ಸೋಮವಾರ, ಅಕ್ಟೋಬರ್ 18, 2021
23 °C

ದೂರಸಂಪರ್ಕ ಪರವಾನಗಿ ನಿಯಮ ಸಡಿಲ

ಪಿಟಿಐ Updated:

ಅಕ್ಷರ ಗಾತ್ರ : | |

Prajavani

ನವದೆಹಲಿ: ದೂರಸಂಪರ್ಕ ಕಂಪನಿಗಳು ಪರವಾನಗಿ ಶುಲ್ಕವನ್ನು ತಡವಾಗಿ ಪಾವತಿಸಿದರೆ ವಿಧಿಸುವ ಬಡ್ಡಿದರವನ್ನು ದೂರಸಂಪರ್ಕ ಇಲಾಖೆಯು ತಗ್ಗಿಸಿದೆ.

ಪರವಾನಗಿ ಶುಲ್ಕಕ್ಕೆ ಸಂಬಂಧಿಸಿದ ನಿಯಮದಲ್ಲಿ ತಿದ್ದುಪಡಿ ತರುವ ಮೂಲಕ ಇಲಾಖೆಯು ಈ ಕ್ರಮ ಕೈಗೊಂಡಿದೆ. ಇದರಿಂದಾಗಿ ದೂರಸಂಪರ್ಕ ವಲಯದ ಮೇಲಿನ ಆರ್ಥಿಕ ಹೊರೆಯು ತುಸು ತಗ್ಗುವ ನಿರೀಕ್ಷೆ ಮಾಡಲಾಗಿದೆ.

ನಿಯಮದಲ್ಲಿ ತಂದಿರುವ ತಿದ್ದುಪಡಿಯ ಪ್ರಕಾರ, ದೂರಸಂಪರ್ಕ ಕಂಪನಿಗಳು ವಿಳಂಬ ಪಾವತಿಗೆ ಎಸ್‌ಬಿಐನ ಒಂದು ವರ್ಷದ ಅವಧಿಯ ಎಂಸಿಎಲ್‌ಆರ್‌ ಮೇಲೆ ಶೇ 2ರಷ್ಟು ಬಡ್ಡಿದರ ಪಾವತಿಸಬೇಕು. ಈ ಮೊದಲು ಬಡ್ಡಿದರವು ಶೇ 4ರಷ್ಟು ಇತ್ತು. ಬಡ್ಡಿದರ ತಿಂಗಳಿಗೆ ಬದಲಾಗಿ ವಾರ್ಷಿಕವಾಗಿ ಲೆಕ್ಕಾಚಾರ ಮಾಡಲಾಗುತ್ತದೆ.

ಇಲಾಖೆಯು ಪರವಾನಗಿ ಷರತ್ತನ್ನು ಕೈಬಿಟ್ಟಿದೆ. ಅದರ ಅಡಿಯಲ್ಲಿ ಪರವಾನಗಿ ಶುಲ್ಕ ಪಡೆಯಲು ಕಂಪನಿಗಳು ಕಡಿಮೆ ಮೊತ್ತ ನೀಡಿದರೆ, ಪಾವತಿ ಮಾಡಬೇಕಿರುವ ಮೊತ್ತದ ಶೇ 50ರಷ್ಟಕ್ಕೆ ಸಮನಾಗಿ ದಂಡ ವಿಧಿಸಲಾಗುತ್ತಿತ್ತು. ಪಾವತಿ ಮಾಡಬೇಕಿರುವ ಒಟ್ಟಾರೆ ಮೊತ್ತದಲ್ಲಿ ಶೇ 10ರಷ್ಟು ಕಡಿಮೆ ಮೊತ್ತ ಪಾವತಿಸಿದರೆ ಅದಕ್ಕೆ ದಂಡ ಕಟ್ಟಬೇಕಿತ್ತು. ಅಕ್ಟೋಬರ್‌ 1ರಿಂದ ಜಾರಿಗೆ ಬರುವಂತೆ ಇದನ್ನು ಕೈಬಿಡಲಾಗಿದೆ.

ಇಲಾಖೆಯ ಈ ನಿರ್ಧಾರದಿಂದ ದೂರಸಂಪರ್ಕ ವಲಯದಲ್ಲಿ ವಹಿವಾಟು ನಡೆಸುವುದು ಸುಲಭವಾಗಲಿದ್ದು, ಆರ್ಥಿಕ ಒತ್ತಡವೂ ಕಡಿಮೆ ಆಗಲಿದೆ ಎಂದು ಸೆಲ್ಯುಲಾರ್‌ ಆಪರೇಟರ್ಸ್‌ ಅಸೋಸಿಯೇಷನ್‌ ಆಫ್‌ ಇಂಡಿಯಾದ (ಸಿಒಎಐ) ಪ್ರಧಾನ ನಿರ್ದೇಶಕ ಎಸ್‌.ಪಿ. ಕೊಚ್ಚಾರ್‌ ಹೇಳಿದ್ದಾರೆ.

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು