ಮಾಸಿದ ನೋಟು ವಿನಿಮಯ ಅವಕಾಶ

ಮುಂಬೈ: ಮಾಸಿದ ₹2000 ಹಾಗೂ ₹200 ಮಖಬೆಲೆಯ ನೋಟುಗಳ ಬದಲಾವಣೆಗೆ ಅವಕಾಶ ಕಲ್ಪಿಸುವ ‘ನೋಟು ವಿನಿಮಯ ನಿಯಮ 2009’ಕ್ಕೆ ಭಾರತೀಯ ರಿಸರ್ವ್‌ ಬ್ಯಾಂಕ್‌ (ಆರ್‌ಬಿಐ) ತಿದ್ದುಪಡಿ ತಂದಿದೆ.

ಹರಿದ, ಮಾಸಿದ, ಶಾಯಿ ಮತ್ತು ಎಣ್ಣೆಯ ಕಲೆ ಇರುವ, ಈ ಮಖಬೆಲೆಯ ನೋಟುಗಳನ್ನು ಎಲ್ಲ ಬ್ಯಾಂಕ್‌, ಆರ್‌ಬಿಐ ಕಚೇರಿಗಳಲ್ಲಿ ಬದಲಾಯಿಸಿಕೊಳ್ಳಬಹುದು. ತಿದ್ದುಪಡಿ ನಿಯಮಗಳು ತಕ್ಷಣದಿಂದಲೇ ಜಾರಿಗೆ ಬಂದಿವೆ ಎಂದು ಆರ್‌ಬಿಐ ತನ್ನ ವೆಬ್‌ಸೈಟ್‌ನಲ್ಲಿ ತಿಳಿಸಿದೆ.

ನೋಟು ರದ್ದತಿಯ ಬಳಿಕ ವಿವಿಧ ಮುಖಬೆಲೆಯ ನೋಟುಗಳನ್ನು ಚಲಾವಣೆಗೆ ತರಲಾಗಿತ್ತು. ಇದಕ್ಕೂ ಮೊದಲು ಮಾಸಿದ ₹2000 ಹಾಗೂ ₹200 ಮಖಬೆಲೆಯ ನೋಟುಗಳ ಬದಲಾವಣೆಗೆ ಅವಕಾಶ ಇರಲಿಲ್ಲ. 

₹10, ₹20, ₹50, ₹100 ಹಾಗೂ ₹500 ಮುಖಬೆಲೆಯ ನೊಟುಗಳನ್ನು ಬದಲಾಯಿಸಿಕೊಡಲು ಮಾತ್ರ ಕಾನೂನಿನಲ್ಲಿ ಅವಕಾಶ ಇತ್ತು.

ಕಾನೂನಿಗೆ ತಿದ್ದುಪಡಿ ತರುವ ಅಧಿಕಾರವನ್ನು ಕೇಂದ್ರ ಹಣಕಾಸು ಸಚಿವಾಲಯವು ಆರ್‌ಬಿಐಗೆ ನೀಡಿತ್ತು.