7

ನಾಯಕತ್ವದ ಜವಾಬ್ದಾರಿ

ಗುರುರಾಜ ಕರಜಗಿ
Published:
Updated:

ಬದುಕಿಗಾರ್ ನಾಯಕರು, ಏಕನೊ ಅನೇಕರೋ?||
ವಿಧಿಯೊ ಪೌರುಷವೊ ಧರುಮವೊ ಅಂಧಬಲವೋ ||
ಕುದುರುವುದೆಂತು ಈಯವ್ಯವಸ್ಥೆಯ ಪಾಡು? |
ಅದಿಗುದಿಯೆ ಗತಿಯೇನೊ? - ಮಂಕುತಿಮ್ಮ ||೭||

(ಬದುಕಿಗಾರ್ = ಬದುಕಿಗೆ+ಯಾರು, ಈಯವ್ಯವಸ್ಥೆಯ = ಈ+ಅವ್ಯವಸ್ಥೆಯ, ಅದಿಗುದಿ=ತಳವಳ)

ಈ ಬದುಕಿಗೆ ಯಾರು ನಾಯಕರು? ಒಬ್ಬನೇ ಇದ್ದಾನೆಯೇ, ಅನೇಕರಿದ್ದಾರೆಯೇ? ಅಥವಾ ವಿಧಿ, ಪೌರುಷ, ಧರ್ಮ, ಅಂಧಬಲ ಇವುಗಳೇ ನಾಯಕರೋ? ಈ ಅವ್ಯವಸ್ಥೆಯ ಗೂಡಾದ ಬದುಕು ಸರಿಯಾಗುವುದೆಂತು? ಅಥವಾ ಹೀಗೆ ತಳಮಳಪಡುವುದೇ ನಮ್ಮ ಗತಿಯೇ?

ನನ್ನ ಬದುಕಿನ ಹಡಗಿಗೆ ನಾಯಕನಾರು? ನನ್ನ ಬದುಕಾದರೂ ನನ್ನ ಕೈಯಲ್ಲಿದೆಯೇ? ನನ್ನ ಹುಟ್ಟು ನನ್ನ ತೀರ್ಮಾನವಲ್ಲ, ಅದು ತಂದೆ-ತಾಯಿಯರದು. ನನ್ನ ಹೆಸರೂ ಹಿರಿಯರೇ ಕೊಟ್ಟಿದ್ದು. ನನಗೆ ಭಾಷೆ, ಮಾತು, ತಿಳುವಳಿಕೆ ನೀಡಿದ್ದು ಪರಿವಾರ, ಶಾಲೆ, ಕಾಲೇಜು, ಸಮಾಜ. ನನಗೆ ಬಂದ ಜ್ಞಾನವೂ ಈ ಪ್ರಪಂಚದಿಂದ ಪಡೆದ ಸಾಲ. ಕೊನೆಗೆ ಸಾವೂ ನನ್ನ ಕೈಯಲಿಲ್ಲ, ಉಳಿದ ದೇಹಕ್ಕೆ ಏನು ಮಾಡಬೇಕೆನ್ನುವ ತೀರ್ಮಾನವೂ ಮತ್ತೊಬ್ಬರದೇ. ಹಾಗಾದರೆ ನನ್ನದು ಎನ್ನುವುದು ಯಾವುದು?

ಇಷ್ಟಾದರೂ ಪ್ರಪಂಚದ ಇತಿಹಾಸವನ್ನು ಗಮನಿಸಿದರೆ ಅನೇಕ ಅದ್ಭುತ ನಾಯಕರು ಕಣ್ಣಿಗೆ ಬೀಳುತ್ತಾರೆ. ಅವರ ನಾಯಕತ್ವ ಬಂದದ್ದು ಹೇಗೆ? ಯಾವ ಕಾರಣದಿಂದ? ಕೆಲವರ ಬದುಕಿನಲ್ಲಿ ವಿಧಿ ಆಟವಾಡಿ ಅವರನ್ನು ಒಂದು ರಾಜ್ಯದ, ರಾಷ್ಟ್ರದ ನಾಯಕರನ್ನಾಗಿ ಮಾಡಿದ್ದನ್ನು ಮತ್ತು ಬಹು ಸಮರ್ಥರಾದವರಿಗೆ ಆ ಅವಕಾಶಗಳನ್ನು ತಪ್ಪಿಸಿದ್ದನ್ನು ಕಂಡಿದ್ದೇವೆ. ಕೆಲವರು ಪೌರುಷದಿಂದ ಹೋರಾಡಿ ಇತಿಹಾಸದಲ್ಲಿ ಶಾಶ್ವತ ರಾಗಿದ್ದಾರೆ. ಮಹಾಭಾರತದ ಅಭಿಮನ್ಯುವಾಗಲಿ, ಸ್ವಾತಂತ್ರ್ಯಪೂರ್ವದ ಝಾನ್ಸಿ ಲಕ್ಷ್ಮೀಬಾಯಿಯಾಗಲಿ, ನಮ್ಮ ಕಿತ್ತೂರಿನ ಚೆನ್ನಮ್ಮನಾಗಲಿ ತಮ್ಮ ಶೌರ್ಯದಿಂದ ನಾಯಕರಾದವರು. ತಾವು ನಂಬಿದ್ದ ಧರ್ಮವನ್ನು ತಪ್ಪದೇ ಪಾಲಿಸಿ ನಾಯಕರಾದವರ ಸಾಲುಸಾಲೇ ಇದೆ. ರಾಜಧರ್ಮದ ಯುಧಿಷ್ಠಿರ, ವಚನಧರ್ಮದ ಭೀಷ್ಮ, ಅಹಿಂಸಾಧರ್ಮದ ಗಾಂಧೀಜಿ, ಸಮಾನತೆಯ ಧರ್ಮದ ಬಸವಣ್ಣ ಇವರೆಲ್ಲ ಸರ್ವಕಾಲಕ್ಕೂ ಮಾನ್ಯರಾದವರು. ಇದೇ ಇತಿಹಾಸದ ಪುಟಗಳಲ್ಲಿ ದೈತ್ಯಬಲದಿಂದ, ಕ್ರೌರ್ಯದಿಂದ ಸ್ಥಾನ ಗಳಿಸಿದವರೂ ಇದ್ದಾರೆ. ಸದಾ ದ್ವೇಷದಲ್ಲಿ ಕುದಿಯುತ್ತ ಅನ್ಯಾಯಗೈದ ದುರ್ಯೋಧನ, ಒಂದು ಜನಾಂಗವನ್ನು ದ್ವೇಷಿಸುವ ನೆಪದಲ್ಲಿ ಲಕ್ಷಾಂತರ ನಿರಪರಾಧಿಗಳ ಮಾರಣ ಹೋಮ ಮಾಡಿ ಅಂಧಬಲ ಮೆರೆದ ಹಿಟ್ಲರ್, ಇಂದಿಗೂ ಮತಾಂಧತೆಯಲ್ಲಿ ಪ್ರಪಂಚವನ್ನು ತಲ್ಲಣಗೊಳಿಸುತ್ತಿರುವ ಉಗ್ರರೆಲ್ಲರೂ ತಮ್ಮ ರಾಕ್ಷಸೀ ಶಕ್ತಿಯನ್ನು ಬಂಡವಾಳ ಮಾಡಿಕೊಂಡೇ ಮಂಚೂಣಿಗೆ ಬಂದವರು.ಹಾಗಾದರೆ ನಮ್ಮ ಒಂದೊಂದು ಜೀವನಕ್ಕೆ ಅನೇಕ ನಾಯಕರು ಇರುವುದಾದರೆ, ಅನೇಕರು ತಮ್ಮ ಬದುಕಿನ ಸಿದ್ಧಿಗೆ ವಿಧಿಯನ್ನೋ, ಧರ್ಮವನ್ನೋ, ಪೌರುಷವನ್ನೋ ಅಥವಾ ಕ್ರೌರ್ಯದ, ಅಂಧಬಲವನ್ನು ಪಡೆಯುವುದಾದರೆ, ಈ ಪ್ರಪಂಚದ ತಳಮಳ ಹೇಗೆ ಕಡಿಮೆಯಾದೀತು? ಪ್ರತಿಯೊಬ್ಬರ ವಿಧಿವಿಧಾನಗಳು ಒಂದು ರೀತಿಯ ಅವ್ಯವಸ್ಥೆಯನ್ನೂ ನಿರ್ಮಾಣಮಾಡುವುದಿಲ್ಲವೇ? ಪ್ರಪಂಚದ ವ್ಯವಸ್ಥೆಯೇ ಹೀಗಿದೆಯೇ? ಅವ್ಯವಸ್ಥೆಯೇ ಅವಸ್ಥೆಯಾದಾಗ ನಮ್ಮೆಲ್ಲರ ಬದುಕು ಸದಾಕಾಲದ ತಳಮಳವೇ ಆದೀತೇ? ಇವೆಲ್ಲ ನಮ್ಮ ಪ್ರಶ್ನೆಗಳು. ಇವುಗಳಿಗೆ ಸಮಾಧಾನಗಳನ್ನು ನಾವೇ ಹುಡುಕಿಕೊಳ್ಳಬೇಕು.

ಬರಹ ಇಷ್ಟವಾಯಿತೆ?

  • 6

    Happy
  • 0

    Amused
  • 2

    Sad
  • 0

    Frustrated
  • 0

    Angry

Comments:

0 comments

Write the first review for this !