ಬೆರಗಿನ ಬೆಳಕು | ಕಾಮನೆಗಳ ತ್ಯಾಗ

ಈಗ ಜನ ಅಣ್ಣನಿಗೆ ತೆರಿಗೆ ನೀಡತೊಡಗಿದರು. ಅವನಿಗೆ ಹಣದ, ಅಧಿಕಾರದ ಆಸೆ ಚಿಗುರತೊಡಗಿತು. ನಿಧಾನವಾಗಿ ಸುತ್ತಮುತ್ತಲಿನ ಹತ್ತಾರು ಗ್ರಾಮದ ಜನರು ಇವನನ್ನೇ ರಾಜ ಎಂದು ಕರೆಯುತ್ತ ಹಣ ನೀಡತೊಡಗಿದರು. ನಿಜವಾಗಿಯೂ ಅಣ್ಣನಿಗೆ ಈಗ ಅಧಿಕಾರದ ಹುಚ್ಚು ಹತ್ತಿತು. ನೂರಾರು ಜನರನ್ನು ಕರೆದುಕೊಂಡು ವಾರಾಣಸಿಗೆ ಹೋಗಿ, ಊರ ಹೊರಗೆ ನಿಂತು, ‘ನೀನು ರಾಜ್ಯದ ಅರ್ಧವನ್ನು ನನಗೆ ಕೊಡುತ್ತೀಯೋ ಅಥವಾ ಯುದ್ಧ ಮಾಡುತ್ತೀಯೋ’ ಎಂದು ಸಂದೇಶ ಕಳುಹಿಸಿದ. ತಾನೇ ರಾಜ್ಯ ಬೇಡೆಂದು ಹೋದವನು ಈಗ ಯುದ್ಧಕ್ಕೆ ಬಂದಿದ್ದಾನಲ್ಲ, ನನಗೆ ರಾಜ್ಯವೇ ಬೇಡ ಅವನೇ ರಾಜನಾಗಲಿ ಎಂದು ಅಣ್ಣನಿಗೇ ರಾಜ್ಯವನ್ನು ವಹಿಸಿಕೊಟ್ಟುಬಿಟ್ಟ.

ಅಂದಿನಿಂದ ಅಣ್ಣನ ಅಧಿಕಾರ ಲಾಲಸೆ ತುಂಬ ಹೆಚ್ಚಾಗಿ ಬೇರೆ ಪಕ್ಕದ ರಾಜ್ಯಗಳ ಮೇಲೆ ದಾಳಿ ಮಾಡತೊಡಗಿದ. ರಾಜ್ಯದ ಎಲ್ಲ ಧರ್ಮಕಾರ್ಯಗಳನ್ನು ನಿಲ್ಲಿಸಿಬಿಟ್ಟ. ದೇಶ ಅನಾಯಕ ಮತ್ತು ಅಧಾರ್ಮಿಕವಾಗತೊಡಗಿತು. ಇದನ್ನು ಸ್ವರ್ಗಲೋಕದಲ್ಲಿದ್ದ ಶಕ್ರ ಗಮನಿಸಿದ. ಇವನಿಗೆ ಬುದ್ಧಿ ಕಲಿಸಬೇಕೆಂದು ಭೂಮಿಗೆ ಬಂದ. ಒಬ್ಬ ಬ್ರಹ್ಮಚಾರಿಯ ವೇಷದಲ್ಲಿ ರಾಜನ ಕಡೆಗೆ ಬಂದು ಹೇಳಿದ, ‘ರಾಜ, ನಿನಗೆ ರಾಜ್ಯ ವಿಸ್ತಾರವಾಗಬೇಕು, ಅಧಿಕ ಹಣ ಬೇಕು ತಾನೇ? ನನಗೆ ಮೂರು ರಾಜ್ಯಗಳು ಗೊತ್ತು. ಅವುಗಳಷ್ಟು ಶ್ರೀಮಂತವಾದ ರಾಜ್ಯಗಳಿಲ್ಲ. ನಿನಗೆ ಮನಸ್ಸಿದ್ದರೆ ನಾನು ಅವುಗಳನ್ನು ನಿನಗೆ ಕೊಡಿಸಿಬಿಡುತ್ತೇನೆ’ ರಾಜನ ಬಾಯಿಯಲ್ಲಿ ನೀರೂರಿತು. ತಕ್ಷಣವೇ ಆತ ಸಿದ್ಧನಾದ. ನಾಳೆ ಬರುತ್ತೇನೆಂದು ಹೋದ ಬ್ರಹ್ಮಚಾರಿ ಬರಲೇ ಇಲ್ಲ.

ರಾಜನಿಗೆ ಸಂಕಟ ಶುರುವಾಯಿತು. ಅತಿಯಾದ ಆಸೆ ಅವನ ಆರೋಗ್ಯವನ್ನು ಹದಗೆಡಿಸಿತು. ವೈದ್ಯರು ಹತಾಶರಾದರು. ಇನ್ನು ಆತ ಬದುಕಲಾರ ಎಂಬ ತೀರ್ಮಾನಕ್ಕೆ ಬಂದರು. ಆಗ ಬೋಧಿಸತ್ವ ಅಲ್ಲಿಗೆ ಬಂದು ರಾಜನನ್ನು ಕಂಡು ಮಾತನಾಡಿಸಿದ, ‘ರಾಜ, ನೀನು ಚಿಂತಿಸಿದರೆ ಆ ರಾಜ್ಯಗಳು ದೊರೆಯಲು ಸಾಧ್ಯವೇ? ಇಲ್ಲ. ನೀನು ಒಂದರ ಮೇಲೊಂದರಂತೆ ಮೂರು ಬಟ್ಟೆಗಳನ್ನು ಹಾಕಿಕೊಳ್ಳುತ್ತೀಯಾ? ಇಲ್ಲ. ನೀನು ಎಷ್ಟು ಗಳಿಸಿದರೂ ನಿನ್ನ ಅವಶ್ಯಕತೆಗಳಿಗಿಂತ ಹೆಚ್ಚಾಗಿ ಬಳಸಲಾರೆ. ತೃಷ್ಣೆ ಬಲಿತಾಗ ಬದುಕೇ ನರಕವಾಗುತ್ತದೆ. ಸಮಸ್ತ ಸುಖ ಬೇಕಾದರೆ ಸಮಸ್ತ ಕಾಮನೆಗಳನ್ನು ತ್ಯಜಿಸಬೇಕು. ಕಾಮಾಪೇಕ್ಷೆಯಿಂದ ಕಾಮ ಹೆಚ್ಚುತ್ತದೆ’. ಹೀಗೆ ನಿಧಾನವಾಗಿ ಬೋಧಿಸುತ್ತ ಅವನನ್ನು ಧರ್ಮಮಾರ್ಗಿಯನ್ನಾಗಿಸಿದ.

ಕಾಮದಿಂದ ಕಾಮಾಪೇಕ್ಷೆಯನ್ನು ಗೆಲ್ಲುವುದು ಬೆಂಕಿಗೆ ತುಪ್ಪ ಸುರಿದು ನಂದಿಸಲು ಪ್ರಯತ್ನಿಸಿದಂತೆ.