ರಷ್ಯಾದಿಂದ ತೈಲ ಆಮದು ದಾಖಲೆ ಮಟ್ಟಕ್ಕೆ ಏರಿಕೆ

ಭಾರತಕ್ಕೆ ಹೆಚ್ಚಿನ ಪ್ರಮಾಣದಲ್ಲಿ ಕಚ್ಚಾ ತೈಲ ಪೂರೈಸುವ ದೇಶಗಳ ಸಾಲಿನಲ್ಲಿ ರಷ್ಯಾ ಸತತ ಐದನೇ ತಿಂಗಳಿನಲ್ಲಿಯೂ ಮೊದಲ ಸ್ಥಾನದಲ್ಲಿದೆ. ಭಾರತವು ಆಮದು ಮಾಡಿಕೊಳ್ಳುತ್ತಿರುವ ತೈಲದ ಮೂರನೇ ಒಂದರಷ್ಟು ಪಾಲನ್ನು ರಷ್ಯಾ ನೀಡುತ್ತಿದೆ.

2022ರ ಫೆಬ್ರುವರಿಯಲ್ಲಿ ರಷ್ಯಾ–ಉಕ್ರೇನ್‌ ಸಂಘರ್ಷ ಆರಂಭ ಆಗುವುದಕ್ಕೂ ಮೊದಲು ಭಾರತವು ಮಾಡಿಕೊಳ್ಳುತ್ತಿದ್ದ ಒಟ್ಟಾರೆ ತೈಲ ಆಮದಿನಲ್ಲಿ ರಷ್ಯಾದ ಪಾಲು ಶೇ 1ಕ್ಕಿಂತ ಕಡಿಮೆ ಇತ್ತು. ಆದರೆ ಈಗ ಶೇಕಡ 35ಕ್ಕೆ ಏರಿಕೆ ಕಂಡಿದೆ. ರಷ್ಯಾವು ರಿಯಾಯಿತಿ ದರದಲ್ಲಿ ಭಾರತಕ್ಕೆ ತೈಲ ಪೂರೈಕೆ ಮಾಡುತ್ತಿದೆ.

ಸೌದಿ ಅರೇಬಿಯಾದಿಂದ ಆಮದಾಗುವ ತೈಲದ ಪ್ರಮಾಣ ಶೇ 16ರಷ್ಟು ಮತ್ತು ಅಮೆರಿಕದಿಂದ ಪೂರೈಕೆ ಆಗುವ ತೈಲದ ಪ್ರಮಾಣ ಶೇ 38ರಷ್ಟು ಕಡಿಮೆ ಆಗಿದೆ.