ಸೋಮವಾರ, ಜೂಲೈ 6, 2020
28 °C
ಶೇ 19.90ರಷ್ಟು ಷೇರುಗಳನ್ನು ಮಾರಿದ ಆರ್‌ಐಎಲ್‌

₹92,202 ಕೋಟಿ ಬಂಡವಾಳ ಆಕರ್ಷಿಸಿದ ಜಿಯೊ ಪ್ಲಾಟ್‌ಫಾರ್ಮ್ಸ್‌

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಮುಂಬೈ: ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್‌ನ (ಆರ್‌ಐಎಲ್‌) ಅಂಗಸಂಸ್ಥೆಯಾಗಿರುವ ಜಿಯೋ ಪ್ಲಾಟ್‌ಫಾರ್ಮ್ಸ್ ಆರು ವಾರಗಳಿಗಿಂತಲೂ ಕಡಿಮೆ ಅವಧಿಯಲ್ಲಿ ವಿವಿಧ ಹೂಡಿಕೆದಾರರಿಂದ ಒಟ್ಟಾರೆ ₹ 92,202.15 ಕೋಟಿ ಬಂಡವಾಳ ಆಕರ್ಷಿಸಿದೆ.

ಕೋವಿಡ್‌–19 ಬಿಕ್ಕಟ್ಟಿನಲ್ಲಿಯೂ ಈ ಪ್ರಮಾಣದ ಹೂಡಿಕೆ ಆಗುತ್ತಿರುವುದಕ್ಕೆ ಕಂಪನಿಯ‌ ಬಗೆಗೆ ಹೂಡಿಕೆದಾರರು ಹೊಂದಿರುವ ವಿಶ್ವಾಸವೇ ಕಾರಣ ಎಂದು ಹೇಳಿದೆ.

ಜಿಯೊ ಪ್ಲಾಟ್‌ಫಾರ್ಮ್ಸ್‌ನಲ್ಲಿನ ಷೇರುಗಳನ್ನು ಮಾರಾಟ ಮಾಡುವ ಮೂಲಕ ಶುಕ್ರವಾರ ಒಂದೇ ದಿನ ಅಬುಧಾಬಿಯ ಮುಬಾದಲಾ ಕಂಪನಿ ಮತ್ತು ಸಿಲ್ವರ್‌ ಲೇಕ್‌ನಿಂದ ಒಟ್ಟಾರೆಯಾಗಿ ₹ 13,460 ಕೋಟಿ ಹೂಡಿಕೆಯನ್ನು ಪಡೆದುಕೊಳ್ಳಲಾಗಿದೆ. ಸಿಲ್ವರ್‌ ಲೇಕ್‌ ಮೇ 3ರಂದು ಶೇ 1.15ರಷ್ಟು ಷೇರು ಖರೀದಿಸಿತ್ತು. ಜೂನ್‌ 5ರಂದು ಮತ್ತೆ ಹೆಚ್ಚುವರಿಯಾಗಿ ಶೇ 0.93ರಷ್ಟು ಷೇರುಗಳನ್ನು ಖರೀದಿಸಿದೆ  ಎಂದು ಆರ್‌ಐಎಲ್‌‌ ಮಾಹಿತಿ ನೀಡಿದೆ.

ಈ ಹೂಡಿಕೆಗಳಿಂದ ಕಂಪನಿಯು ತನ್ನ ಉದ್ದೇಶಿತ ಶೇ 19.90ರಷ್ಟು ಷೇರುಗಳನ್ನು ಮಾರಾಟ ಮಾಡಿದಂತಾಗಿದ್ದು, ಇದರಿಂದ ಷೇರುಪೇಟೆಯಲ್ಲಿ ಸಾರ್ವಜನಿಕರಿಗೆ ಷೇರು ಮಾರಾಟ (ಐಪಿಒ) ಮಾಡುವ ಪ್ರಕ್ರಿಯೆಗೆ ಅನುಕೂಲ ಆಗಲಿದೆ.

‘ಭಾರತದ ಡಿಜಿಟಲ್ ಇಕೊಸಿಸ್ಟಂನ ಬೆಳವಣಿಗೆ ಹಾಗೂ ರೂಪಾಂತರವನ್ನು ಮುಂದುವರಿಸುವಲ್ಲಿ ಸಿಲ್ವರ್ ಲೇಕ್ ಹಾಗೂ ಅದರ ಸಹ ಹೂಡಿಕೆದಾರರು ನಮ್ಮ ಮೌಲ್ಯಯುತ ಪಾಲುದಾರರಾಗಿದ್ದಾರೆ. ನಾವು ಭಾರತೀಯ ಡಿಜಿಟಲ್ ಸಮಾಜದ ರೂಪಾಂತರಕ್ಕೆ ಚಾಲನೆ ನೀಡುತ್ತಿರುವಾಗ ಅವರು ತೋರಿಸಿರುವ ವಿಶ್ವಾಸ ಮತ್ತು ಬೆಂಬಲ ಸಂತೋಷ ತಂದಿದೆ. ಜಾಗತಿಕ ತಂತ್ರಜ್ಞಾನ ಹೂಡಿಕೆಯಲ್ಲಿ ಅವರ ನಾಯಕತ್ವದ ಲಾಭ ಮತ್ತು ಮೌಲ್ಯಯುತ ಸಂಬಂಧಗಳ ಜಾಲದ ಪ್ರಯೋಜನವನ್ನು ಪಡೆದುಕೊಳ್ಳಲು ನಮಗೆ ಅನುಕೂಲವಾಗಲಿದೆ’ ಎಂದು ಆರ್‌ಐಎಲ್‌ನ ಅಧ್ಯಕ್ಷ ಮುಕೇಶ್‌ ಅಂಬಾನಿ ಪ್ರತಿಕ್ರಿಯಿಸಿದ್ದಾರೆ. 

'ಉನ್ನತ ಗುಣಮಟ್ಟ ಹಾಗೂ ಕಡಿಮೆ ವೆಚ್ಚದ ಡಿಜಿಟಲ್ ಸೇವೆಗಳನ್ನು ಸಾಮಾನ್ಯ ಗ್ರಾಹಕರಿಗೆ ಹಾಗೂ ಸಣ್ಣ ಉದ್ಯಮಗಳಿಗೆ ತಲುಪಿಸುವ ಧ್ಯೇಯವನ್ನು ಜಿಯೋ ಪ್ಲಾಟ್‌ಫಾರ್ಮ್ಸ್‌ ಹೊಂದಿದೆ. ಹೀಗಾಗಿ ನಮ್ಮ ಬೆಂಬಲವನ್ನು ಮುಂದುವರಿಸುವ ಉದ್ದೇಶದಿಂದ ನಮ್ಮ ಸಹ-ಹೂಡಿಕೆದಾರರನ್ನು ಈ ಅವಕಾಶದಲ್ಲಿ ಪಾಲ್ಗೊಳ್ಳುವಂತೆ ಮಾಡಲು ನಾವು ಉತ್ಸುಕರಾಗಿದ್ದೇವೆ. ಜಿಯೋ ಮೇಲಿನ ಹೂಡಿಕೆಯ ರಭಸವು ಅದರ ಸದೃಢ ವ್ಯವಹಾರ ಮಾದರಿಯನ್ನು ಪ್ರಕಟಪಡಿಸುತ್ತದೆ’ ಎಂದು ಸಿಲ್ವರ್ ಲೇಕ್ ಜಂಟಿನ ಸಿಇಒ ಈಗಾನ್ ಡರ್ಬನ್ ಹೇಳಿದ್ದಾರೆ.

ಕಂಪನಿಗಳ ಹೂಡಿಕೆ ಮೊತ್ತ (ಕೋಟಿಗಳಲ್ಲಿ)

ಫೇಸ್‌ಬುಕ್‌: ₹ 43,574.62

ವಿಸ್ಟಾ‌: ₹11,367

ಕೆಕೆಆರ್: ₹11,367

ಸಿಲ್ವರ್‌ ಲೇಕ್‌: ₹10,202.55

ಮುಬಾದಲಾ: ₹9,093.60

ಜನರಲ್‌ ಅಟ್ಲಾಂಟಿಕ್‌: ₹6,598.38

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು