ನವದೆಹಲಿ: ಪ್ರಸಕ್ತ ಹಣಕಾಸು ವರ್ಷದ 10 ತಿಂಗಳ ಅವಧಿಯಲ್ಲಿ ದೇಶಿ ಕಂಪನಿಗಳು ₹ 4.57 ಲಕ್ಷ ಕೋಟಿ ಬಂಡವಾಳ ಸಂಗ್ರಹಿಸಿವೆ.
ಸಂಸ್ಥೆಯ ಷೇರುಗಳನ್ನು ಸೀಮಿತ ಸಂಖ್ಯೆಯ ಅರ್ಹ ಹೂಡಿಕೆದಾರರಿಗೆ (ಸಾಲದಾತರಿಗೆ) ಮಾತ್ರ ಮಾರಾಟ ಮಾಡಿ ಈ ಮೊತ್ತದ ಬಂಡವಾಳ ಸಂಗ್ರಹಿಸಲಾಗಿದೆ.
2018–19ರಲ್ಲಿ ಏಪ್ರಿಲ್‌ನಿಂದ ಜನವರಿವರೆಗಿನ ಅವಧಿಯಲ್ಲಿ ಕಾರ್ಪೊರೇಟ್‌ ಬಾಂಡ್‌ಗಳ ಖಾಸಗಿ ಮಾರಾಟದಿಂದ ಈ ಮೊತ್ತ ಸಂಗ್ರಹಿಸಲಾಗಿದೆ. ಹಿಂದಿನ ಹಣಕಾಸು ವರ್ಷದಲ್ಲಿನ (2017–18) ಇದೇ ಅವಧಿಯಲ್ಲಿ ಈ ಮೊತ್ತ₹ 4,87,764 ಕೋಟಿಗಳಷ್ಟಿತ್ತು.
ಒಂದು ವರ್ಷದಲ್ಲಿ ₹ 6 ಲಕ್ಷ ಕೋಟಿಗಳನ್ನು ಈ ವಿಧಾನದ ಮೂಲಕ ಸಂಗ್ರಹಿಸಲಾಗಿತ್ತು ಎಂದು ಸೆಬಿ ಮಾಹಿತಿ ನೀಡಿದೆ. ವಹಿವಾಟು ವಿಸ್ತರಣೆ ಮತ್ತು ದುಡಿಯುವ ಬಂಡವಾಳದ ಅಗತ್ಯ ಪೂರೈಸಿಕೊಳ್ಳಲು ಈ ಪ್ರಮಾಣದ ಬಂಡವಾಳ ಸಂಗ್ರಹಿಸಲಾಗಿದೆ.
ಎಫ್‌ಪಿಐ ಹೂಡಿಕೆ ಮಿತಿ ಸಡಿಲಿಕೆ ಕಾರ್ಪೊರೇಟ್‌ ಬಾಂಡ್‌ಗಳಲ್ಲಿ ವಿದೇಶಿ ಹೂಡಿಕೆದಾರರಿಗೆ (ಎಫ್‌ಪಿಐ) ವಿಧಿಸಲಾಗಿದ್ದ ಶೇ 20ರಷ್ಟು ಹೂಡಿಕೆ ಮಿತಿಯನ್ನು ಭಾರತೀಯ ರಿಸರ್ವ್‌ ಬ್ಯಾಂಕ್‌ ರದ್ದುಗೊಳಿಸಿದೆ.
ವಿದೇಶಿ ಹೂಡಿಕೆ ಹೆಚ್ಚಿಸುವ ಉದ್ದೇಶದಿಂದ ತಕ್ಷಣದಿಂದಲೇ ಜಾರಿಗೆ ಬರುವಂತೆ ಈ ಕ್ರಮ ಕೈಗೊಳ್ಳಲಾಗಿದೆ.
