ನವದೆಹಲಿ: ಭಾರತೀಯ ಜೀವ ವಿಮಾ ನಿಗಮದ (ಎಲ್ಐಸಿ) ಷೇರುಗಳ ಮೌಲ್ಯ ಸೋಮವಾರ ಶೇಕಡ 3ರವರೆಗೂ ಇಳಿಕೆ ಆಗಿದೆ. ಇದರಿಂದಾಗಿ ಕಂಪನಿಯ ಮಾರುಕಟ್ಟೆ ಬಂಡವಾಳ ಮೌಲ್ಯ ₹ 5 ಲಕ್ಷ ಕೋಟಿಗಿಂತ ಕೆಳಕ್ಕೆ ಬಂದಿದೆ.
ಐದು ದಿನಗಳಿಂದಲೂ ಷೇರು ಮೌಲ್ಯ ಇಳಿಕೆ ಕಾಣುತ್ತಿದ್ದು, ಈ ಅವಧಿಯಲ್ಲಿ ಒಟ್ಟಾರೆ ಶೇ 7.12ರಷ್ಟು ಇಳಿಕೆ ಕಂಡಿದೆ. ಐಪಿಒ ವೇಳೆ ₹ 949ಕ್ಕೆ ಎಲ್ಐಸಿ ಷೇರು ಖರೀದಿ ಮಾಡಿದ್ದವರು ಈಗ ಶೇಕಡ 18ರಷ್ಟು ನಷ್ಟ ಕಂಡಿದ್ದಾರೆ.
ಬಿಎಸ್ಇನಲ್ಲಿ ಕಂಪನಿ ಷೇರು ಮೌಲ್ಯ ಸೋಮವಾರ ಶೇ 2.86ರಷ್ಟು ಇಳಿಕೆ ಆಗಿದ್ದು, ಪ್ರತಿ ಷೇರಿನ ಬೆಲೆ ₹ 777.40ಕ್ಕೆ ತಲುಪಿದೆ. ಎನ್ಎಸ್ಇನಲ್ಲಿ ಶೇ 2.96ರಷ್ಟು ಕಡಿಮೆ ಆಗಿ ಪ್ರತಿ ಷೇರಿನ ಬೆಲೆ ₹ 776.50ಕ್ಕೆ ಇಳಿಕೆ ಆಗಿದೆ.
ದಿನದ ವಹಿವಾಟಿನ ಅಂತ್ಯದ ವೇಳೆಗೆ ಕಂಪನಿಯ ಮಾರುಕಟ್ಟೆ ಮೌಲ್ಯವು ₹ 4,91,705 ಕೋಟಿಗೆ ತಲುಪಿದೆ.