ಪ್ರಶ್ನೋತ್ತರ ಸಲಹೆ: ಹಣ ಪಾವತಿಸಲು ಉಳಿತಾಯ ಖಾತೆಗೆ Standing Instruction ಕೊಡಿ

7

ಪ್ರಶ್ನೋತ್ತರ ಸಲಹೆ: ಹಣ ಪಾವತಿಸಲು ಉಳಿತಾಯ ಖಾತೆಗೆ Standing Instruction ಕೊಡಿ

Published:
Updated:
ಯು.ಪಿ. ಪುರಾಣಿಕ್‌

-ಹೆಸರು ಬೇಡ, ಹುಬ್ಬಳ್ಳಿ

ಅಂಚೆ ಕಚೇರಿಯಲ್ಲಿ ಕೆಲಸ. ವಯಸ್ಸು 40. ಒಬ್ಬ ಮಗ, ಒಬ್ಬಳು ಮಗಳು ಇದ್ದಾಳೆ. ಕ್ರಮವಾಗಿ 4ನೇ ಹಾಗೂ 5ನೇ ತರಗತಿಯಲ್ಲಿ ಓದುತ್ತಿದ್ದಾರೆ. ನಾನು ಒಂದು ಮನೆಯನ್ನು ಖರೀದಿಸಿದ್ದು ಸಾಲದ ತಿಂಗಳ ಕಂತು ₹ 17,000. ಹಿಂದಿನ ವರ್ಷ ನನ್ನ ಪಾಲಿಗೆ ಬಂದ ಹೊಲವನ್ನು ಮಾರಿ ಸ್ವಲ್ಪ ಹಣ ತೆಗೆದಿಟ್ಟಿದ್ದೇನೆ. ನನಗೆ ಇನ್ನೊಂದು ನಿವೇಶನಕೊಳ್ಳಲು ಹಾಗೂ ಭವಿಷ್ಯದ ಬಗ್ಗೆ ಸಲಹೆ ನೀಡಿ.

ಉತ್ತರ: ನೀವು ಹೊಲ ಮಾರಿದ ಹಣ ಎಲ್ಲಿ ಇಟ್ಟುಕೊಂಡಿದ್ದೀರಿ ಎನ್ನುವುದು ತಿಳಿಯಲಿಲ್ಲ. ನೀವು ಬಯಸಿದಂತೆ ಈ ಹಣ ಭೂಮಿ ಮಾರಾಟದಿಂದ ಬಂದ ಹಣದಿಂದ ಇನ್ನೊಂದು ನಿವೇಶನದಲ್ಲಿ ಹಣ ಹೂಡುವುದು ತುಂಬಾ ಉತ್ತಮ ನಿರ್ಧಾರ.

ಸ್ಥಿರ ಆಸ್ತಿ ಯಾವಾಗಲೂ ಸ್ಥಿರವಾಗಿರುತ್ತದೆ. ತಕ್ಷಣ ಈ ಆಲೋಚನೆ ಜಾರಿಗೆ ತನ್ನಿ. ನಿಮ್ಮ ಮಗಳ ಭವಿಷ್ಯಕ್ಕಾಗಿ ಎಷ್ಟಾದರಷ್ಟು ಸುಕನ್ಯಾ ಸಮೃದ್ಧಿ ಯೋಜನೆಯಲ್ಲಿ ತೊಡಗಿಸಿರಿ ಹಾಗೂ ಮಗನ ಮುಂದಿನ ಓದಿಗಾಗಿ ಒಂದು ಉತ್ತಮ ಮೊತ್ತದ ಆರ್.ಡಿ. ಮಾಡಿರಿ. ಈ ಎರಡೂ ನಿಮ್ಮ ಅಂಚೆ ಕಚೇರಿಯಲ್ಲಿಯೇ ಮಾಡಿ. ಹಣ ಪಾವತಿಸಲು ನಿಮ್ಮ ಉಳಿತಾಯ ಖಾತೆಗೆ Standing Instruction  ಕೊಡಿ. ನಿಮಗೂ ನಿಮ್ಮ ಚಿಕ್ಕ ಮಕ್ಕಳಿಗೂ ಉಜ್ವಲ ಭವಿಷ್ಯ ಹಾರೈಸುತ್ತೇನೆ.

**

-ಪಿ.ಕೆ. ವೀರೇಶ್

ನಾನು ಸರ್ಕಾರಿ ನಿವೃತ್ತ ನೌಕರ. ನನ್ನ ಪಿಂಚಣಿ ₹ 17,400. ನಾನು ಕೆನರಾ ಬ್ಯಾಂಕಿನಲ್ಲಿ ₹ 5 ಲಕ್ಷ ಎಫ್.ಡಿ. ಇಟ್ಟಿದ್ದೇನೆ. ನಾನು H  ಫಾರಂ ಸಲ್ಲಿಸಿದ್ದೇನೆ.  ಆದರೂ ₹ 62 ಮೂಲದಲ್ಲಿಯೇ ತೆರಿಗೆ ಕಡಿತ (ಟಿಡಿಎಸ್‌) ಮಾಡಿದ್ದಾರೆ. ಕೇಳಿದರೆ ಮುಂದಿನ ವರ್ಷ ಈ ಹಣ ನನಗೆ ಸಿಗುತ್ತದೆ ಎನ್ನುತ್ತಾರೆ. ಏನು ಮಾಡಲಿ ತಿಳಿಸಿರಿ.

ಉತ್ತರ: ಒಮ್ಮೆ ‘ಟಿಡಿಎಸ್‌’ ಮಾಡಿದ ಹಣ ಮುಂದಿನ ವರ್ಷ ಬ್ಯಾಂಕಿನಲ್ಲಿ ನಿಮ್ಮ ಖಾತೆಗೆ ಜಮಾ ಮಾಡಲು ಬರುವುದಿಲ್ಲ. ಈ ಹಣ ಆದಾಯ ತೆರಿಗೆ ಇಲಾಖೆಗೆ ಜಮಾ ಆಗಿರುತ್ತದೆ. ನೀವು IT Return  ತುಂಬಿ ₹ 62 ವಾಪಸು ಪಡೆಯುವ ಸೌಲತ್ತು ಇದೆ. ಆದರೆ ₹ 62 ಪಡೆಯಲು ಕನಿಷ್ಠ ₹ 250–500 ಬರುತ್ತದೆ. ನನ್ನ ಪ್ರಕಾರ ನೀವು ಸುಮ್ಮನಿರುವುದು ಲೇಸು ಹಾಗೂ ಮುಂದೆ ಟಿಡಿಎಸ್‌ ಆಗದಂತೆ ಬ್ಯಾಂಕಿಗೆ ತಿಳಿಸಿರಿ.

** 

-ಶೈಲ. ಎನ್.ಎಚ್., ಮುದಗಲ್

ನನ್ನ ಪತಿ ಕೆಎಸ್‌ಆರ್‌ಟಿಸಿ ನೌಕರರು. ಎಲ್ಲಾ ಕಡಿತದ ನಂತರ ವರ್ಷಕ್ಕೆ ನಮ್ಮ ಕೈ ಸೇರುವ ಮೊತ್ತ ₹ 2,52,557 ಇದೆ. VPF ನಲ್ಲಿ ಪ್ರತಿ ತಿಂಗಳೂ ₹ 5,000 ತುಂಬುತ್ತೇನೆ. ನಾವು ಖಾಸಗಿಯಾಗಿ ಪಡೆದ ಗೃಹ ಸಾಲ ಹಾಗೂ ಬಡ್ಡಿಗೆ ಆದಾಯ ತೆರಿಗೆ ವಿನಾಯ್ತಿ ಪಡೆಯಬಹುದೇ ತಿಳಿಸಿರಿ. ಈಗಾಗಲೇ ₹ 3,500 ಆದಾಯ ತೆರಿಗೆ ಮುರಿದಿರುತ್ತಾರೆ. ದಯಮಾಡಿ ಏನು ಮಾಡಬೇಕು ತಿಳಿಸಿರಿ.

ಉತ್ತರ: ನಿಮ್ಮ ಪತಿ ವಾರ್ಷಿಕವಾಗಿ ಪಡೆಯುವ ಸಂಬಳದಲ್ಲಿ ಸೆಕ್ಷನ್ 80C ಆಧಾರದ ಮೇಲೆ VPF  ₹ 60,000, ಮನೆ ಸಾಲದ ಕಂತು ಹಾಗೂ ಸೆಕ್ಷನ್ 24(B) ಆಧಾರದ ಮೇಲೆ ಮನೆ ಸಾಲದ ಮೇಲಿನ ಬಡ್ಡಿ ಕಳೆದು, ಹಾಗೆ ಬಂದ ಮೊತ್ತ ₹ 2.50 ಲಕ್ಷದೊಳಗೆ ಇರುವಲ್ಲಿ ತೆರಿಗೆ ಕೊಡುವ ಅವಶ್ಯವಿಲ್ಲ.  VPF ನೀವು ಮಾಡಿರುವುದು ಚೆನ್ನಾಗಿದೆ. ಮಧ್ಯದಲ್ಲಿ ಸಲ್ಲಿಸಬೇಡಿ. ಖಾಸಗಿ ಬ್ಯಾಂಕಿನಲ್ಲಿ ಅಥವಾ ಕಂಪನಿಗಳಲ್ಲಿ ಪಡೆದ ಗೃಹ ಸಾಲದ ಕಂತು ಬಡ್ಡಿ ತೆರಿಗೆ ವಿನಾಯ್ತಿಗೆ ಒಳಪಡುತ್ತದೆ.

**

-ನರಸಿಂಹ, ಕೆ.ಆರ್. ನಗರ

ನನ್ನ ಒಟ್ಟು ಆದಾಯ ವಾರ್ಷಿಕ ₹ 3,24,000. ಈ ಸಾರಿ ಘೋಷಿಸಿದ ₹ 40,000 ಸ್ಟ್ಯಾಂಡರ್ಡ್‌ ಡಿಡಕ್ಷನ್‌ ಕಾರಣಕ್ಕೆ ನಾನು ತೆರಿಗೆ ಮಿತಿಯೊಳಗೆ ಬರುತ್ತೇನೆ. ನಾನು ರಿಟರ್ನ್ ತುಂಬಬೇಕೇ. ನನಗೆ PPF ಖಾತೆ ಇದೆ. ತೆರಿಗೆ ಉಳಿಸಲು ಮಾರ್ಗದರ್ಶನ ಮಾಡಿರಿ.

ಉತ್ತರ: ಸರ್ಕಾರವೇ ಫೋಷಿಸಿರುವ ಸ್ಟ್ಯಾಂಡರ್ಡ್‌ ಡಿಡಕ್ಷನ್‌ನಿಂದ ನಿಮ್ಮ ವಾರ್ಷಿಕ ಆದಾಯವು ₹ 3 ಲಕ್ಷದೊಳಗೆ ಇರುವಾಗ ಐ.ಟಿ ರಿಟರ್ನ್‌ ತುಂಬುವ ಅವಶ್ಯವಿಲ್ಲ. ತೆರಿಗೆ ಬರುವುದಾದಲ್ಲಿ ನಿಮಗೆ PPF ಖಾತೆ ಇರುವಲ್ಲಿ ಗರಿಷ್ಠ ₹ 1.50 ಲಕ್ಷ ತುಂಬಿ ತೆರಿಗೆ ಉಳಿಸಬಹುದು.

** 

-ಬಸವರಾಜ. ಕೆ. ಕಲಬುರ್ಗಿ, ಧಾರವಾಡ

ನಾನು 2008ರಲ್ಲಿ ₹ 2 ಲಕ್ಷ ಕೊಟ್ಟು ನಿವೇಶನ ಖರೀದಿಸಿದ್ದೆ. ಅದನ್ನು ನನ್ನ ಮಗನಿಗೆ ದಾನವಾಗಿ ಕೊಟ್ಟಿದ್ದೇನೆ. 2017ರಲ್ಲಿ ನನ್ನ ಮಗ ಬ್ಯಾಂಕ್ ಸಾಲ ಮಾಡಿ ಮನೆ ಖರೀದಿಸಿದ್ದಾನೆ. ದಾನ ಮಾಡಿದ ನಿವೇಶನ 2018ರಲ್ಲಿ ₹ 8 ಲಕ್ಷಕ್ಕೆ ಮಾರಾಟ ಮಾಡಿ ಬ್ಯಾಂಕಿನ ಸಾಲ ಮರು‍ಪಾವತಿಸಿದ್ದೇನೆ. ಇಲ್ಲಿ ಕ್ಯಾಪಿಟಲ್‌ ಗೇನ್ ಟ್ಯಾಕ್ಸ್‌ ಬರುತ್ತಿದೆಯೇ ತಿಳಿಸಿರಿ.

ಉತ್ತರ: ನಿಮ್ಮ ಮಗನಿಗೆ ನೀವು ದಾನವಾಗಿ ಕೊಟ್ಟ ನಿವೇಶನಕ್ಕೆ ನಿಮಗಾಗಲಿ ನಿಮ್ಮ ಮಗನಿಗಾಗಲಿ ಯಾವುದೇ ತೆರಿಗೆ ಬರುವುದಿಲ್ಲ.  ಪ್ರಾರಂಭದಲ್ಲಿ ನಿವೇಶನ ಖರೀದಿಗೆ ಕೊಟ್ಟ ₹ 2 ಲಕ್ಷ ಹಾಗೂ ನಿವೇಶನ ಮಾರಾಟ ಮಾಡಿ ಬಂದಿರುವ ಲಾಭದಲ್ಲಿ Cost of inflation index  ಕಳೆದು ಉಳಿದ ಹಣಕ್ಕೆ ತೆರಿಗೆ ಸಲ್ಲಿಸಬೇಕು. ತೆರಿಗೆ ಉಳಿಸಲು ಸೆಕ್ಷನ್ 54 EC ಆಧಾರದ ಮೇಲೆ 5 ವರ್ಷಗಳ ಅವಧಿಗೆ NHAI or REC ಯಲ್ಲಿ ಗರಿ‌ಷ್ಠ ₹ 50 ಲಕ್ಷ ತೊಡಗಿಸಬಹುದು.

**

-ಲಕ್ಷ್ಮೀ, ಊರು ಬೇಡ

ನಾನು ಅಂಗವಿಕಲೆ. ವಿವಾಹವಾಗಿದೆ. ಪದವಿಪೂರ್ವ ಕಾಲೇಜಿನಲ್ಲಿ ಉಪನ್ಯಾಸಕಿ. ಒಟ್ಟು ಸಂಬಳ ₹ 45,311. ಸುಮಾರು ₹ 1,360 ಕಡಿತವಿದೆ. ನನ್ನ ಅಂಗವಿಕಲತೆಯಿಂದಾಗಿ ತೆರಿಗೆ ವಿನಾಯ್ತಿ ಎಷ್ಟು ಇದೆ. ಶೇ 50 ಅಂಗವಿಕಲತೆ ಇದೆ. ಮ್ಯೂಚುವಲ್ ಫಂಡ್‌ನಲ್ಲಿ ಅಥವಾ ಅಂಚೆ ಕಚೇರಿ ಹೂಡಿಕೆಯಲ್ಲಿ ತೆರಿಗೆ ಉಳಿಸಲು ದಾರಿ ತೋರಿರಿ.

ಉತ್ತರ: ನೀವು ತೆರಿಗೆ ಉಳಿಸಲು, ಸೆಕ್ಷನ್‌ 80C ಹೊರತುಪಡಿಸಿ ಸೆಕ್ಷನ್ 80CCD ಆಧಾರದ ಮೇಲೆ ಗರಿಷ್ಠ ₹  50,000 ವಾರ್ಷಿಕವಾಗಿ ಹೂಡಿಕೆ ಮಾಡಿ ಪ್ರತ್ಯೇಕವಾಗಿ ವಿನಾಯ್ತಿ ಪಡೆಯಬಹುದು. ಅಂಚೆ ಕಚೇರಿ 5 ವರ್ಷದ ಅವಧಿ ಠೇವಣಿ ಅಥವಾ NSE ಆಥವಾ PPF ಕೂಡಾ ತೆರಿಗೆ ಉಳಿಸಲು ಉಪಯುಕ್ತವಾಗಿದ್ದು ನೀವು ಈಗಲೇ LIC-KGID, NPS, PLI, PF ಕಟ್ಟುತ್ತಿದ್ದಲ್ಲಿ ಈ ಮೊತ್ತ ₹ 1.50 ಲಕ್ಷದೊಳಗೆ ಇರುವಲ್ಲಿ ಮಾತ್ರ NSC-PPF ಅಂಚೆ ಕಚೇರಿ 5 ವರ್ಷದ ಠೇವಣಿಯಲ್ಲಿ ಉಳಿದ ಹಣ ಹೂಡುವುದು ಸೂಕ್ತ.

ಸೆಕ್ಷನ್ 80U ಆಧಾರದ ಮೇಲೆ ನಿಮ್ಮ ಅಂಗವಿಕಲತೆ ಶೇ 50 ಇರುವುದರಿಂದ, ಪ್ರತ್ಯೇಕವಾಗಿ ₹  75,000ಗಳನ್ನು ನಿಮ್ಮ ಒಟ್ಟು ಆದಾಯದಿಂದ ಕಳೆದು ತೆರಿಗೆ ಸಲ್ಲಿಸಬಹುದು. (ತೀವ್ರತೆಯಾಗಿದ್ದರೆ ₹ 1.25 ಲಕ್ಷ) ಸೆಕ್ಷನ್ 80U  ವಿನಾಯ್ತಿ ಸೆಕ್ಷನ್ 80C – 80CCD (1B) ಹೊರತುಪಡಿಸಿ ಇರುತ್ತದೆ. ಸದ್ಯ ತೆರಿಗೆ ಉಳಿಸಲು ಮ್ಯೂಚುವಲ‌್ ಫಂಡ್‌ನಲ್ಲಿ ಹೂಡಿಕೆ ಮಾಡುವ ಅವಶ್ಯಕತೆ ಇಲ್ಲ. 

**

-ಹೆಸರು ಬೇಡ, ಬಾಗಲಕೋಟೆ

ನಾನು ಸರ್ಕಾರಿ ಉದ್ಯೋಗಿ. ವಾರ್ಷಿಕ ಸಂಬಳ  ₹ 15 ಲಕ್ಷ. 80C  ಉಳಿತಾಯ  ₹ 1.50 ಲಕ್ಷ. ಈಗ ನನ್ನ ತಂದೆಯವರಿಂದ ಸುಮಾರು 8 ಎಕರೆ ಜಮೀನು ಬಂದಿದ್ದು ಅದರಲ್ಲಿ ವಾರ್ಷಿಕ  ₹  2 ಲಕ್ಷ ಆದಾಯ ಬರುತ್ತದೆ. ಈ ಆದಾಯ ನನ್ನ ಆದಾಯಕ್ಕೆ ಸೇರಿಸಿ ತೆರಿಗೆ ಸಲ್ಲಿಸಬೇಕೇ ತಿಳಿಸಿರಿ. ವಿನಾಯ್ತಿ ಇದ್ದರೆ ಯಾವ ಕಲಂ ನಡಿ ಇರುತ್ತದೆ.

ಉತ್ತರ: ನೀವು ಕೃಷಿ ಜಮೀನಿನಿಂದ ಬಂದ ಆದಾಯ ತೆರಿಗೆ ಸೆಕ್ಷನ್‌ 10 (1) ಆಧಾರದ ಮೇಲೆ ಸಂಪೂರ್ಣ ವಿನಾಯ್ತಿ ಪಡೆದಿದೆ. ಆದರೆ, ಈ ಹಣ ಠೇವಣಿಯಾಗಿರಿಸಿದಾಗ ಬರುವ ಬಡ್ಡಿ ನಿಮ್ಮ ಒಟ್ಟು ಆದಾಯಕ್ಕೆ ಸೇರಿ, ಮಿತಿಗಿಂತ ಹೆಚ್ಚಿನ ಆದಾಯಕ್ಕೆ ತೆರಿಗೆ ಕೊಡಬೇಕಾಗುತ್ತದೆ.

**

-ಪಿ.ಪಿ. ರಂಗನಾಥ, ವಿ.ವಿ. ಪುರಂ, ಬೆಂಗಳೂರು

ನಾನು ಸಹಕಾರಿ ಸಂಸ್ಥೆಯಿಂದ ನಿವೃತ್ತನಾದ ಹಿರಿಯ ನಾಗರಿಕ. ನನಗೆ ನನ್ನ ಸಂಸ್ಥೆಯಿಂದ ಯಾವುದೇ ಮಾಸಿಕ ಪಿಂಚಣಿ ಇಲ್ಲ. Employees P.F. organization ನಿಂದ EPS-95 ಯೋಜನೆ ಅಡಿಯಲ್ಲಿ ಮಾಸಿಕ ₹  2,100 ಪಿಂಚಣಿ ಬರುತ್ತದೆ. ಇದರ ಜತೆಗೆ ಮಾಸಿಕ  ₹ 6,500 ಕೂಡ ಬರುತ್ತದೆ. LIC ಜೀವನ ಆಧಾರದಿಂದ  ₹ 3,000 ಬರುತ್ತದೆ. ನಾನು 1–4–2018 ರಿಂದ ₹ 40,000 Standard Dedection ಪಡೆಯಬಹುದೇ, ಅದೇ ರೀತಿ ಹಿರಿಯ ನಾಗರಿಕರಿಗೆ ಕೊಡುವ  ₹ 50,000 ಠೇವಣಿ ಬಡ್ಡಿ ನನಗೆ ಅನ್ವಯವಾಗುತ್ತಿದೆಯೇ ತಿಳಿಸಿರಿ.

ಉತ್ತರ: 1–4–2018 ರಿಂದ ಓರ್ವ ವ್ಯಕ್ತಿ ಒಂದು ಸಂಸ್ಥೆಯಿಂದ ಕೆಲಸ ನಿರ್ವಹಿಸಿ ನಿವೃತ್ತನಾದಲ್ಲಿ, ಅಂತಹ ಸಂಸ್ಥೆ ಖಾಸಗಿ ಅಥವಾ ಸರ್ಕಾರಿಯಾದರೂ, ಪಿಂಚಣಿ ನಿಯಮಾವಳಿಯಂತೆ, ನಿವೃತ್ತನಾದ ನೌಕರರಿಂದ ಯಾವುದೇ ಹಣವನ್ನು ಮುಂದಾಗಿ ಪಡೆಯದೇ, ನಿವೃತ್ತಿ ನಂತರ ಪಿಂಚಣಿ ನೀಡುತ್ತಿರುವಲ್ಲಿ ಮಾತ್ರ ಅಂತಹ ವ್ಯಕ್ತಿಗೆ  ₹ 40,000 Standard Dedution ಇರುತ್ತದೆ.

PF-LIC ಮತ್ತಿತರ ಮೂಲಗಳಿಂದ ಪಡೆಯುವ ಹಣವು ಪಿಂಚಣಿ ಎಂದು ಕರೆದರೂ, ಇದು ನಿಮ್ಮ ಹಣದಿಂದ ಬರುವ ಸೌಲತ್ತಾಗಿದ್ದು ನಿಜವಾಗಿ ಪಿಂಚಣಿಯಾಗುವುದಿಲ್ಲ. ಇದನ್ನು ವರ್ಷಾಸನ (ANNUITY) ಎಂದು ಕರೆಯುತ್ತಾರೆ. ಇದೇ ಬೇಳೆ ನೀವು 1–4–2018 ರಿಂದ ನಿಮ್ಮ ಬಡ್ಡಿ ಆದಾಯದಿಂದ, ಬ್ಯಾಂಕ್, ಅಂಚೆ ಕಚೇರಿ ಠೇವಣಿಗಳಿಂದ ಬರುವ ಬಡ್ಡಿಯಲ್ಲಿ ಗರಿಷ್ಠ  ₹ 50,000 ರಿಯಾಯ್ತಿ ಪಡೆಯಬಹುದು.

ವಿ.ಸೂ.:  ₹ 50,000 ಠೇವಣಿಯಿಂದ ಬರುವ ಬಡ್ಡಿಯ ವಿಚಾರದಲ್ಲಿ ಕೋ ಆಪರೇಟಿವ್ ಬ್ಯಾಂಕ್ ಠೇವಣಿಗೂ ಅನ್ವಯಿಸುತ್ತದೆ.

 **

-ಡಾ. ಎನ್. ಗೋಪಾಲಕೃಷ್ಣ, ಬೆಂಗಳೂರು

ನಾನು ಕೇಂದ್ರ ಸರ್ಕಾರದ ನಿವೃತ್ತ ಅಧಿಕಾರಿ. ₹ 2,000 ರಂತೆ Reliance top 200, Reliance equity opportunity fund - units Reliance mid and small cap fund, UII 500 units ₹ 10 each ನಲ್ಲಿ ತಿಂಗಳಿಗೆ ₹ 11,000 ತೊಡಗಿಸುತ್ತಿದ್ದೇನೆ. ನನ್ನ ಹೂಡಿಕೆ ಸರಿ ಇದೆಯೇ ತಿಳಿಸಿರಿ.

ಉತ್ತರ: ರಿಲಯನ್ಸ್ ಹಾಗೂ ಯು.ಟಿ.ಐ. ಎರಡೂ ಉತ್ತಮ ಮ್ಯೂಚುವಲ್ ಫಂಡ್ಸ್ ಎನ್ನುವುದರಲ್ಲಿ ಎರಡು ಮಾತಿಲ್ಲ. ಮ್ಯೂಚುವಲ್ ಫಂಡ್‌ಗಳಲ್ಲಿ ತೊಡಗಿಸಿದ ಹಣ ಆಯಾಯ ಫಂಡ್‌ಗಳಲ್ಲಿ ನಮೂದಿಸಿದಂತೆ, ಹಣವನ್ನು ಷೇರುಮಾರುಕಟ್ಟೆಯಲ್ಲಿ ತೊಡಗಿಸುತ್ತಾರೆ.

ನಿಮ್ಮ ಫಂಡ್‌ಗಳ ಯುನಿಟ್ಟಿನ Net Asst Value ನೀವು Internetನಲ್ಲಿ ಪ್ರತೀ ದಿವಸ ನೋಡಬಹುದು. ಉಳಿತಾಯದಲ್ಲಿ ಭದ್ರತೆ, ದ್ರವ್ಯತೆ ಹಾಗೂ ಉತ್ತಮ ವರಮಾನ ಮುಖ್ಯವಾಗುತ್ತದೆ. ಮ್ಯೂಚುವಲ್ ಫಂಡ್‌ನಲ್ಲಿ ಉತ್ತಮ ವರಮಾನ ಅಥವಾ ನಿಶ್ಚಿತ ವರಮಾನ ಬಂದೇ ಬರುತ್ತದೆ ಎನ್ನುವುದನ್ನು ಹೇಳಲು ಸಾಧ್ಯವಿಲ್ಲ.

ಸಂವೇದಿ ಸೂಚ್ಯಂಕ ಮೇಲೆ ಹೋದಾಗಲೂ ಮ್ಯೂಚುವಲ್ ಫಂಡ್‌ನ ಹೂಡಿಕೆ ಕೆಲವೊಮ್ಮೆ ಮೇಲಕ್ಕೆ ಹೋಗದಿರುವ ಉದಾಹರಣೆಗಳುಂಟು. ನೀವು N.A.V. ನೋಡಿ ಹಾಗೂ ಸ್ವಲ್ಪ ಸಮಯ ಕಾಯಿರಿ, ನಿಜವಾಗಿ ನಿಮ್ಮ ಹೂಡಿಕೆ, ಬ್ಯಾಂಕ್ ಠೇವಣಿಗಿಂತ ಉತ್ತಮ ವರಮಾನ ತರುವಲ್ಲಿ ಮುಂದುವರೆಸಿರಿ.

**

-ಸುರೇಶ, ಜಮಖಂಡಿ

15G-15H ಫಾರಂ ಎಲ್ಲಿ ಸಿಗುತ್ತದೆ ಹಾಗೂ ಯಾವ ತಿಂಗಳಲ್ಲಿ ಬ್ಯಾಂಕಿಗೆ ಕೊಡಬೇಕು ತಿಳಿಸಿರಿ. ಬೀರೇಶ್ವರ ಕ್ರೆಡಿಟ್ ಸೊಸೈಟಿ ಇಲ್ಲಿ FD ಇಟ್ಟಿರುತ್ತೇನೆ. ಬ್ಯಾಂಕಿನಲ್ಲಿ ಸರಿಯಾಗಿ ತಿಳಿಸುತ್ತಿಲ್ಲ. ಜೊತೆಗೆ ಮೂಲದಲ್ಲಿಯೇ ತೆರಿಗೆ ಕಡಿತ (ಟಿಡಿಎಸ್‌) ಆದರೆ ನಾವು ಜವಾಬ್ದಾರರಲ್ಲ ಎನ್ನುತ್ತಾರೆ. ದಯಮಾಡಿ ಪರಿಹಾರ ನೀಡಿರಿ.

ಉತ್ತರ: ಬ್ಯಾಂಕುಗಳಲ್ಲಿ  ಫಾರಂ 15G ಅಥವಾ 15 H ಕೊಡದಿರುವಲ್ಲಿ ‘ಟಿಡಿಎಸ್‌’ ಮಾಡುತ್ತಾರೆ. ಕೋ ಆಪರೇಟಿವ್ ಸೊಸೈಟಿಗಳಿಗೆ ‘ಟಿಡಿಎಸ್‌’ ಅನ್ವಯಿಸುವುದಿಲ್ಲ. 15G / 15 H ಫಾರಂಗಳನ್ನು ಆಯಾ ಬ್ಯಾಂಕುಗಳೇ ಗ್ರಾಹಕರಿಗೆ ಒದಗಿಸುತ್ತವೆ. ಈ ಫಾರಂ ಪ್ರತೀ ವರ್ಷ ಏಪ್ರಿಲ್ ಒಂದನೆ ವಾರವೇ ಬ್ಯಾಂಕಿಗೆ ಸಲ್ಲಿಸತಕ್ಕದ್ದು.

ಎಲ್ಲಾ ಠೇವಣಿದಾರರು ವಾರ್ಷಿಕ ಬಡ್ಡಿ ₹ 10,000 ಪಡೆಯುತ್ತಿರುವಲ್ಲಿ ‘ಟಿಡಿಎಸ್‌’ ಆಗದಿರಲು ಈ ಫಾರಂ ಕೊಡಬೇಕು. ಆದರೆ 1–4–2018 ರಿಂದ ಹಿರಿಯ ನಾಗರಿಕರಾದಲ್ಲಿ ವಾರ್ಷಿಕವಾಗಿ ₹ 50,000 ಬಡ್ಡಿ ಬರುವಲ್ಲಿ 15H ಕೊಡುವ ಅವಶ್ಯವಿಲ್ಲ. (Section 80TTB ಆಧಾರದ ಮೇಲೆ ಹಿರಿಯ ನಾಗರಿಕರಿಗೆ ₹ 50,000 ಬಡ್ಡಿ ತನಕ ಆದಾಯ ತೆರಿಗೆಯಲ್ಲಿ 1–4–2018 ರಿಂದ ವಿನಾಯ್ತಿ ಇದೆ) ನಿಮ್ಮ ಪ್ರಶ್ನೆಯಿಂದ ಬಹಳಷ್ಟು ಜನರಿಗೆ ಉತ್ತರ ಸಿಕ್ಕಿದಂತಾಗಿದೆ.

**

ಹಣಕಾಸು ತೆರಿಗೆ ಸಮಸ್ಯೆಗೆ ಪರಿಹಾರ

ಹಣಕಾಸಿಗೆ ಸಂಬಂಧಿಸಿದ ಸಮಸ್ಯೆಗಳನ್ನು (ದೂರವಾಣಿ ಸಂಖ್ಯೆ ಸಹಿತ) ಪತ್ರದಲ್ಲಿ ಬರೆದು ಕಳುಹಿಸಿ.ಪರಿಣತರಿಂದ ಸೂಕ್ತ ಉತ್ತರ ಪಡೆಯಬಹುದು. ವಿಳಾಸ: ಪ್ರಶ್ನೋತ್ತರ, ವಾಣಿಜ್ಯ ವಿಭಾಗ, ಪ್ರಜಾವಾಣಿ, ನಂ.75, ಮಹಾತ್ಮ ಗಾಂಧಿ ರಸ್ತೆ, ಬೆಂಗಳೂರು–56001.

ಇ–ಮೇಲ್‌: businessdesk@prajavani.co.in

ಬರಹ ಇಷ್ಟವಾಯಿತೆ?

  • 6

    Happy
  • 0

    Amused
  • 0

    Sad
  • 1

    Frustrated
  • 0

    Angry

Comments:

0 comments

Write the first review for this !