ರಿಯಲ್‌ ಎಸ್ಟೇಟ್‌ ಬಂಡವಾಳ ಹೂಡಿಕೆ ₹ 43,780 ಕೋಟಿ

ವಿದೇಶಗಳಿಂದ ಗರಿಷ್ಠ ಪ್ರಮಾಣದಲ್ಲಿ ಬಂಡವಾಳ ಹೂಡಿಕೆಯಾಗಿರುವುದರಿಂದ ಈ ಹೆಚ್ಚಳ ಕಂಡುಬಂದಿದೆ ಎಂದು ಜಾಗತಿಕ ಆಸ್ತಿ ಸಲಹಾ ಸಂಸ್ಥೆ ಕೊಲಿಯರ್ಸ್‌ ತಿಳಿಸಿದೆ.

2018ಕ್ಕೆ ಹೋಲಿಸಿದರೆ 2019ರಲ್ಲಿ ಹೂಡಿಕೆ ಪ್ರಮಾಣವು ಶೇ 8.7ರಷ್ಟು ಹೆಚ್ಚಳ ದಾಖಲಿಸಿದೆ. ವಸತಿ ನಿರ್ಮಾಣ ಕ್ಷೇತ್ರದಲ್ಲಿ ಈ ವರ್ಷ ಹೂಡಿಕೆಯಾಗಿರುವ ಒಟ್ಟಾರೆ ಬಂಡವಾಳದಲ್ಲಿ ವಿದೇಶಿ ನಿಧಿಗಳ ಪಾಲು ಶೇ 78ರಷ್ಟಿದೆ.

ಕಚೇರಿಗಳ ನಿರ್ಮಾಣ ಕ್ಷೇತ್ರವು ಶೇ 46ರಷ್ಟು ಹೂಡಿಕೆ ಆಕರ್ಷಿಸಿದೆ. ಈ ವಲಯದಲ್ಲಿನ ಹೂಡಿಕೆ ಮೊತ್ತವು ₹ 20 ಸಾವಿರ ಕೋಟಿಗಳಷ್ಟಿದೆ.

ಮುಂಬೈ, ದೆಹಲಿ ಎನ್‌ಸಿಆರ್‌ ಜತೆಗೆ ಬೆಂಗಳೂರು ಕೂಡ ಅತ್ಯಂತ ಆಕರ್ಷಕ ಹೂಡಿಕೆ ಮಾರುಕಟ್ಟೆಯಾಗಿ ನಿರಂತರವಾಗಿ ಗಮನ ಸೆಳೆಯುತ್ತಿದೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

2020ರಲ್ಲಿ ₹ 46,170 ಕೋಟಿ ಮೊತ್ತದ ಬಂಡವಾಳದ ಒಳ ಹರಿವು ಇರಲಿದೆ ಎಂದು ಕೊಲಿಯರ್ಸ್‌ ಅಂದಾಜಿಸಿದೆ.