ನವದೆಹಲಿ: ಆನ್ಲೈನ್ ಮೂಲಕ ದಿನಸಿ ವಸ್ತುಗಳನ್ನು ಮಾರಾಟ ಮಾಡುವ ‘ಬಿಗ್ ಬಾಸ್ಕೆಟ್’ನ ಶೇಕಡ 68ರಷ್ಟು ಷೇರುಗಳನ್ನು ಟಾಟಾ ಸಮೂಹವು ₹ 9,500 ಕೋಟಿಗೆ ಖರೀದಿಸಲಿದೆ ಎಂದು ಮೂಲಗಳು ತಿಳಿಸಿವೆ.
ಭಾರತದಲ್ಲಿ ಅತ್ಯಂತ ವೇಗವಾಗಿ ಬೆಳವಣಿಗೆ ಕಾಣುತ್ತಿರುವ ಇ–ಕಾಮರ್ಸ್ ವಲಯದಲ್ಲಿ ತನ್ನ ವಹಿವಾಟನ್ನು ವಿಸ್ತರಿಸಿಕೊಳ್ಳಲು ಟಾಟಾ ಸಮೂಹ ಈ ಖರೀದಿಗೆ ಮುಂದಾಗಿದೆ ಎಂದು ಗೊತ್ತಾಗಿದೆ.
ಬೆಂಗಳೂರು ಮೂಲದ ‘ಬಿಗ್ ಬಾಸ್ಕೆಟ್’ ನವೋದ್ಯಮದಲ್ಲಿ ಹೆಚ್ಚಿನ ಪಾಲು ಹೊಂದಲು ಪ್ರಯತ್ನಿಸುತ್ತಿರುವ ಟಾಟಾ ಸಮೂಹವು ಒಪ್ಪಂದಕ್ಕೆ ಸಹಿ ಮಾಡಿದೆ ಎಂದು ಈ ಬೆಳವಣಿಗೆಯ ಬಗ್ಗೆ ಮಾಹಿತಿ ಇರುವ ವ್ಯಕ್ತಿಗಳು ತಿಳಿಸಿದ್ದಾರೆ.
ಆಲಿಬಾಬಾ ಸೇರಿದಂತೆ ಹಲವು ಹೂಡಿಕೆದಾರರಿಗೆ ಬಿಗ್ಬಾಸ್ಕೆಟ್ನಿಂದ ಹೊರಹೋಗಲು ಈ ಒಪ್ಪಂದವು ಅವಕಾಶ ಕಲ್ಪಿಸಲಿದೆ. ಈ ಬೆಳವಣಿಗೆಯ ಕುರಿತು ಪ್ರತಿಕ್ರಿಯೆ ನೀಡಲು ಟಾಟಾ ಸಮೂಹ, ಬಿಗ್ ಬಾಸ್ಕೆಟ್ ಮತ್ತು ಆಲಿಬಾಬಾ ನಿರಾಕರಿಸಿವೆ.
2019ರಲ್ಲಿ ಮಿರೈ, ಅಲಿಬಾಬಾ ಮತ್ತು ಸಿಡಿಸಿ ಸಮೂಹದಿಂದ ₹ 1,095 ಕೋಟಿ ಬಂಡವಾಳವನ್ನು ಬಿಗ್ಬಾಸ್ಕೆಟ್ ಸಂಗ್ರಹಿಸಿತ್ತು.
ವರದಿಗಳ ಪ್ರಕಾರ, ಬಿಗ್ ಬಾಸ್ಕೆಟ್ ಸಹ ಸ್ಥಾಪಕ ಹರಿ ಮೆನನ್ ಅವರನ್ನೂ ಒಳಗೊಂಡು ಆಡಳಿತ ಮಂಡಳಿಯ ಉನ್ನತ ಹುದ್ದೆಗಳಲ್ಲಿ ಇರುವವರು ಮುಂದಿನ ಮೂರರಿಂದ ನಾಲ್ಕು ವರ್ಷಗಳವರೆಗೆ ಕಂಪನಿಯಲ್ಲಿ ಮುಂದುವರಿಯಲಿದ್ದಾರೆ. ಆದರೆ, ಈ ಕುರಿತು ಮೆನನ್ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.