ದುಷ್ಟರ ಸಹವಾಸ

7

ದುಷ್ಟರ ಸಹವಾಸ

ಗುರುರಾಜ ಕರಜಗಿ
Published:
Updated:

ಹಿಂದೆ ವಾರಣಾಸಿಯನ್ನು ಬ್ರಹ್ಮದತ್ತ ಆಳುತ್ತಿದ್ದಾಗ ಬೋಧಿಸತ್ವ ಒಬ್ಬ ಮಹಾ ಶ್ರೀಮಂತನ ಮನೆಯಲ್ಲಿ ಹುಟ್ಟಿದ್ದ. ಬಾಲ್ಯದಿಂದಲೂ ಶುದ್ಧ ಮನಸ್ಸಿನಿಂದ ಬೆಳೆದವನು ದೊಡ್ಡವನಾದಂತೆ ಕಾಮ-ಭೋಗಗಳಿಂದಾಗುವ ಅನಾಹುತಗಳನ್ನು ತಿಳಿದು ಎಲ್ಲವನ್ನೂ ತ್ಯಜಿಸಿ ಹಿಮಾಲಯಕ್ಕೆ ಹೋದ. ಅಲ್ಲಿ ಪಬ್ಬಜಿತನಾಗಿ ಎಲ್ಲ ಧರ್ಮ ಕಾರ್ಯಗಳನ್ನು ಮಾಡಿ ಧ್ಯಾನದಲ್ಲಿ ಕಾಲಕಳೆಯುತ್ತಿದ್ದ. ಮುಂದೆ ಆತ ಐದುನೂರು ಮಂದಿ ತಪಸ್ವಿಗಳಿಗೆ ಮುಖಂಡನಾಗಿ, ಮಾರ್ಗದರ್ಶಕನಾಗಿ ಇರುತ್ತಿದ್ದ.

ಇವನ ಆಶ್ರಮದಲ್ಲಿ ಸನ್ಯಾಸಿಯೊಬ್ಬನಿದ್ದ. ಆತ ಮಹಾ ದಯಾಳು. ಒಂದು ದಿನ ಒಂದು ಪುಟ್ಟ ಹಾವಿನ ಮರಿ ಹರಿದಾಡುತ್ತ ಅವನಿರುವ ಸ್ಥಳಕ್ಕೆ ಬಂದಿತು. ನೋಡಲು ತುಂಬ ಸುಂದರವಾಗಿದ್ದ ಆ ಮರಿಯನ್ನು ನೋಡಿ ಆಕರ್ಷಿತನಾಗಿ ಅದನ್ನು ಒಂದು ಬಿದಿರಿನ ಕೊಳವೆಯಲ್ಲಿ ಹೋಗುವಂತೆ ಮಾಡಿದ. ನಂತರ ಅದರ ಬಗ್ಗೆ ಪುತ್ರಪ್ರೇಮ ಉಂಟಾಗಿ ಅದನ್ನು ಅತ್ಯಂತ ಪ್ರೀತಿಯಿಂದ ಸಾಕತೊಡಗಿದ. ಬಿದಿರಿನ ಕೊಳವೆಯಲ್ಲಿದ್ದುದರಿಂದ ಆ ಹಾವಿಗೆ ವೇಳುಕ ಎಂದು ಹೆಸರಿಟ್ಟ. ಅವನು ಅದನ್ನು ಅಷ್ಟು ಪುತ್ರಪ್ರೇಮದಿಂದ ಸಾಕುತ್ತಿದ್ದುದರಿಂದ ಆಶ್ರಮವಾಸಿಗಳೆಲ್ಲ ಅವನನ್ನು ವೇಳುಕಪಿತ ಎಂದು ಗುರುತಿಸತೊಡಗಿದರು.

ಈ ಸನ್ಯಾಸಿ ವಿಷಸರ್ಪವೊಂದನ್ನು ಸಾಕುತ್ತಿದ್ದಾನೆಂಬ ವಿಷಯ ಬೋಧಿಸತ್ವನಿಗೆ ತಿಳಿಯಿತು. ಸನ್ಯಾಸಿಯನ್ನು ಕರೆದು ಕೇಳಿದ, ‘ನೀನು ಒಂದು ವಿಷಸರ್ಪವೊಂದನ್ನು ಪೋಷಿಸುತ್ತಿದ್ದೀಯಂತೆ, ಹೌದೇ?’. ’ಹೌದು, ಅದು ಸುಂದರವಾದ ಪ್ರಾಣಿಯಾದ್ದರಿಂದ ಸಾಕುತ್ತಿದ್ದೇನೆ’ ಎಂದ ಸನ್ಯಾಸಿ. ‘ಹೌದಯ್ಯ, ಅದು ನೋಡಲು ಸುಂದರವಾಗಿರಬಹುದು ಆದರೆ ಆ ವಿಷಪೂರಿತವಾದ ಸರ್ಪ ಎಂದಿದ್ದರೂ ಅಪಾಯಕಾರಿಯೇ. ಅದನ್ನು ಬಿಟ್ಟುಬಿಡು’ ಎಂದ ಬೋಧಿಸತ್ವ. ಆಗಲಿ ಎಂಬಂತೆ ತಲೆ ಅಲ್ಲಾಡಿಸಿದ ಸನ್ಯಾಸಿ. ಬೋಧಿಸತ್ವ ಮತ್ತೆ ಹೇಳಿದ, ‘ನೋಡು, ಅದು ತಿಳುವಳಿಕೆ ಇಲ್ಲದ ಪ್ರಾಣಿ, ನಿನ್ನ ಪ್ರಾಣಕ್ಕೇ ಸಂಚಕಾರ ತಂದೀತು’. ಸನ್ಯಾಸಿ ಹೂಂಗುಟ್ಟಿ ಹೊರಟ.

ಆದರೆ ಸನ್ಯಾಸಿ ಬೋಧಿಸತ್ವನ ಮಾತು ಕೇಳಲಿಲ್ಲ, ಸರ್ಪವನ್ನೂ ಬಿಡಲಿಲ್ಲ. ಕೆಲದಿನಗಳ ನಂತರ ಆಶ್ರಮದ ಅಗತ್ಯತೆಗಳಿಗಾಗಿ ಹಣ್ಣು ಹಂಪಲುಗಳ ಸಂಗ್ರಹ ಮಾಡಬೇಕಿತ್ತು. ಅದಕ್ಕಾಗಿ ಎಲ್ಲ ಸನ್ಯಾಸಿಗಳು ಕಾಡಿನ ಬೇರೆ ಬೇರೆ ಸ್ಥಾನಗಳಿಗೆ ನಡೆದರು. ಮೂರು-ನಾಲ್ಕು ದಿನಗಳವರೆಗೆ ಹೀಗೆಯೇ ಸುತ್ತಾಡಿ ಸಾಕಷ್ಟು ಸಾಮಗ್ರಿಗಳನ್ನು ತಂದರು. ವೇಳುಕಪಿತ ಸನ್ಯಾಸಿಯೂ ಆಶ್ರಮದಿಂದ ಹೊರಗೇ ಇದ್ದುದರಿಂದ ವಿಷಸರ್ಪ ಬಿದಿರಿನ ಕೊಳವೆಯ ಒಳಗೆಯೇ ಕುಳಿತಿತ್ತು. ಆಹಾರವಿಲ್ಲದ್ದರಿಂದ ಕಂಗಾಲಾಗಿತ್ತು. ಸನ್ಯಾಸಿ ಆಹಾರವನ್ನು ತಂದು ತನ್ನ ಪ್ರೀತಿಯ ವೇಳುಕನನ್ನು ಕರೆದು, ‘ಬಾ ಮಗೂ, ನಿನಗೆ ಹಸಿವೆಯಾಗಿರಬೇಕು’ ಎನ್ನುತ್ತ ಕೊಳವೆಯ ಬಾಯಿಯನ್ನು ತೆರೆದ. ಮೊದಲೇ ಕೋಪಗೊಂಡಿದ್ದ ಸರ್ಪ ಹೆಡೆಯೆತ್ತಿ ಅವನ ಕೈಯನ್ನು ಬಲವಾಗಿ ಕಚ್ಚಿತು. ಕ್ಷಣಮಾತ್ರದಲ್ಲಿ ವಿಷವೇರಿ ಸನ್ಯಾಸಿ ಸತ್ತು ಬಿದ್ದ. ಹಾವು ಸರಸರನೇ ಹರಿದು ಕಾಡಿನಲ್ಲಿ ಹೋಗಿಬಿಟ್ಟಿತು.

ವಿಷಯ ತಿಳಿದು ಬೋಧಿಸತ್ವ ಬಂದು ಸನ್ಯಾಸಿಯ ಅಂತ್ಯಕ್ರಿಯೆಗಳನ್ನು ಮುಗಿಸಿ ಉಳಿದ ಸನ್ಯಾಸಿಗಳಿಗೆ ಹೇಳಿದ, ‘ಸ್ನೇಹಿತರೇ ವಿಷಸರ್ಪದೊಡನೆ ಸರಸವಾಡಿದ ಸನ್ಯಾಸಿಯ ಪರಿಸ್ಥಿತಿ ಏನಾಯ್ತು ಎಂಬುದು ನಿಮ್ಮ ಕಣ್ಣ ಮುಂದಿದೆ. ಈ ವಿಷಯ ಕೇವಲ ಸರ್ಪಗಳಿಗೆ ಸಂಬಂಧಿಸಿದ್ದಲ್ಲ. ಕೆಟ್ಟ ಜನರೂ, ಸ್ವಾರ್ಥಿಗಳೂ ಇದೇ ವರ್ಗಕ್ಕೆ ಸೇರಿದವರು. ಅವರು ಎಷ್ಟೇ ಆಕರ್ಷಕವಾಗಿದ್ದರೂ, ಅವರ ಮಾತುಗಳು ಮಧುರವಾಗಿದ್ದರೂ ಅವರಿಂದ ನಿಮಗೆ ಎಂದಿದ್ದರೂ ಅಪಾಯ ಕಟ್ಟಿಟ್ಟದ್ದು. ಅಂತಹವರ ಸಹವಾಸ ಎಂದಿಗೂ ಬೇಡ’. ಬೋಧಿಸತ್ವನ ಅಂದಿನ ಮಾತು ಇಂದಿಗೂ ಪ್ರಸ್ತುತ, ಅಲ್ಲವೇ?

ಬರಹ ಇಷ್ಟವಾಯಿತೆ?

  • 20

    Happy
  • 1

    Amused
  • 0

    Sad
  • 1

    Frustrated
  • 0

    Angry

Comments:

0 comments

Write the first review for this !