ಏಕಕಾಲಕ್ಕೆ ಚುನಾವಣೆ ಸಲಹೆ ಕೋರಿದ ಕಾನೂನು ಆಯೋಗ

ಸಂವಿಧಾನ ಮತ್ತು ಸಂಬಂಧಪಟ್ಟ ಕಾನೂನುಗಳಿಗೆ ತಿದ್ದುಪಡಿ ತರುವ ಮೂಲಕ ಏಕಕಾಲದಲ್ಲಿ ಚುನಾವಣೆ ನಡೆಸುವುದು ಸಾಧ್ಯವಿದೆ ಎಂದು ಆಯೋಗ ಹೇಳಿದೆ.

ಏಕಕಾಲದಲ್ಲಿ ಚುನಾವಣೆ ನಡೆಸುವ ಯೋಜನೆಯನ್ನು ಎರಡು ಹಂತಗಳಲ್ಲಿ ಪೂರ್ಣಗೊಳಿಸಬಹುದು. 2019ರ ಮೊದಲ ಭಾಗದಲ್ಲಿ ಒಂದು ಹಂತವನ್ನು ಜಾರಿಗೆ ತಂದರೆ, 2024ರಲ್ಲಿ ಇದನ್ನು ಪೂರ್ಣವಾಗಿ ಜಾರಿಗೊಳಿಸಬಹುದು. 2021ರೊಳಗೆ ಅವಧಿ ಮುಗಿಯುವ ವಿಧಾನಸಭೆಗಳಿಗೆ 2019ರಲ್ಲಿ ಮೊದಲ ಹಂತದಲ್ಲಿ ಚುನಾವಣೆ ನಡೆಸಬಹುದು. ಉಳಿದ ರಾಜ್ಯಗಳಿಗೆ 2024ರಲ್ಲಿ ಚುನಾವಣೆ ಮಾಡಬಹುದು ಎಂದು ಆಯೋಗ ತಿಳಿಸಿದೆ.

ಆದರೆ, ಇದಕ್ಕಾಗಿ ಲೋಕಸಭೆ ಹಾಗೂ ವಿಧಾನಸಭೆಗಳ ಅಧಿಕಾರಾವಧಿಗೆ ಸಂಬಂಧಿಸಿದ ಸಂವಿಧಾನದ 83 (2) ಮತ್ತು 172 (1) ವಿಧಿಗಳು ಹಾಗೂ ಜನಪ್ರತಿನಿಧಿ ಕಾಯ್ದೆಗೆ ತಿದ್ದುಪಡಿ ತರಬೇಕಿದೆ.

ಈ ತಿದ್ದುಪಡಿಗಳಿಗೆ ಬಹುಸಂಖ್ಯೆಯ ರಾಜ್ಯಗಳು ಅನುಮೋದನೆ ನೀಡಬೇಕು ಎಂದು ಆಯೋಗ ಹೇಳಿದೆ. ಸಂವಿಧಾನ ತಜ್ಞರು, ರಾಜಕೀಯ ಪಕ್ಷಗಳು ಮತ್ತು ಇತರರು ತಮ್ಮ ಅಭಿಪ್ರಾಯಗಳನ್ನು ಮೇ 8ರೊಳಗೆ ನೀಡುವಂತೆ ಆಯೋಗ ಹೇಳಿದೆ.