ಚೆನ್ನೈ: ಟಿವಿಎಸ್‌ ಗ್ರೂಪ್‌ನ ಅಂಗ ಸಂಸ್ಥೆಗಳಾಗಿರುವ ವಾಹನ ಬಿಡಿಭಾಗ ತಯಾರಿಸುವ ಲುಕಾಸ್ ಟಿವಿಎಸ್‌ ಮತ್ತು ಸುಂದರಂ ಕ್ಲೇಟನ್‌, ತಮ್ಮ ನೌಕರರ ಕೆಲಸದ ಅವಧಿಯಲ್ಲಿ ಎರಡು ದಿನಗಳ ಕಡಿತ ಘೋಷಿಸಿವೆ.
ವಾಹನ ತಯಾರಿಕೆ ಉದ್ದಿಮೆಯು ನಿರಂತರವಾಗಿ ಮಾರಾಟ ಕುಸಿತ ದಾಖಲಿಸುತ್ತಿರುವುದರಿಂದ ಈ ನಿರ್ಧಾರಕ್ಕೆ ಬರಲಾಗಿದೆ. ಆ. 16 ಮತ್ತು 17ರಂದು ಈ ಕೆಲಸ ಕಡಿತ ಜಾರಿಯಲ್ಲಿ ಇರಲಿದೆ ಎಂದು ಸಂಸ್ಥೆ ತಿಳಿಸಿದೆ.
ವಾಹನ ಮತ್ತು ವಾಹನಯೇತರ ವಲಯಕ್ಕೆ ಬಿಡಿಭಾಗಗಳ ಅಲ್ಯುಮಿನಿಯಂ ಅಚ್ಚು ತಯಾರಿಸುವ ಸುಂದರಂ ಕ್ಲೇಟನ್‌ ಕೂಡ ಇದೇ ಬಗೆಯ ನಿರ್ಧಾರ ಕೈಗೊಂಡಿದೆ.
ಎಂಎಸ್‌ಐ ಉದ್ಯೋಗ ಕಡಿತ: ಮಾರುತಿ ಸುಜುಕಿ ಇಂಡಿಯಾದ (ಎಂಎಸ್‌ಐ) 3 ಸಾವಿರದಷ್ಟು ಗುತ್ತಿಗೆ ನೌಕರರು ಕೆಲಸ ಕಳೆದುಕೊಂಡಿದ್ದಾರೆ.
‘ಮಾರಾಟ ಕುಸಿದಿರುವುದರಿಂದ ಈ ನಿರ್ಧಾರ ಕೈಗೊಳ್ಳಲಾಗಿದೆ. ಕಾಯಂ ಕೆಲಸಗಾರರಿಗೆ ಯಾವುದೇ ಸಮಸ್ಯೆ ಇಲ್ಲ’ ಎಂದು ಕಂಪನಿ ಅಧ್ಯಕ್ಷ ಆರ್‌. ಸಿ. ಭಾರ್ಗವ ಹೇಳಿದ್ದಾರೆ.
