ನವದೆಹಲಿ: ಸರಕು ಮತ್ತು ಸೇವಾ ತೆರಿಗೆ (ಜಿಎಸ್ಟಿ) ವ್ಯವಸ್ಥೆಯ ಮೂಲಕ ಆಗಸ್ಟ್ ತಿಂಗಳಲ್ಲಿ ಸಂಗ್ರಹವಾದ ಒಟ್ಟು ಮೊತ್ತ ₹ 86,449 ಕೋಟಿ ಎಂದು ಕೇಂದ್ರ ಹಣಕಾಸು ಸಚಿವಾಲಯ ಹೇಳಿದೆ. ಜುಲೈ ತಿಂಗಳಿನಲ್ಲಿ ₹ 87,422 ಕೋಟಿ ಸಂಗ್ರಹ ಆಗಿತ್ತು.
ಕಳೆದ ವರ್ಷದ ಆಗಸ್ಟ್ ತಿಂಗಳಿಗೆ ಹೋಲಿಸಿದರೆ ಈ ವರ್ಷದ ಆಗಸ್ಟ್ನಲ್ಲಿ ಸಂಗ್ರಹವಾಗಿರುವ ಜಿಎಸ್ಟಿ ಮೊತ್ತವು ಶೇಕಡ 88ರಷ್ಟು ಮಾತ್ರ ಎಂದು ಸಚಿವಾಲಯ ತಿಳಿಸಿದೆ. 2019ರ ಆಗಸ್ಟ್ನಲ್ಲಿ ಒಟ್ಟು ₹ 98,202 ಕೋಟಿ ಸಂಗ್ರಹವಾಗಿತ್ತು.
ಆಗಸ್ಟ್ನಲ್ಲಿ ಸಂಗ್ರಹವಾಗಿರುವ ಒಟ್ಟು ಮೊತ್ತದಲ್ಲಿ ಕೇಂದ್ರ ಜಿಎಸ್ಟಿ ಪಾಲು ₹ 15,906 ಕೋಟಿ, ರಾಜ್ಯ ಜಿಎಸ್ಟಿ ಪಾಲು ₹ 21,064 ಕೋಟಿ, ಏಕೀಕೃತ ಜಿಎಸ್ಟಿ ಪಾಲು 42,264 ಕೋಟಿ (ಇದರಲ್ಲಿ ₹ 19,179 ಕೋಟಿ ಆಮದು ವಸ್ತುಗಳಿಂದ ಸಂಗ್ರಹವಾಗಿದೆ) ಮತ್ತು ಸೆಸ್ನ ಪಾಲು ₹ 7,215 ಕೋಟಿ.