ನವದೆಹಲಿ (ಪಿಟಿಐ): ಮುಕೇಶ್‌ ಅಂಬಾನಿ ಅವರನ್ನು ರಿಲಯನ್ಸ್ ಇಂಡಸ್ಟ್ರೀಸ್‌ನ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಹುದ್ದೆಯಲ್ಲಿ ಮತ್ತೊಂದು ಅವಧಿಗೆ ಮುಂದುವರಿಸಲು ಷೇರುದಾರರು ಒಪ್ಪಿಗೆ ನೀಡಿದ್ದಾರೆ.
ಅಂಬಾನಿ ಅವರ ಸದ್ಯದ ಅಧಿಕಾರಾವಧಿ 2019ರ ಏಪ್ರಿಲ್ 19ರಂದು ಅಂತ್ಯವಾಗಲಿದೆ.ಜುಲೈ 5 ರಂದು ನಡೆದಿದ್ದ ವಾರ್ಷಿಕ ಸಭೆಯಲ್ಲಿ ಐದು ವರ್ಷಗಳ ಅವಧಿಗೆ ಮರು ನೇಮಕ ಮಾಡಲು ವಿಶೇಷ ಗೊತ್ತುವಳಿ ಮಂಡಿಸಲಾಗಿತ್ತು. 616.45 ಕೋಟಿ ಷೇರುದಾರರಲ್ಲಿ 508.18 ಕೋಟಿ ಷೇರುದಾರರು ಅಂಬಾನಿ ಅವರ ಪರವಾಗಿ ಮತ ಚಲಾಯಿಸಿದ್ದಾರೆ ಎಂದು ಕಂಪನಿಯು ಷೇರುಪೇಟೆಗೆ ಮಾಹಿತಿ ನೀಡಿದೆ.
ಮರು ನೇಮಕವಾದ ಬಳಿಕ ₹ 4.17 ಕೋಟಿವಾರ್ಷಿಕ ವೇತನ ಹಾಗೂ₹ 59 ಲಕ್ಷ ಮೊತ್ತದ ಇತರೆ ಭತ್ಯೆಗಳನ್ನು ಪಡೆಯಲಿದ್ದಾರೆ.
ರಿಲಯನ್ಸ್ ಇಂಡಸ್ಟ್ರೀಸ್‌ ಲಿಮಿಟೆಡ್‌ನ ಆಡಳಿತ ಮಂಡಳಿಯಲ್ಲಿದ್ದ ಮುಕೇಶ್‌ ಅವರು, ತಂದೆ ಧೀರೂಭಾಯಿ ಅಂಬಾನಿ ಅವರ ಮರಣದ ನಂತರ 2002ರ ಜುಲೈನಲ್ಲಿ ಅಧ್ಯಕ್ಷ ಹುದ್ದೆಗೇರಿದರು.
2018–19ರಲ್ಲಿಪರಿವರ್ತಿಸಲಾಗದ ಸಾಲಪತ್ರಗಳ (ಎನ್‌ಸಿಡಿ) ವಿತರಣೆ ಮೂಲಕ ₹ 20 ಸಾವಿರ ಕೋಟಿ ಸಂಗ್ರಹಿಸಲು ಸಹ ಷೇರುದಾರರು ಒಪ್ಪಿಗೆ ನೀಡಿದ್ದಾರೆ.
