ಹೆಲಿಕಾಪ್ಟರ್‌ ಮನಿ ಎಂದರೇನು? ಇಲ್ಲಿದೆ ಸರಳ ವಿವರಣೆ...

ದೇಶದ ಆರ್ಥಿಕ ಪರಿಸ್ಥಿತಿ ಉತ್ತಮವಲ್ಲದ ಈ ಸಂದರ್ಭದಲ್ಲಿ ಜಾಗತಿಕ ಮಹಾಮಾರಿ ಕೋವಿಡ್‌ 19 ಕೂಡ ದೇಶವನ್ನು ಆವರಿಸಿದ್ದು, ಅರ್ಥ ವ್ಯವಸ್ಥೆ ಮತ್ತಷ್ಟು ಕುಸಿಯುವಂತೆ ಮಾಡಿದೆ. ಈ ಪರಿಸ್ಥಿತಿಯ ಹಿನ್ನೆಲೆಯಲ್ಲಿ ಕೇಂದ್ರ ಸರ್ಕಾರ ‘ಹೆಲಿಕಾಪ್ಟರ್‌ ಮನಿ’ಯನ್ನು ಜಾರಿಗೆ ತರಬೇಕು ಎಂದು ಇತ್ತೀಚೆಗೆ ತೆಲಂಗಾಣ ಮುಖ್ಯಮಂತ್ರಿ ಕೆ. ಚಂದ್ರಶೇಖರ ರಾವ್‌ ಅವರು ಕೇಂದ್ರವನ್ನು ಒತ್ತಾಯಿಸಿದ್ದರು. ಅದರೊಂದಿಗೆ ಹೆಲಿಕಾಪ್ಟರ್‌ ಮನಿ ದೇಶದಲ್ಲಿ ಹೆಚ್ಚು ಚರ್ಚೆಗೆ ಒಳಗಾಯಿತು.

ಹೆಲಿಕಾಪ್ಟರ್‌ ಮನಿ ಎಂದರೇನು?

ಅಮೆರಿಕದ ಅರ್ಥಶಾಸ್ತ್ರಜ್ಞ ಮಿಲ್ಟನ್ ಫ್ರೀಡ್ಮನ್ ಅವರು ಈ ಕಲ್ಪನೆಯನ್ನು ಮೊದಲ ಬಾರಿಗೆ ಚಾಲ್ತಿಗೆ ತಂದರು. ಅದರಂತೆ. ಸಾಮಾನ್ಯ ಜನರ ಕೊಳ್ಳುವ ಶಕ್ತಿಯನ್ನು ಹೆಚ್ಚಿಸುವುದು, ಹಣದ ಹರಿವನ್ನು ಹೆಚ್ಚಿಸುವುದು, ಆ ಮೂಲಕ ಅರ್ಥ ವ್ಯವಸ್ಥೆಯನ್ನುಮೇಲೆತ್ತುವುದು ಇದರ ಉದ್ದೇಶ. ಇದಕ್ಕಾಗಿ ದೇಶವೊಂದು ತನ್ನ ಕೇಂದ್ರ ಬ್ಯಾಂಕ್‌ಗೆ ಹೆಚ್ಚಿನ ಹಣ ಮುದ್ರಿಸುವಂತೆ ತಿಳಿಸುತ್ತದೆ. ನಂತರ ಅದನ್ನು ಜನರಿಗೆ ಮರುಪಾವತಿ ಇಲ್ಲದ, ಸಾಲವಲ್ಲದ, ನೆರವಿನ ರೂಪದಲ್ಲಿ ವಿತರಣೆ ಮಾಡುತ್ತದೆ.

ಹೆಲಿಕಾಪ್ಟ್‌ ಮನಿ ಎಂಬ ಹೆಸರು ಬಂದಿದ್ದು ಏಕೆ?

ಏಕಕಾಲಕ್ಕೆ ಆರ್ಥವ್ಯವಸ್ಥೆಗೆ ಹೆಚ್ಚಿನ ಪ್ರಮಾಣದಲ್ಲಿ ಹಣ ಪೂರೈಕೆಯಾಗುವುದರಿಂದ, ಜನರಿಗೆ ವಿತರಣೆಯಾಗುವುದರಿಂದ ಇದನ್ನು ಹೆಲಿಕಾಪ್ಟರ್‌ ಮನಿ ಎಂದು ಕರೆಯಲಾಗುತ್ತದೆ. ಆದರೆ, ಈ ಪರಿಕಲ್ಪನೆಯ ಅಡಿಯಲ್ಲಿ ಹಣವನ್ನು ಹೆಲಿಕಾಪ್ಟರ್‌ನಿಂದ ನೇರವಾಗಿ ಜನರಿಗೆ ಸುರಿಸುವುದಿಲ್ಲ.

ಎಲ್ಲಿಯಾದರೂ ಜಾರಿಗೆ ಬಂದಿತ್ತೇ?

ಅಮೆರಿಕ ಮತ್ತು ಜಪಾನ್‌ ಈ ರೀತಿಯ ಕಾರ್ಯಕ್ರಮಗಳನ್ನು ಜಾರಿಗೆ ತಂದಿದ್ದವು ಎಂದು ಹೇಳಲಾಗುತ್ತದೆ. ಆದರೆ, ಅದನ್ನು ಎರಡೂ ದೇಶಗಳೂ ನಿರಾಕರಿಸಿವೆ.