₹250 ಕೋಟಿ ವೆಚ್ಚದಲ್ಲಿ ಹೊಸೂರು ಬಳಿ ಹೆಲ್ಮೆಟ್‌ ಘಟಕ

ಸ್ಟೀಲ್‌ಬರ್ಡ್‌ ವ್ಯವಸ್ಥಾಪಕ ನಿರ್ದೇಶಕ ರಾಜೀವ್‌ ಕಪೂರ್‌ ಮಾತನಾಡಿ, ಬೇಡಿಕೆ ಪೂರೈಸಲು ಘಟಕಗಳನ್ನು ಸ್ಥಾಪಿಸಲಾಗುತ್ತಿದೆ. ಇದಕ್ಕಾಗಿ ಜಮೀನು ಸ್ವಾಧೀನಪಡಿಸಿಕೊಳ್ಳುವ ಕಾರ್ಯ ಅಂತಿಮ ಹಂತದಲ್ಲಿದೆ. ಆರಂಭಿಕ ಹಂತವಾಗಿ ₹100 ಕೋಟಿ ಹೂಡಿಕೆ ಮಾಡಲಿದ್ದೇವೆ. ಎರಡು ವರ್ಷಗಳಲ್ಲಿ ₹250 ಕೋಟಿ ಹೂಡಿಕೆ ಮಾಡಲಾಗುವುದು. ಆ ವೇಳೆಗೆ ಘಟಕವು ಕಾರ್ಯನಿರ್ವಹಿಸುವ ನಿರೀಕ್ಷೆ ಇದೆ ಎಂದರು.

ಹಿಮಾಚಲ ಪ್ರದೇಶದ ಬಡ್ಡಿ ಮತ್ತು ನೊಯಿಡಾದಲ್ಲಿ ಈಗಾಗಲೇ ಕಂಪನಿ ತಲಾ ನಾಲ್ಕು ಘಟಕಗಳನ್ನು ಹೊಂದಿದೆ. ಬಡ್ಡಿಯಲ್ಲಿನ ತಯಾರಿಕಾ ಘಟಕವನ್ನು ₹105 ಕೋಟಿ ವೆಚ್ಚದಲ್ಲಿ ವಿಸ್ತರಣೆ ಮಾಡಲಾಗುತ್ತಿದೆ. ಈ ಸ್ಥಾವರ ಫೂರ್ಣವಾದ ನಂತರ ಕಂಪನಿಯ ತಯಾರಿಕಾ ಸಾಮರ್ಥ್ಯವು ದಿನಕ್ಕೆ 20 ಸಾವಿರದಿಂದ 50 ಸಾವಿರ ಹೆಲ್ಮೆಟ್‌ಗಳಿಗೆ ಏರಿಕೆ ಆಗಲಿದೆ. ಈ ಆರ್ಥಿಕ ವರ್ಷದಲ್ಲಿ ಎಲ್ಲ ಘಟಕಗಳಿಂದ ಕೋಟಿ ಹೆಲ್ಮೆಟ್ ತಯಾರಿಸುವ ನಿರೀಕ್ಷೆಯಿದೆ. ಮುಂದಿನ ವರ್ಷದ ಅಂತ್ಯದ ವೇಳೆಗೆ, ಕಂಪನಿಯು ಒಟ್ಟಾರೆ ತಯಾರಿಕೆಯನ್ನು ವರ್ಷಕ್ಕೆ 1.5 ಕೋಟಿ ಹೆಲ್ಮೆಟ್‌ಗಳಿಗೆ ವಿಸ್ತರಿಸಲು ಯೋಜಿಸಿದೆ ಎಂದು ಅವರು ಹೇಳಿದರು.

2022–23ರ ಅವಧಿಯಲ್ಲಿ ಕಂಪನಿಯು ₹554 ಕೋಟಿ ವ್ಯವಹಾರ ನಡೆಸಿದ್ದು, ಪ್ರಸಕ್ತ ಹಣಕಾಸು ವರ್ಷದಲ್ಲಿ ಇದನ್ನು ₹600 ಕೋಟಿ ಮುಟ್ಟಿಸುವ ಗುರಿ ಹೊಂದಿದೆ. 2026–27ರ ವೇಳೆಗೆ ವಹಿವಾಟನ್ನು ₹1300 ಕೋಟಿಗೆ ಹೆಚ್ಚಿಸಲು ಯೋಜನೆ ಹಾಕಿಕೊಳ್ಳಲಾಗಿದೆ ಎಂದರು.