ಮುಂಬೈ: ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (ಎಸ್ಬಿಐ), ಪ್ರಸಕ್ತ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ₹ 2,312 ಕೋಟಿ ನಿವ್ವಳ ಲಾಭ ಗಳಿಸಿದೆ.
ವರಮಾನ ಹೆಚ್ಚಳ ಮತ್ತು ಸಾಲದ ಮರುಪಾವತಿಯಲ್ಲಿ ಸುಧಾರಣೆ ಆಗಿರುವುದರಿಂದ ಲಾಭ ಗಳಿಕೆ ಸಾಧ್ಯವಾಗಿದೆ. ಹಿಂದಿನ ಹಣಕಾಸು ವರ್ಷದ ಇದೇ ಅವಧಿಯಲ್ಲಿ ಬ್ಯಾಂಕ್ ₹ 4,875 ಕೋಟಿ ನಷ್ಟಕ್ಕೆ ಗುರಿಯಾಗಿತ್ತು.
ಏಪ್ರಿಲ್–ಜೂನ್ ಅವಧಿಯಲ್ಲಿ ಬ್ಯಾಂಕ್ನ ಒಟ್ಟು ವರಮಾನವು ಹಿಂದಿನ ವರ್ಷದ ₹ 65,492 ಕೋಟಿಗೆ ಹೋಲಿಸಿದರೆ ಈ ಬಾರಿ ₹ 70,653 ಕೋಟಿಗೆ ಏರಿಕೆಯಾಗಿದೆ.
ಬ್ಯಾಂಕ್ನ ಒಟ್ಟು ವಸೂಲಾಗದ ಸಾಲದ ಪ್ರಮಾಣವು (ಎನ್ಪಿಎ) ವರ್ಷದ ಹಿಂದಿನ ಶೇ 10.69ರಿಂದ ಶೇ 7.53ಕ್ಕೆ ಇಳಿದಿದೆ. ನಿವ್ವಳ ‘ಎನ್ಪಿಎ’ ಕೂಡ ಶೇ 5.29 ರಿಂದ ಶೇ 3.07ಕ್ಕೆ ಇಳಿದಿದೆ.