ನವದೆಹಲಿ: 2021ರ ಫೆಬ್ರುವರಿಯಲ್ಲಿ ₹ 1.13 ಲಕ್ಷ ಕೋಟಿ ಜಿಎಸ್ಟಿ ಸಂಗ್ರಹ ಆಗಿದೆ. 2020ರ ಫೆಬ್ರುವರಿಯಲ್ಲಿ ಸಂಗ್ರಹವಾಗಿದ್ದ ಮೊತ್ತಕ್ಕೆ ಹೋಲಿಸಿದರೆ ಶೇ 7ರಷ್ಟು ಏರಿಕೆ ಕಂಡುಬಂದಿದೆ.
ಜಿಎಸ್ಟಿ ಸಂಗ್ರಹವು ಸತತ ಐದನೇ ತಿಂಗಳಿನಲ್ಲಿಯೂ ₹ 1 ಲಕ್ಷ ಕೋಟಿಯನ್ನು ದಾಟಿದೆ. ಜಿಎಸ್ಟಿ ಸಂಗ್ರಹವು ಆರ್ಥಿಕ ಚೇತರಿಕೆಯ ಸೂಚನೆಯನ್ನು ನೀಡುತ್ತಿದೆ ಎಂದು ಕೇಂದ್ರ ಹಣಕಾಸು ಸಚಿವಾಲಯ ತಿಳಿಸಿದೆ.
ಜನವರಿಯಲ್ಲಿ ಸಂಗ್ರಹವಾಗಿದ್ದ ₹ 1.19 ಲಕ್ಷ ಕೋಟಿಗೆ ಹೋಲಿಸಿದರೆ ಫೆಬ್ರುವರಿಯಲ್ಲಿ ಆಗಿರುವ ತೆರಿಗೆ ಸಂಗ್ರಹ ಕಡಿಮೆ ಇದೆ.
ಫೆಬ್ರುವರಿಯಲ್ಲಿ ಸಂಗ್ರಹ ಆಗಿರುವ ಒಟ್ಟಾರೆ ತೆರಿಗೆಯಲ್ಲಿ ಸಿಜಿಎಸ್ಟಿ ₹ 21,092 ಕೋಟಿ, ಎಸ್ಜಿಎಸ್ಟಿ ₹ 27,273 ಕೋಟಿ, ಐಜಿಎಸ್ಟಿ ₹ 55,253 ಕೋಟಿ ಹಾಗೂ ಸೆಸ್ ₹ 9,525 ಕೋಟಿ ಇದೆ.