ಲಂಡನ್: ಟ್ವಿಟರ್ ಖಾತೆಗಳ ಪೈಕಿ ನಕಲಿ ಖಾತೆಗಳ ಪ್ರಮಾಣವು ಶೇಕಡ 5ಕ್ಕಿಂತ ಕಡಿಮೆ ಎಂಬುದನ್ನು ಕಂಪನಿಯು ಸಾರ್ವಜನಿಕವಾಗಿ, ಆಧಾರ ಸಹಿತ ತೋರಿಸಿಕೊಟ್ಟರೆ ಮಾತ್ರ ಟ್ವಿಟರ್ ಖರೀದಿ ಪ್ರಕ್ರಿಯೆಯು ಮುಂದಕ್ಕೆ ಸಾಗುತ್ತದೆ ಎಂದು ಟೆಸ್ಲಾ ಕಂಪನಿಯ ಸಿಇಒ ಇಲಾನ್ ಮಸ್ಕ್ ಹೇಳಿದ್ದಾರೆ.
ಟ್ವಿಟರ್ನ ಬಳಕೆದಾರರೊಬ್ಬರು ಕೇಳಿದ ಪ್ರಶ್ನೆಗೆ ಪ್ರತಿಯಾಗಿ ಮಸ್ಕ್ ಅವರು ಟ್ವೀಟ್ ಮೂಲಕವೇ ಈ ವಿಚಾರ ತಿಳಿಸಿದ್ದಾರೆ. ‘ನಕಲಿ ಖಾತೆಗಳ ಪ್ರಮಾಣ ಶೇ 5ರಷ್ಟು ಮಾತ್ರ ಎಂಬುದನ್ನು ಸಾಬೀತು ಮಾಡಲು ಟ್ವಿಟರ್ ಸಿಇಒ ಸಾರ್ವಜನಿಕವಾಗಿ ಹಿಂದೇಟು ಹಾಕಿದರು. ಅವರು ಅದನ್ನು ಸಾಬೀತು ಮಾಡದ ಹೊರತು ಒಪ್ಪಂದ ಮುಂದುವರಿಯದು’ ಎಂದು ಮಸ್ಕ್ ಹೇಳಿದ್ದಾರೆ.