಸಮೀಕ್ಷೆಯಲ್ಲಿ ಪಾಲ್ಗೊಂಡಿದ್ದ ಕೋಟ್ಯಧೀಶರ ಪೈಕಿ ಶೇಕಡ 19ರಷ್ಟು ಮಂದಿ ಮಾತ್ರ, ತಾವು ಗಳಿಸಿದ್ದನ್ನು ಸಮಾಜಕ್ಕೆ ದಾನವಾಗಿ ನೀಡುವ ವಿಚಾರದಲ್ಲಿ ನಂಬಿಕೆ ಹೊಂದಿರುವುದಾಗಿ ಹೇಳಿದ್ದಾರೆ.
