ಸೂಚ್ಯಂಕ 333 ಅಂಶ ಕುಸಿತ

7
ಜಾಗತಿಕ ವಾಣಿಜ್ಯ ಸಮರದ ಭೀತಿ

ಸೂಚ್ಯಂಕ 333 ಅಂಶ ಕುಸಿತ

Published:
Updated:

ಮುಂಬೈ: ರೂಪಾಯಿ ಕುಸಿತ, ಕಚ್ಚಾ ತೈಲ ದರ ಏರಿಕೆ ಹಾಗೂ ಜಾಗತಿಕ ವಾಣಿಜ್ಯ ಸಮರದ ಆತಂಕಕ್ಕೆ ಒಳಗಾಗಿ ದೇಶದ ಷೇರುಪೇಟೆಗಳ ವಹಿವಾಟು ಇಳಿಕೆ ಕಂಡಿತು.

ಪ್ರಸಕ್ತ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಜಿಡಿಪಿ ಸೇ 8.2 ರಷ್ಟು ಪ್ರಗತಿ ಸಾಧಿಸಿದೆ. ಶುಕ್ರವಾರ ಷೇರುಪೇಟೆ ವಹಿವಾಟು ಮುಗಿದ ಬಳಿಕ ಈ ಅಂಕಿ–ಅಂಶ ಪ್ರಕಟವಾಗಿತ್ತು. ಇದು ಸೋಮವಾರ ಷೇರುಪೇಟೆಗಳ ಆರಂಭದ ವಹಿವಾಟಿನ ಮೇಲೆ ಸಕಾರಾತ್ಮಕ ಪ್ರಭಾವ ಬೀರಿ, ಸೂಚ್ಯಂಕದ ಏರಿಕೆಗೆ ಕಾರಣವಾಗಿತ್ತು.

ಮುಂಬೈ ಷೇರುಪೇಟೆ ಸಂವೇದಿ ಸೂಚ್ಯಂಕ (ಬಿಎಸ್‌ಇ) ಸಕಾರಾತ್ಮಕ ಮಟ್ಟದಲ್ಲಿ ವಹಿವಾಟು ಆರಂಭಿಸಿತ್ತು. 289 ಅಂಶ ಜಿಗಿತ ಕಂಡು ಗರಿಷ್ಠ ಮಟ್ಟವಾದ 38,934 ಅಂಶಗಳಿಗೆ ಏರಿಕೆಯಾಗಿತ್ತು.

ಆದರೆ ಆಗಸ್ಟ್‌ ತಿಂಗಳ ತಯಾರಿಕಾ ವಲಯದ ಸೂಚ್ಯಂಕ (ಪಿಎಂಐ) ಇಳಿಕೆಯಾಗಿರುವ ಸುದ್ದಿಯು ಷೇರುಪೇಟೆಯಲ್ಲಿ ಮಾರಾಟದ ಒತ್ತಡ ಸೃಷ್ಟಿಸಿತು. ಇದರಿಂದಾಗಿ ಸಂವೇದಿ ಸೂಚ್ಯಂಕ 333 ಅಂಶ ಕುಸಿತ ಕಂಡಿತು. ಒಂದು ವಾರಗಳ ಕನಿಷ್ಠ ಮಟ್ಟವಾದ 38,312 ಅಂಶಗಳಲ್ಲಿ ವಹಿವಾಟು ಅಂತ್ಯವಾಯಿತು.

ಆಗಸ್ಟ್‌ ತಿಂಗಳ ತಯಾರಿಕಾ ವಲಯದ ಸೂಚ್ಯಂಕ 52.3 ರಿಂದ 51.7ಕ್ಕೆ ಇಳಿಕೆಯಾಗಿದೆ ಎಂದು ನಿಕೇಯ್ ಇಂಡಿಯಾ ಸಂಸ್ಥೆ ಮಾಹಿತಿ ನೀಡಿದೆ. 

ಜಾಗತಿಕ ಮಟ್ಟದಲ್ಲಿ ಅಮೆರಿಕವು ಇರಾನ್‌ ಮೇಲೆ ಆರ್ಥಿಕ ನಿರ್ಬಂಧ ಹೇರುವ ಆತಂಕ ಮೂಡಿದೆ. ಇದರಿಂದ ಹೂಡಿಕೆದಾರರು ಮಾರಾಟಕ್ಕೆ ಹೆಚ್ಚು ಒತ್ತು ನೀಡಿದ್ದಾರೆ. ಇದರ ಜತೆಗೆ ಕಚ್ಚಾ ತೈಲ ದರ ಏರಿಕೆ, ರೂಪಾಯಿ ಕುಸಿತವೂ ನಕಾರಾತ್ಮಕ ವಹಿವಾಟಿಗೆ ಕಾರಣವಾಯಿತು.

ರಾಷ್ಟ್ರೀಯ ಷೇರುಪೇಟೆ ಸೂಚ್ಯಂಕ (ಎನ್‌ಎಸ್‌ಇ) 98 ಅಂಶ ಇಳಿಕೆಯಾಗಿ 11,582 ಅಂಶಗಳಲ್ಲಿ ವಹಿವಾಟು ಅಂತ್ಯವಾಗಿದೆ.

ಆಗಸ್ಟ್‌ 2ರ ನಂತರ ದಿನದ ವಹಿವಾಟಿನಲ್ಲಿ ಸೂಚ್ಯಂಕಗಳ ಗರಿಷ್ಠ ಕುಸಿತ ಇದಾಗಿದೆ. ಅಂದು ಸಂವೇದಿ ಸೂಚ್ಯಂಕ 367 ಅಂಶ ಹಾಗೂ ನಿಫ್ಟಿ 101 ಅಂಶಗಳಷ್ಟು ಇಳಿಕೆಯಾಗಿತ್ತು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !