ನವದೆಹಲಿ: ‘ವಂಚನೆ ತಂತ್ರಾಂಶ’ ಬಳಸಿ ಕಾರುಗಳು ಹೊರಸೂಸುವ ಹೊಗೆಯಲ್ಲಿನ ಮಾಲಿನ್ಯ ಕಡಿಮೆ ಎಂದು ಮೋಸ ಮಾಡಿದ ಪ್ರಕರಣದಲ್ಲಿ ಫೋಕ್ಸ್‌ವ್ಯಾಗನ್ ಕಂಪನಿಗೆ ರಾಷ್ಟ್ರೀಯ ಹಸಿರು ಪೀಠವು (ಎನ್‌ಜಿಟಿ) ₹ 500 ಕೋಟಿ ದಂಡ ವಿಧಿಸಿದೆ.
ಕಂಪನಿಯು ಭಾರತದಲ್ಲಿ ಮಾರಾಟ ಮಾಡಿದ್ದ ಡೀಸೆಲ್ ಕಾರುಗಳಲ್ಲಿ ಈ ವಂಚನೆ ತಂತ್ರಾಂಶವನ್ನು ಬಳಸಲಾಗಿತ್ತು. ಈ ಪ್ರಕರಣದ ವಿಚಾರಣೆಯನ್ನು ಎನ್‌ಜಿಟಿ ಮುಖ್ಯಸ್ಥ, ನ್ಯಾಯಮೂರ್ತಿ ಆದರ್ಶ ಕುಮಾರ್ ಗೋಯಲ್ ನಡೆಸಿದರು.
‘ಈ ರೀತಿ ವಂಚನೆ ಮಾಡಿ ಪರಿಸರಕ್ಕೆ ಮತ್ತು ಜೀವಿಗಳ ಆರೋಗ್ಯಕ್ಕೆ ಹಾನಿ ಮಾಡಿದ ಕಾರಣ ದಂಡ ವಿಧಿಸಲಾಗಿದೆ. ದಂಡದಲ್ಲಿ ₹ 100 ಕೋಟಿಯನ್ನು ಕೇಂದ್ರೀಯ ಮಾಲಿನ್ಯ ನಿಯಂತ್ರಣ ಮಂಡಳಿಯಲ್ಲಿ ಮಧ್ಯಂತರ ಠೇವಣಿ ಇಡಬೇಕು. ಪೂರ್ಣ ಮೊತ್ತವನ್ನುಎರಡು ತಿಂಗಳ ಒಳಗೆ ಪಾವತಿಸಬೇಕು’ ಎಂದು ಅವರು ಕಂಪನಿಗೆ ಸೂಚಿಸಿದ್ದಾರೆ.
‘ಭಾರತದಲ್ಲಿ ನಿಗದಿಮಾಡಿರುವ ವಾಯುಮಾಲಿನ್ಯ ಮಾನದಂಡಗಳಿಗೆ ನಮ್ಮ ಎಲ್ಲಾ ಕಾರುಗಳು ಬದ್ಧವಾಗಿವೆ. ಈ ಆದೇಶವನ್ನು ನಾವು ಸುಪ್ರೀಂ ಕೋರ್ಟ್‌ನಲ್ಲಿ ಪ್ರಶ್ನಿಸುತ್ತೇವೆ’ ಎಂದು ಫೋಕ್ಸ್‌ವ್ಯಾಗನ್ ಕಂಪನಿ ಹೇಳಿದೆ.
