ನವದೆಹಲಿ: ವಿದೇಶಿ ಮಾರುಕಟ್ಟೆಯಲ್ಲಿ ಚಿನ್ನದ ಬೇಡಿಕೆ ಹೆಚ್ಚಳವಾದ ಕಾರಣ ಸೋಮವಾರದಂದು ಚಿನಿವಾರ ಪೇಟೆಯಲ್ಲಿ ಚಿನ್ನದ ಬೆಲೆ ಪ್ರತಿ 10 ಗ್ರಾಂಗೆ ₹1,400ರಷ್ಟು ಹೆಚ್ಚಳವಾಗಿದೆ. ಹೀಗಾಗಿ, 10 ಗ್ರಾಂ ಚಿನ್ನದ ಬೆಲೆ ₹60,100ಕ್ಕೆ ಜಿಗಿದಿದ್ದು, ಇದು ಸಾರ್ವಕಾಲಿಕ ಏರಿಕೆಯಾಗಿದೆ.
ಹಿಂದಿನ ವಹಿವಾಟಿನಲ್ಲಿ ಹಳದಿ ಲೋಹದ ಬೆಲೆ 10ಗ್ರಾಂಗೆ ₹58,700ರಷ್ಟಿತ್ತು.
ಇದಲ್ಲದೇ ಬೆಳ್ಳಿಯೂ ಕೂಡ ₹ 1,860 ರಷ್ಟು ಹೆಚ್ಚಳ ಕಾಣುವುದರ ಮೂಲಕ ಕೆ.ಜಿ.ಗೆ ₹ 69,340ಕ್ಕೆ ತಲುಪಿದೆ.
‘ಜಾಗತಿಕವಾಗಿ ಬ್ಯಾಂಕಿಂಗ್ ಕ್ಷೇತ್ರದ ಬಿಕ್ಕಟ್ಟಿನಿಂದ ಚಿನ್ನ ಸಾರ್ವಕಾಲಿಕ ಏರಿಕೆ ಕಂಡಿದ್ದು, ಈ ವಿದ್ಯಮಾನ ಇನ್ನೂ ಮುಂದುವರಿಯಲಿದೆ. ಇನ್ನೊಂದೆಡೆ ಹಣದುಬ್ಬರದ ವಿರುದ್ಧ ಪರಿಣಾಮಕಾರಿ ಕ್ರಮಗಳನ್ನು ಕೈಗೊಳ್ಳದಿರುವುದು ಹೆಚ್ಚಳಕ್ಕೆ ಕಾರಣ‘ ಎಂಬುದು ಆರ್ಥಿಕ ತಜ್ಞರ ಅಭಿಪ್ರಾಯ.
