ಮುಂಬೈ (ಪಿಟಿಐ): ಪ್ರಸಕ್ತ ಹಣಕಾಸು ವರ್ಷದ ಮೊದಲಾರ್ಧದಲ್ಲಿ ಚಿನ್ನದ ಬಾಂಡ್‌ (ಎಸ್‌ಜಿಬಿ) ನೀಡಿಕೆಯ ವೇಳಾ ಪಟ್ಟಿಯನ್ನು ಆರ್‌ಬಿಐ ಪ್ರಕಟಿಸಿದೆ.
ಜೂನ್‌ನಿಂದ ಸೆಪ್ಟೆಂಬರ್‌ವರೆಗೆ ಪ್ರತಿ ತಿಂಗಳೂ ಬಾಂಡ್‌ಗಳನ್ನು ನೀಡಲಾಗುವುದು. 2019–20ನೇ ಹಣಕಾಸು ವರ್ಷದ ಮೊದಲ ಕಂತು (ಸರಣಿ –1) ಜೂನ್ 3 ಮತ್ತು ‘ಸರಣಿ –2’ ಜುಲೈ 8ರಿಂದ ಖರೀದಿಗೆ ಲಭ್ಯ ಇರಲಿವೆ. ‘ಸರಣಿ–3’ ಮತ್ತು ‘ಸರಣಿ–4’ ಬಾಂಡ್‌ಗಳನ್ನು, ಕ್ರಮವಾಗಿ ಆಗಸ್ಟ್‌ 5 ಮತ್ತು ಸೆಪ್ಟೆಂಬರ್‌ 9ರಿಂದ ನೀಡಲಾಗುವುದು.
ಸ್ಮಾಲ್‌ ಫೈನಾನ್ಸ್‌ ಬ್ಯಾಂಕ್‌ ಮತ್ತು ಪೇಮೆಂಟ್ಸ್‌ ಬ್ಯಾಂಕ್‌ ಹೊರತುಪಡಿಸಿದ ವಾಣಿಜ್ಯ ಬ್ಯಾಂಕ್‌ಗಳು, ಆಯ್ದ ಅಂಚೆ ಕಚೇರಿಗಳು, ಸ್ಟಾಕ್‌ ಹೋಲ್ಡಿಂಗ್‌ ಕಾರ್ಪೊರೇಷನ್‌ ಆಫ್‌ ಇಂಡಿಯಾ, ರಾಷ್ಟ್ರೀಯ ಮತ್ತು ಮುಂಬೈ ಷೇರುಪೇಟೆಗಳಲ್ಲಿ ಈ ಬಾಂಡ್‌ಗಳನ್ನು ಮಾರಾಟ ಮಾಡಲಾಗುವುದು.
ಭೌತಿಕ ರೂಪದ ಚಿನ್ನದ ಬೇಡಿಕೆ ತಗ್ಗಿಸುವ ಉದ್ದೇಶದಿಂದ ಕೇಂದ್ರ ಸರ್ಕಾರ 2015ರ ನವೆಂಬರ್‌ನಲ್ಲಿ ಯೋಜನೆ ಜಾರಿಗೆ ತಂದಿತ್ತು.
