Union Budget| ಹೂಡಿಕೆ ಹಿಂತೆಗೆತ ಗುರಿ ಕಡಿತ ಸಾಧ್ಯತೆ

‘2022–23ರಲ್ಲಿ ಹೂಡಿಕೆ ಹಿಂತೆಗೆತದಿಂದ ಬಂದ ಮೊತ್ತ ₹ 35 ಸಾವಿರ ಕೋಟಿ ಎಂಬುದು ನಮ್ಮ ಅಂದಾಜು. 2023–24ನೆಯ ಸಾಲಿನಲ್ಲಿ ಹೂಡಿಕೆ ಹಿಂತೆಗೆತದಿಂದ ₹ 50 ಸಾವಿರ ಕೋಟಿ ವರಮಾನ ಸಂಗ್ರಹವಾಗಬಹುದು’ ಎಂದು ಕೋಟಕ್‌ ಇನ್‌ಸ್ಟಿಟ್ಯೂಷನಲ್ ಸೆಕ್ಯುರಿಟೀಸ್‌ ಹೇಳಿದೆ. 2022–23ರಲ್ಲಿ ಹೂಡಿಕೆ ಹಿಂತೆಗೆತದಿಂದ ಒಟ್ಟು ₹ 65 ಸಾವಿರ ಕೋಟಿ ಸಂಗ್ರಹಿಸುವ ಗುರಿಯನ್ನು ಕೇಂದ್ರ ಹೊಂದಿದೆ.

ಭಾರತೀಯ ಜೀವ ವಿಮಾ ನಿಗಮ, ಶಿಪ್ಪಿಂಗ್ ಕಾರ್ಪೊರೇಷನ್ ಆಫ್ ಇಂಡಿಯಾ ಹಾಗೂ ಇತರ ಕೆಲವು ಕಂಪನಿಗಳ ಷೇರುಗಳನ್ನು ಇನ್ನಷ್ಟು ಮಾರಾಟ ಮಾಡುವ ಮೂಲಕ ಕೇಂದ್ರ ಸರ್ಕಾರವು ವರಮಾನ ಸಂಗ್ರಹಿಸಬಹುದು ಎಂದು ಈ ಸಂಸ್ಥೆ ಭಾವಿಸಿದೆ.

2023–24ರಲ್ಲಿ ಬಂಡವಾಳ ಹಿಂತೆಗೆತದ ಮೂಲಕ ₹ 50 ಸಾವಿರ ಕೋಟಿ ಮಾತ್ರ ಸಂಗ್ರಹಿಸುವ ಗುರಿಯನ್ನು ಸರ್ಕಾರ ಹೊಂದಬಹುದು ಎಂದು ನೊಮುರ ಕೂಡ ಅಂದಾಜಿಸಿದೆ. ‘ಹೂಡಿಕೆ ಹಿಂತೆಗೆತ ಹಾಗೂ ಖಾಸಗೀಕರಣದ ಪ್ರಕ್ರಿಯೆಯು ವಿಳಂಬವಾಗುವುದು ಮುಂದುವರಿದಿದೆ’ ಎಂದು ಮಾರ್ಗನ್‌ ಸ್ಟ್ಯಾನ್ಲಿ ಹೇಳಿದೆ.

ಹೂಡಿಕೆ ಹಿಂತೆಗೆತದ ಗುರಿಯನ್ನು ಕೇಂದ್ರ ಸರ್ಕಾರವು ಈ ಹಿಂದೆ 32 ಸಂದರ್ಭಗಳ ಪೈಕಿ ಎಂಟು ಬಾರಿ ಮಾತ್ರ ತಲುಪಿದೆ ಎಂದು ‘ಬ್ಯಾಂಕ್‌ ಆಫ್ ಬರೋಡ’ದ ಅರ್ಥಶಾಸ್ತ್ರಜ್ಞರು ಹೇಳಿದ್ದಾರೆ.

‘ಮಾರುಕಟ್ಟೆಗಳಿಗೆ ಸ್ಪಷ್ಟ ಚಿತ್ರಣ ಸಿಗಬೇಕು ಎಂದಾದರೆ ಹೂಡಿಕೆ ಹಿಂತೆಗೆತದ ಕುರಿತು ಸ್ಪಷ್ಟತೆ ಬೇಕು’ ಎಂದು ಅವರು ಹೇಳಿದ್ದಾರೆ. ಕೇಂದ್ರವು ಈ ಬಾರಿ ₹ 40 ಸಾವಿರ ಕೋಟಿಯಿಂದ ₹ 50 ಸಾವಿರ ಕೋಟಿವರೆಗೆ ವರಮಾನವನ್ನು ಹೂಡಿಕೆ ಹಿಂತೆಗೆತದ ಮೂಲಕ ಸಂಗ್ರಹಿಸುವ ಗುರಿ ಹೊಂದಬಹುದು ಎಂದು ಅವರು ಅಂದಾಜಿಸಿದ್ದಾರೆ.