ಸಾಂಗತ್ಯ ದೋಷ

7

ಸಾಂಗತ್ಯ ದೋಷ

ಗುರುರಾಜ ಕರಜಗಿ
Published:
Updated:

ವಾರಾಣಸಿಯಲ್ಲಿ ಬ್ರಹ್ಮದತ್ತ ರಾಜ್ಯಭಾರ ಮಾಡುವಾಗ ಬೋಧಿಸತ್ವ ಅವನ ಪ್ರಧಾನಮಂತ್ರಿಯಾಗಿದ್ದ. ರಾಜನ ಬಳಿ ಬಂದು ಅತ್ಯಂತ ಸುಂದರವಾದ, ಬಲಶಾಲಿಯಾದ ಆದರೆ ಅಷ್ಟೇ ಸದಾಚಾರ ಸಂಪನ್ನವಾದ ಮಹಿಲಾಮುಖ ಎಂಬ ಹೆಸರಿನ ಪಟ್ಟದ ಆನೆಯಿತ್ತು. ಅದು ತುಂಬ ಸಾತ್ವಿಕವಾದದ್ದು, ಯಾರಿಗೂ ಹಿಂಸೆ ಕೊಡುತ್ತಿರಲಿಲ್ಲ.

ಒಂದು ದಿನ ರಾತ್ರಿ ಕೆಲವು ಕಳ್ಳರು ಬಂದು ಈ ಗಜಶಾಲೆಯ ಹಿಂಭಾಗದಲ್ಲಿ ನೆಲೆ ಮಾಡಿಕೊಂಡರು. ಅವರು ಪ್ರತಿದಿನ ರಾತ್ರಿ ಬಂದು ಮಾಂಗಲಿಕ ಆನೆಯನ್ನು ಕಟ್ಟಿದ ಗಜಶಾಲೆಯ ಗೋಡೆಯ ಹಿಂದೆಯೇ ಕುಳಿತು ಮಾತನಾಡಿಕೊಳ್ಳುತ್ತಿದ್ದರು. ಅವರ ಮಾತೆಲ್ಲ, ಕನ್ನ ಹಾಕುವುದು ಹೇಗೆ? ಆ ಸಮಯದಲ್ಲಿ ಅಡ್ಡಬಂದವರನ್ನು ಕೊಲ್ಲುವುದು ಹೇಗೆ? ಕೈಗೆ ಸಿಕ್ಕವರನ್ನು ಚಿತ್ರಹಿಂಸೆಗೆ ಗುರಿಮಾಡುವುದು ಹೇಗೆ? ಲೂಟಿ ಮಾಡಿ, ಕನ್ನ ಹಾಕಿ ಬಂದ ದುಡ್ಡನ್ನು ಯಾವ ಪ್ರಮಾಣದಲ್ಲಿ ಹಂಚಿಕೊಳ್ಳುವುದು? ಈ ವಿಷಯಗಳ ಬಗ್ಗೆಯೇ ಇರುತ್ತಿತ್ತು. ಮಧ್ಯರಾತ್ರಿ ವಾತಾವರಣ ತುಂಬ ಶಾಂತವಾಗಿರುತ್ತಿದ್ದುದರಿಂದ ಅವರ ಮಾತುಗಳನ್ನೆಲ್ಲ ಮಾಂಗಲಿಕ ಆನೆ ಕೇಳಿಸಿಕೊಳ್ಳುತ್ತಿತ್ತು. ದಿನನಿತ್ಯವೂ ಈ ದುರಾಚಾರದ, ಹಿಂಸೆಯ ಮಾತುಗಳನ್ನು ಕೇಳುತ್ತ ಅದು ತನಗೇ ಯಾರೋ ಮಾಡುತ್ತಿರುವ ಪಾಠ ಎಂದು ಭಾವಿಸಿಕೊಂಡಿತು. ಅವರು ಹೇಳುವುದೇ ಸರಿ, ತಾನೂ ಇನ್ನು ಮೇಲೆ ಹಾಗೆಯೇ ಇರಬೇಕು ಎಂದುಕೊಂಡು ಮರುದಿನದಿಂದ ಉಗ್ರವಾಯಿತು.

ಬೆಳಿಗ್ಗೆ ಆಹಾರ ನೀಡಲು ಬಂದ ಮಾವುತನನ್ನು ಸೊಂಡಿಲಿನಿಂದ ಹಿಡಿದೆತ್ತಿ ನೆಲಕ್ಕೆ ಅಪ್ಪಳಿಸಿ ಕೊಂದು ಹಾಕಿತು. ಅವನನ್ನು ಪಾರು ಮಾಡಲು ಬಂದ ಎರಡನೆಯ ಹಾಗೂ ಮೂರನೆಯ ಮಾವುತರನ್ನೂ ಹೊಸಕಿ ಹಾಕಿತು ಮದವೇರಿದ ಆನೆ. ಗಜಶಾಲೆಯ ಗೋಡೆಯನ್ನು ಒದೆಯುತ್ತ, ಬಾಗಿಲನ್ನು ನೂಕುತ್ತ ಗದ್ದಲವನ್ನೆಬ್ಬಿಸಿತು. ಅದರ ಹತ್ತಿರ ಹೋಗುವುದಕ್ಕೆ ಎಲ್ಲರಿಗೂ ಭಯ. ದೂರು ರಾಜನ ಬಳಿಗೆ ಹೋಯಿತು. ರಾಜ ಚಿಂತಿತನಾಗಿ ಬೋಧಿಸತ್ವನಿಗೆ ಹೇಳಿದ, ಇಷ್ಟು ಸುಶೀಲವಾಗಿದ್ದ, ಶಾಂತನಾಗಿದ್ದ ಪಟ್ಟದಾನೆ ಏಕೆ ಹೀಗೆ ಒಮ್ಮೆಲೇ ಉಗ್ರವಾಗಿದೆ? ದಯವಿಟ್ಟು ಕಾರಣವನ್ನು ಕಂಡುಹಿಡಿದು ಪರಿಹಾರವನ್ನು ಸೂಚಿಸು”. ಬೋಧಿಸತ್ವ ಗಜಶಾಲೆಗೆ ಹೋದ. ಆನೆಯನ್ನು ಸೂಕ್ಷ್ಮವಾಗಿ ಗಮನಿಸಿದ. ಅದರ ಶರೀರದಲ್ಲಿ ಯಾವ ಕಾಯಿಲೆಯ ಲಕ್ಷಣಗಳೂ ಇಲ್ಲ. ಮದವೇರಿದಂತೆಯೂ ಇಲ್ಲ. ಅದರ ಮನಸ್ಸಿನಲ್ಲೇ ಏನೋ ಬದಲಾವಣೆ ಆಗಿರಬೇಕು ಎಂದುಕೊಂಡು ಅದರ ಪರಿಸರವನ್ನು ನೋಡತೊಡಗಿದ. ಮಧ್ಯರಾತ್ರಿ ಯಾರದೋ ಮಾತು ಕೇಳಿಸಿದಂತಾಗಿ ಯಾರಿಗೂ ಕಾಣದಂತೆ ಮರೆಗೆ ನಿಂತು ನೋಡಿದ. ಕಳ್ಳರು, ಲೂಟಿಕೋರರು ಹಣ ಹಂಚಿಕೊಳ್ಳುವುದನ್ನು, ಮಾತನಾಡುವುದನ್ನು ಕಂಡ. ನಾಲ್ಕಾರು ದಿನ ಗಮನಿಸಿದ ಮೇಲೆ ಈ ಕಳ್ಳರ ಮಾತು, ನಡವಳಿಕೆ ಆನೆಯ ಮನಸ್ಸಿನ ಮೇಲೆ ಪರಿಣಾಮ ಬೀರಿರುವುದನ್ನು ಅರಿತ. ಅದೇ ದಿನವೇ ಕಳ್ಳರನ್ನು ಬಂಧಿಸಿ, ಮರುದಿನದಿಂದ ಆನೆಯ ಮುಂದೆ ಸಜ್ಜನರಿಂದ ಶಾಂತಿ, ಸಮಾಧಾನ, ಶೀಲಗಳ ಬಗ್ಗೆ ಮಾತುಗಳನ್ನು ಏರ್ಪಡಿಸಿ, ಭಜನೆಗಳನ್ನು ಯೋಜಿಸಿದ.

ನಾಲ್ಕು ದಿನಗಳಲ್ಲಿ ಆನೆ ಈ ಪಾಠ ತನಗೇ ಎಂದು ತಿಳಿದು ಮರಳಿ ತನ್ನ ಶಾಂತ ಸ್ವಭಾವಕ್ಕೆ ಮರಳಿತು. ಬೋಧಿಸತ್ವ ರಾಜನಿಗೆ ಹೇಳಿದ. “ಆನೆ ದುಷ್ಟರಾಗಿದ್ದ ಅವಿವೇಕಿಗಳ ಮಾತುಗಳನ್ನು ಕೇಳಿ ಕೇಳಿ ತಾನೂ ಅಂತೆಯೇ ಆಗಿತ್ತು. ಈಗ ಸಜ್ಜನರ ಮಾತುಗಳಿಂದ ಪ್ರಭಾವಿತವಾಗಿ ಮೊದಲಿನ ಗುಣ ಪಡೆದಿದೆ”.

ಇದು ಆನೆಗೆ ಮಾತ್ರವಲ್ಲ, ನಮಗೂ ಅನ್ವಯಿಸಿದ್ದು. ನಾವು ಎಂಥವರ ಜೊತೆಗೆ ಸ್ನೇಹ ಮಾಡುತ್ತೇವೋ, ಅವರ ಗುಣಗಳು ನಮಗೂ ಅಂಟಿಕೊಳ್ಳುತ್ತವೆ. ನಿಮ್ಮ ಸ್ನೇಹಿತರು ಎಂಥವರು ಎನ್ನುವುದರಿಂದ ನೀವು ಯಾರು ಎನ್ನುವುದು ಅರ್ಥವಾಗುತ್ತದೆ.

ಬರಹ ಇಷ್ಟವಾಯಿತೆ?

  • 20

    Happy
  • 0

    Amused
  • 1

    Sad
  • 0

    Frustrated
  • 0

    Angry

Comments:

0 comments

Write the first review for this !