ನವದೆಹಲಿ: ವಿದ್ಯುತ್ ಚಾಲಿತ ವಾಹನಗಳಿಗೆ (ಇ.ವಿ) ಸಿಗುವ ಸಬ್ಸಿಡಿಯು ಜೂನ್ 1ರಿಂದ ಅನ್ವಯವಾಗುವಂತೆ ಕಡಿಮೆ ಆಗಿದ್ದು, ಇ.ವಿ. ದ್ವಿಚಕ್ರ ವಾಹನ ತಯಾರಿಕಾ ಕಂಪನಿಗಳಾದ ಟಿವಿಎಸ್, ಏಥರ್ ಮತ್ತು ಓಲಾ ತಮ್ಮ ವಾಹನಗಳ ಬೆಲೆ ಹೆಚ್ಚಿಸಿವೆ.
ಐಕ್ಯೂಬ್ ಬೆಲೆಯನ್ನು ₹17 ಸಾವಿರದಿಂದ ₹20 ಸಾವಿರದವರೆಗೆ ಹೆಚ್ಚಿಸುತ್ತಿರುವುದಾಗಿ ಟಿವಿಎಸ್ ಹೇಳಿದೆ. ಏಥರ್ ಕಂಪನಿಯು 450X ಮಾದರಿಯ ಬೆಲೆಯನ್ನು ₹1.45 ಲಕ್ಷಕ್ಕೆ ಹೆಚ್ಚಿಸಿದೆ (ಬೆಂಗಳೂರು ಎಕ್ಸ್‌ ಷೋರೂಂ ಬೆಲೆ). 450X ಪ್ರೊ ಮಾದರಿಯ ಬೆಲೆಯಲ್ಲಿ ₹8 ಸಾವಿರದಷ್ಟು ಹೆಚ್ಚಳ ಆಗಿದೆ.
ಓಲಾ ಕಂಪನಿಯು ಎಸ್‌1 ಪ್ರೊ ಬೆಲೆಯನ್ನು ₹1,39,999ಕ್ಕೆ ಹೆಚ್ಚಿಸಿದೆ. ಕಂಪನಿಯ ದ್ವಿಚಕ್ರ ವಾಹನಗಳ ಬೆಲೆಯು ಸರಿಸುಮಾರು ₹15 ಸಾವಿರದಷ್ಟು ಹೆಚ್ಚಾಗಿದೆ. ಆದರೆ ತಾನು ಬೆಲೆ ಹೆಚ್ಚಿಸುವುದಿಲ್ಲ ಎಂದು ಹೀರೊ ಎಲೆಕ್ಟ್ರಿಕ್ ಹೇಳಿದೆ.
