ಅನ್ಯ ರಾಜ್ಯದಿಂದ ಬಂಗಾರ ಖರೀದಿ ಸುಲಭ

7
ಚಿನ್ನಾಭರಣ ತಯಾರಿ ಶುಲ್ಕ ಶೇ 5ರಿಂದ 12ಕ್ಕೆ ಏರಿಕೆ; ವ್ಯಾಪಾರ ಕುಸಿತ

ಅನ್ಯ ರಾಜ್ಯದಿಂದ ಬಂಗಾರ ಖರೀದಿ ಸುಲಭ

Published:
Updated:
Deccan Herald

ಹೊಸಪೇಟೆ: ‘ಸರಕು ಮತ್ತು ಸೇವಾ ತೆರಿಗೆ (ಜಿ.ಎಸ್‌.ಟಿ.) ಕಾಯ್ದೆ ಜಾರಿಗೆ ಬಂದ ನಂತರ ದೇಶದಾದ್ಯಂತ ಏಕರೂಪದ ತೆರಿಗೆ ಪದ್ಧತಿ ವ್ಯವಸ್ಥೆ ಅನುಷ್ಠಾನಕ್ಕೆ ಬಂದಿದ್ದು, ಅನ್ಯ ರಾಜ್ಯಗಳಿಂದ ಬಂಗಾರವನ್ನು ಹೆಚ್ಚುವರಿ ತೆರಿಗೆ ಪಾವತಿಸದೆ ಖರೀದಿಸಬಹುದು’

ಇದು ನಗರದ ಮೇನ್‌ ಬಜಾರ್‌ನಲ್ಲಿರುವ ‘ಪಕ್ಸಲ್‌’ ಚಿನ್ನಾಭರಣ ಮಳಿಗೆಯ ಮಾಲೀಕ ವಿಕಾಸ ಅವರ ಮಾತುಗಳಿವು. 

‘ಈ ಹಿಂದೆ ದೇಶದ ವಿವಿಧ ರಾಜ್ಯಗಳಲ್ಲಿ ಚಿನ್ನಾಭರಣಗಳ ಮೇಲೆ ಬೇರೆ ಬೇರೆ ರೀತಿಯ ತೆರಿಗೆ ವಿಧಿಸಲಾಗುತ್ತಿತ್ತು. ಜಿ.ಎಸ್‌.ಟಿ. ಬಂದ ನಂತರ ಅದು ದೂರವಾಗಿದೆ. ಆದರೆ, ಜಿ.ಎಸ್.ಟಿ. ಜಾರಿಗೆ ಬಂದಿರುವುದರಿಂದ ತೆರಿಗೆ ಶೇ 1ರಿಂದ ಶೇ 3ಕ್ಕೆ ಹೆಚ್ಚಿಸಲಾಗಿದೆ’ ಎಂದು ಹೇಳಿದರು.

ಇಲ್ಲಿನ ಮೇನ್‌ ಬಜಾರ್‌ನಲ್ಲಿ 50ಕ್ಕೂ ಹೆಚ್ಚು ಚಿನ್ನಾಭರಣ ಮಳಿಗೆಗಳಿವೆ. ಬಹುತೇಕ ಮಳಿಗೆಗಳ ಮಾಲೀಕರ ಅಭಿಪ್ರಾಯ ಇದೆ ಆಗಿದೆ. ಜಿ.ಎಸ್‌.ಟಿ.ಯಿಂದ ತೆರಿಗೆ ಸ್ವಲ್ಪ ಹೆಚ್ಚಾಗಿದೆ. ತಯಾರಿಕೆ ಶುಲ್ಕ ಭಾರಿ ಕಡಿತಗೊಳಿಸಲಾಗಿದೆ. ಇದರಿಂದ ಗ್ರಾಹಕರಿಗೆ ಅನುಕೂಲವೇ ಹೊರತು ವ್ಯಾಪಾರಿಗಳಿಗೆ ಅಲ್ಲ. ಜಿ.ಎಸ್‌.ಟಿ. ಬಂದ ನಂತರ ವ್ಯಾಪಾರ ಕುಸಿದಿದೆ. ಚೇತರಿಸಿಕೊಳ್ಳಲು ಇನ್ನು ಕೆಲವು ವರ್ಷಗಳೇ ಬೇಕಾಗಬಹುದು ಎನ್ನುತ್ತಾರೆ ವ್ಯಾಪಾರಿಗಳು.

‘ಚಿನ್ನಾಭರಣಗಳ ಮೇಲೆ ಎಲ್ಲ ರಾಜ್ಯಗಳಲ್ಲಿ ಒಂದೇ ರೀತಿಯ ತೆರಿಗೆ ಇರುವುದರಿಂದ ಯಾರು ಎಲ್ಲಿ ಬೇಕಾದರೂ ಖರೀದಿಸಬಹುದು. ಈ ಹಿಂದೆ ವ್ಯಾಪಾರಿಗಳು ತೆರಿಗೆ ಕಡಿಮೆಯಿದ್ದ ರಾಜ್ಯಗಳಲ್ಲಿ ಖರೀದಿಸಿ, ಅವರ ರಾಜ್ಯದಲ್ಲಿ ಮಾರಾಟ ಮಾಡಿ ಲಾಭ ಗಳಿಸುತ್ತಿದ್ದರು. ಈಗ ಅದಕ್ಕೆ ಅವಕಾಶವಿಲ್ಲ. ಗ್ರಾಹಕರು ಕೂಡ ದೇಶದ ಯಾವುದೇ ಭಾಗವಿರಲಿ ಒಂದೇ ರೀತಿಯ ದರಕ್ಕೆ ಚಿನ್ನಾಭರಣ ಖರೀದಿಸಬಹುದು’ ಎನ್ನುತ್ತಾರೆ ವಿಕಾಸ.

‘ಈ ಹಿಂದೆ ರಾಜ್ಯ ಹಾಗೂ ಕೇಂದ್ರ ಸರ್ಕಾರಕ್ಕೆ ಪ್ರತ್ಯೇಕ ತೆರಿಗೆ ಕಟ್ಟಬೇಕಾಗುತ್ತಿತ್ತು. ಈಗ ಆ ಗೊಡವೆ ದೂರವಾಗಿದೆ. ಆದರೆ, ಈಗ ಪ್ರತಿ ಮೂರು ತಿಂಗಳಿಗೊಮ್ಮೆ ವಹಿವಾಟಿನ ವಿವರ ಕೊಡಬೇಕಿದೆ’ ಎನ್ನುತ್ತಾರೆ ಚಿನ್ನದ ವ್ಯಾಪಾರಿ ಪ್ರದೀಪ್‌ಲಾಲ್‌ ಜೈನ್‌.

 

 

 

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !