ನವದೆಹಲಿ: ಮುಕೇಶ್ ಅಂಬಾನಿ ಒಡೆತನದ ರಿಲಯನ್ಸ್ ಇಂಡಸ್ಟ್ರೀಸ್‌ ಲಿಮಿಟೆಡ್‌ ಕಂಪನಿಯು ಜೂನ್‌ಗೆ ಕೊನೆಗೊಂಡ ತ್ರೈಮಾಸಿಕದಲ್ಲಿ ನಿರೀಕ್ಷೆಗಿಂತ ಹೆಚ್ಚಿನ ಲಾಭ ಗಳಿಸಿದೆ. ಈ ತ್ರೈಮಾಸಿಕದಲ್ಲಿ ಕಂಪನಿಯ ನಿವ್ವಳ ಲಾಭ ₹ 13,248 ಕೋಟಿ.
ಹಿಂದಿನ ವರ್ಷದ ಇದೇ ತ್ರೈಮಾಸಿಕದಲ್ಲಿ ಕಂಪನಿಯ ಲಾಭ ₹ 10,141 ಕೋಟಿ ಆಗಿತ್ತು. ಹಿಂದಿನ ವರ್ಷದ ತ್ರೈಮಾಸಿಕಕ್ಕೆ ಹೋಲಿಸಿದರೆ, ಲಾಭದಲ್ಲಿ ಶೇಕಡ 30.6ರಷ್ಟು ಹೆಚ್ಚಳ ಆದಂತಾಗಿದೆ. ತೈಲದ ಚಿಲ್ಲರೆ ಮಾರಾಟ ವಿಭಾಗದಲ್ಲಿನ ಶೇಕಡ 49ರಷ್ಟು ಷೇರುಗಳ ಮಾರಾಟದಿಂದ ಈ ತ್ರೈಮಾಸಿಕದಲ್ಲಿ ₹ 4,966 ಕೋಟಿ ಆದಾಯ ಬಂದಿದೆ.
ರಿಲಯನ್ಸ್ ಜಿಯೊ ಈ ತ್ರೈಮಾಸಿಕದ ಲಾಭದಲ್ಲಿ ಶೇಕಡ 183ರಷ್ಟು ಏರಿಕೆ ದಾಖಲಿಸಿದೆ. ಕಂಪನಿಯ ನಿವ್ವಳ ಲಾಭ ₹ 2,520 ಕೋಟಿ. ಕಳೆದ ವರ್ಷದ ಈ ತ್ರೈಮಾಸಿಕದಲ್ಲಿ ಜಿಯೊ, ₹ 891 ಕೋಟಿ ನಿವ್ವಳ ಲಾಭ ಕಂಡಿತ್ತು.
ಎರಡು ಕೋಟಿ ಗ್ರಾಹಕರು
ಬೆಂಗಳೂರು: ರಿಲಯನ್ಸ್‌ನ ಅಂಗಸಂಸ್ಥೆ ಜಿಯೊ ಕರ್ನಾಟಕದಲ್ಲಿ ಈಗ ಎರಡು ಕೋಟಿಗೂ ಹೆಚ್ಚಿನ ಗ್ರಾಹಕರನ್ನು ಹೊಂದಿದೆ. ‘ಕೇವಲ ಮೂರು ವರ್ಷಗಳಲ್ಲಿ ಇದು ಸಾಧ್ಯವಾಗಿದೆ’ ಎಂದು ಕಂಪನಿ ಹೇಳಿಕೊಂಡಿದೆ.
