7

ಇದು ‘ಎಸ್‌8’ನ ಉತ್ತರಾಧಿಕಾರಿ

ಯು.ಬಿ. ಪವನಜ
Published:
Updated:
ಸ್ಯಾಮ್‌ಸಂಗ್ ಗ್ಯಾಲಕ್ಸಿ ಎಸ್ 9+

ಸ್ಯಾಮ್‌ಸಂಗ್ ಕಂಪನಿ ಕಡಿಮೆ ಬೆಲೆಯಿಂದ ಹಿಡಿದು ದುಬಾರಿ ದರದವರೆಗೆ ಎಲ್ಲ ವಿಧದ ಫೋನ್‌ಗಳನ್ನು ತಯಾರಿಸುತ್ತಿದೆ. ಸ್ಯಾಮ್‌ಸಂಗ್ ತಯಾರಿಸಿದ ಕೆಲವು ಫೋನ್‌ಗಳನ್ನು ಉತ್ತಮ ಹಾಗೂ ಅತ್ಯುತ್ತಮ ಎನ್ನಬಹುದು.

ಆದರೆ ಈ ಉತ್ಪನ್ನಗಳು ಭಾರತೀಯ ಸಂದರ್ಭದಲ್ಲಿ ದುಬಾರಿ ಎಂದೂ ಹೇಳಬಹುದು. ಸ್ಯಾಮ್‌ಸಂಗ್‌ನವರ ಹಲವು ಉತ್ಪನ್ನಗಳನ್ನು ಈ ಅಂಕಣದಲ್ಲಿ ವಿಮರ್ಶೆ ಮಾಡಲಾಗಿತ್ತು. ಈ ಸಲ ನಾವು ವಿಮರ್ಶೆ ಮಾಡುತ್ತಿರುವುದು ಸ್ಯಾಮ್‌ಸಂಗ್ ಗ್ಯಾಲಕ್ಸಿ ಎಸ್ 9+ (Samsung Galaxy S9+) ಎಂಬ ದುಬಾರಿ ಫೋನನ್ನು.

ಇದನ್ನು ಬಹುತೇಕ ಸ್ಯಾಮ್‌ಸಂಗ್ ಗ್ಯಾಲಕ್ಸಿ ಎಸ್8 ಗೆ ಉತ್ತರಾಧಿಕಾರಿ ಎನ್ನಬಹುದು. ಸ್ಯಾಮ್‌ಸಂಗ್‌ನವರ ಎಸ್ ಶ್ರೇಣಿಯ ಫೋನ್‌ಗಳು ದುಬಾರಿಯಾಗಿದ್ದು ಅತ್ಯುತ್ತಮವಾಗಿವೆ. ಇದೂ ಅದೇ ಮಾದರಿಯದು. ಇದರ ರಚನೆ ಮತ್ತು ವಿನ್ಯಾಸ ತುಂಬ ಚೆನ್ನಾಗಿದೆ. ಲೋಹದ ಫ್ರೇಂ ಇದೆ. ಮೂಲೆಗಳು ಸ್ವಲ್ಪ ಜಾಸ್ತಿಯೇ ವೃತ್ತಾಕಾರದಲ್ಲಿವೆ. ಹಿಂಭಾಗದ ಕವಚ ತೆಗೆಯಲು ಬರುವುದಿಲ್ಲ. ಈ ಕವಚ ತುಂಬ ನಯವಾಗಿದೆ.

ಆದುದರಿಂದಾಗಿ ಅದು ಕೈಯಿಂದ ಜಾರಿ ಬೀಳುವ ಸಂಭವ ಹೆಚ್ಚು. ಬಲಭಾಗದಲ್ಲಿ ಆನ್/ಆಫ್ ಸ್ವಿಚ್, ಎಡಭಾಗದಲ್ಲಿ ವಾಲ್ಯೂಮ್ ಬಟನ್‌ಗಳಿವೆ. ಎಡಭಾಗದಲ್ಲಿ ವಾಲ್ಯೂಮ್ ಬಟನ್‌ನ ಕೆಳಗೆ ಇನ್ನೊಂದು ವಿಶೇಷ ಬಟನ್ ಇದೆ. ಇದನ್ನು ಬಿಕ್ಸ್‌ಬೈಗೆ ಬಳಸಲಾಗುತ್ತದೆ ಮತ್ತು ಅದನ್ನು ಒತ್ತಿದಾಗ ಏನೇನು ಕೆಲಸ ಮಾಡಬೇಕು ಎಂದು ನಾವೇ ಆಯ್ಕೆ ಮಾಡಿಕೊಳ್ಳಬಹುದು.

ಮೇಲ್ಭಾಗದಲ್ಲಿ ಸಿಮ್ ಕಾರ್ಡ್ ಹಾಕಲು ಹೊರಬರುವ ಟ್ರೇ ಇದೆ. ಇದರಲ್ಲಿ ಎರಡು ಸಿಮ್ ಅಥವಾ ಒಂದು ಸಿಮ್ ಮತ್ತು ಮೆಮೊರಿ ಕಾರ್ಡ್ ಹಾಕಬಹುದು. ಕೆಳಭಾಗದಲ್ಲಿ ಯುಎಸ್‌ಬಿ-ಸಿ ಕಿಂಡಿ ಮತ್ತು 3.5 ಮಿ.ಮೀ. ಇಯರ್‌ಫೋನ್ ಕಿಂಡಿ ನೀಡಿದ್ದಾರೆ. ಈ ಎಲ್ಲ ವಿನ್ಯಾಸಗಳು ಎಸ್8ರಲ್ಲೂ ಹೀಗೆಯೇ ಇದ್ದವು. ಹಿಂಭಾಗದಲ್ಲಿ ಮಧ್ಯಭಾಗದಿಂದ ಸ್ವಲ್ಪ ಮೇಲೆ ಕ್ಯಾಮೆರಾ ಇದೆ. ಅದರ ಕೆಳಗೆ ಬೆರಳಚ್ಚು ಸ್ಕ್ಯಾನರ್ ಇದೆ.

ಸ್ಯಾಮ್‌ಸಂಗ್‌ನವರು ಎಡ್ಜ್ ಎಂಬ ವಿಶೇಷ ಸೌಲಭ್ಯವನ್ನು ಎಸ್ ಶ್ರೇಣಿಯ ಫೋನ್‌ಗಳಲ್ಲಿ ನೀಡಿದ್ದಾರೆ. ಫೋನಿನ ಬಲ ಭಾಗವನ್ನು ಒತ್ತಿ ಎಡಕ್ಕೆ ಸವರಿದರೆ ಒಂದು ಚಿಕ್ಕ ಪ್ಯಾನೆಲ್ ಮೂಡಿಬರುತ್ತದೆ. ಈ ಪ್ಯಾನೆಲ್‌ನಲ್ಲಿ ಏನನ್ನು ತೋರಿಸಬೇಕು ಎಂಬುದನ್ನು ನಾವೇ ಆಯ್ಕೆ ಮಾಡಿಕೊಳ್ಳಬಹುದು. ಉದಾಹರಣೆಗೆ ನಮಗೆ ತುಂಬ ಅಗತ್ಯವಾದವರ ಫೋನ್ ಸಂಖ್ಯೆ, ಕ್ಯಾಲೆಂಡರ್, ಹವಾಮಾನ, ಕ್ಯಾಮೆರಾದಂತಹ ಅತಿ ಅಗತ್ಯದ ಆ್ಯಪ್‌ಗಳು.

F/1.4, 12 ಮೆಗಾಪಿಕ್ಸೆಲ್‌ನ ಮತ್ತು F/2.4, 12 ಮೆಗಾಪಿಕ್ಸೆಲ್‌ನ ಎರಡು ಲೆನ್ಸ್‌ಗಳ ಪ್ರಾಥಮಿಕ ಕ್ಯಾಮೆರಾ ಇದೆ. ಜೊತೆಗೆ ಎಲ್‌ಇಡಿ ಫ್ಲಾಶ್ ಇದೆ. ಇದರ ಕ್ಯಾಮೆರಾದ ಗುಣಮಟ್ಟ ನಿಜಕ್ಕೂ ತುಂಬ ಚೆನ್ನಾಗಿದೆ. ಚೆನ್ನಾಗಿ ಬೆಳಕು ಇದ್ದಾಗ ಮಾತ್ರವಲ್ಲ ಕಡಿಮೆ ಬೆಳಕಿನಲ್ಲೂ ಉತ್ತಮ ಫೋಟೊ ಮೂಡಿಬರುತ್ತದೆ. ಚಿತ್ರದ ಗುಣಮಟ್ಟವನ್ನು ಕೇವಲ ಮೆಗಾಪಿಕ್ಸೆಲ್‌ ತೀರ್ಮಾನಿಸುವುದಿಲ್ಲ ಎಂದು ನಾನು ಹಲವು ಸಲ ಬರೆದಿದ್ದೇನೆ.

ಕಡಿಮೆ ಮೆಗಾಪಿಕ್ಸೆಲ್ ರೆಸ್ಯೂಲೂಷನ್‌ ಇದ್ದೂ ಉತ್ತಮ ಫೋಟೊ ತೆಗೆಯುವ ಕ್ಯಾಮೆರಾ ಈ ಫೋನ್‌ನಲ್ಲಿದೆ. ಇದು ಹೈಡೆಫಿನಿಶನ್ ಮಾತ್ರವಲ್ಲ 4k ವಿಡಿಯೊ ರೆಕಾರ್ಡಿಂಗ್ ಕೂಡ ಮಾಡಬಲ್ಲುದು. ಇದು ತಯಾರಿಸಿದ ವಿಡಿಯೊ ಗುಣಮಟ್ಟ ಚೆನ್ನಾಗಿದೆ. ವಿಡಿಯೊ ಚಿತ್ರೀಕರಣ ಮಾಡುವಾಗ ಧ್ವನಿಯನ್ನು ಸ್ಟೀರಿಯೊ ವಿಧಾನದಲ್ಲಿ ರೆಕಾರ್ಡಿಂಗ್ ಮಾಡುತ್ತದೆ.

ಇದರಲ್ಲಿ ಸೂಪರ್ ಸ್ಲೋ ಸ್ಪೀಡ್ ವಿಡಿಯೊ ಎಂಬ ವಿಶೇಷ ಸವಲತ್ತಿದೆ. ಇದು ಸೆಕೆಂಡಿಗೆ 960 ಫ್ರೇಂಗಳಲ್ಲಿ ವಿಡಿಯೊ ಚಿತ್ರೀಕರಣ ಮಾಡಬಲ್ಲದು. ಅಂದರೆ ನೀರಿಗೆ ಬಿಂದು ಬಿಂದಾಗಿ ಹನಿ ಬೀಳುವಾಗ ಅದು ಸಿಡಿಯುವ ಹಂತಗಳು, ಒಂದು ಬಲೂನ್‌ಗೆ ಪಿನ್ ಚುಚ್ಚಿ ಅದು ಸ್ಫೋಟವಾಗುವ ಹಂತಗಳು, ಇತ್ಯಾದಿ ಚಿತ್ರೀಕರಣ ಮಾಡಬಹುದು.

ಇದರ ಆಡಿಯೊ ಎಂಜಿನ್ ಚೆನ್ನಾಗಿದೆ. ಉತ್ತಮ ಹೆಡ್‌ಫೋನ್ ಅಥವಾ ಇಯರ್‌ಫೋನ್ ಬಳಸಿ ಅತ್ಯುತ್ತಮ ಸಂಗೀತ ಆಲಿಸುವ ಅನುಭವ ಪಡೆಯಬಹುದು. ಒಂದು ಮಟ್ಟಿಗೆ ಉತ್ತಮ ಎನ್ನಬಹುದಾದ ಇಯರ್‌ಬಡ್ ನೀಡಿದ್ದಾರೆ.

ಇದರ ಕೆಲಸದ ವೇಗ ಅತ್ಯುತ್ತಮವಾಗಿದೆ. ಇದರ ಅಂಟುಟು ಬೆಂಚ್‌ಮಾರ್ಕ್ 2,45,666 ಇದೆ. ಎಲ್ಲಾ ನಮೂನೆಯ ಆಟಗಳನ್ನು ಸಂಪೂರ್ಣ ತೃಪ್ತಿದಾಯಕವಾಗಿ ಆಡಬಹುದು. ಆಸ್ಫಾಲ್ಟ್ 8 ಆಟವನ್ನು ಈ ಫೋನಿನಲ್ಲಿ ಆಡಿದರೆ ದೊರೆಯುವ ತೃಪ್ತಿ ಇತರೆ ಕೆಲವೇ ಫೋನ್‌ಗಳಲ್ಲಿ ದೊರೆಯಬಹುದು. ಅತಿ ವೇಗದ ಫೋನ್ ಬೇಕಿದ್ದಲ್ಲಿ ನೀವು ಇದನ್ನು ಖಂಡಿತ ಕೊಳ್ಳಬಹುದು.

ಇದರ ಬೆರಳಚ್ಚು ಸ್ಕ್ಯಾನರ್ ತೃಪ್ತಿದಾಯಕವಾಗಿದೆ. ನಿಮ್ಮ ಬೆರಳಚ್ಚನ್ನೇ ನೀವು ಪಾಸ್‌ವರ್ಡ್ ಮಾಡಿಟ್ಟುಕೊಳ್ಳಬಹುದು. ಜೊತೆಗೆ ಮುಖವನ್ನೇ ಪತ್ತೆ ಹಚ್ಚಿ ಅದನ್ನೇ ಪಾಸ್‌ವರ್ಡ್ ಮಾಡಿಟ್ಟುಕೊಳ್ಳುವ ಸವಲತ್ತೂ ಇದೆ.

ಕನ್ನಡದ ತೋರುವಿಕೆ ಸರಿಯಾಗಿದೆ ಮಾತ್ರವಲ್ಲ ಸಂಪೂರ್ಣ ಕನ್ನಡ ಯೂಸರ್ ಇಂಟರ್‌ಫೇಸ್ ಕೂಡ ಇದೆ. ಸ್ಯಾಮ್‌ಸಂಗ್‌ನವರದೇ ಆದ ಕೀಲಿಮಣೆ ಇದೆ. ಆದರೆ ಅದರ ವಿನ್ಯಾಸ ಮಾತ್ರ ಸ್ವಲ್ಪ ವಿಚಿತ್ರವಾಗಿದೆ. ಒಟ್ಟಿನಲ್ಲಿ ಹೇಳುವುದಾದರೆ ದುಬಾರಿಯಾದ ಆದರೆ ಅತ್ಯುತ್ತಮವಾದ ಫೋನ್ ಎನ್ನಬಹುದು.

ವಾರದ ಆಪ್ (app): ಡಬ್‌ಸ್ಮಾಶ್ (Lip Sync by Dubsmash) 

ನಿಮ್ಮಲ್ಲಿ ಒಬ್ಬ ನಟ ಅಥವಾ ನಟಿ ಹುದುಗಿದ್ದಾನೆ/ಳೆಯೋ? ಜನಪ್ರಿಯ ಹಾಡುಗಳಿಗೆ ನೀವೇ ಅಭಿನಯಿಸುವ ಅಭ್ಯಾಸ ನಿಮಗಿದೆಯೇ? ಹಾಗಿದ್ದರೆ ಅದನ್ನು ವಿಡಿಯೊ ಮಾಡಬಹುದಲ್ಲವೇ? ಅಂತಹ ವಿಡಿಯೊ ತಯಾರಿಸುವ ಇಚ್ಛೆ ನಿಮಗಿದೆಯೇ? ಹಾಗಿದ್ದರೆ ನೀವು ಗೂಗಲ್‌ ಪ್ಲೇ ಸ್ಟೋರಿಗೆ ಭೇಟಿ ನೀಡಿ Lip Sync by Dubsmash ಎಂದು ಹುಡುಕಿ ಅಥವಾ http://bit.ly/gadgetloka335 ಜಾಲತಾಣಕ್ಕೆ ಭೇಟಿ ನೀಡಿ.

ಈ ಕಿರುತಂತ್ರಾಂಶದಲ್ಲಿ (ಆ್ಯಪ್‌) ಸಾವಿರಾರು ಸಂಗೀತದ ತುಣುಕುಗಳಿವೆ. ಅವುಗಳಿಗೆ ನೀವು ಅಭಿನಯಿಸಿ ಚಿಕ್ಕ ವಿಡಿಯೊ ತಯಾರಿಸಬಹುದು. ನಂತರ ಅದನ್ನು ನಿಮ್ಮ ಸ್ನೇಹಿತರುಗಳಿಗೆ ಇದೇ ಕಿರುತಂತ್ರಾಂಶದ ಮೂಲಕ ಅಥವಾ ಇತರೆ ಸಾಮಾಜಿಕ ಜಾಲತಾಣಗಳ ಮೂಲಕ ಹಂಚಬಹುದು. ಇನ್ನು ತಡವೇಕೆ? ನಿಮ್ಮಲ್ಲಿರುವ ನಟ ಯಾ ನಟಿ ಹೊರಬರಲಿ.

ಗ್ಯಾಜೆಟ್ ಪದ: Bokeh = ಮಸುಕು ಹಿನ್ನೆಲೆ

ಛಾಯಾಗ್ರಹಣ ಮಾಡುವಾಗ ವಸ್ತು ಅಥವಾ ವ್ಯಕ್ತಿಯನ್ನು ಫೋಕಸ್ ಮಾಡಿದಾಗ ಹಿನ್ನೆಲೆ ಮಸುಕಾಗಿ ಕಾಣುವುದು. ಮುನ್ನೆಲೆಯ ವ್ಯಕ್ತಿ ಅಥವಾ ವಸ್ತುವಿಗೆ ಛಾಯಾಚಿತ್ರದಲ್ಲಿ ಪ್ರಾಮುಖ್ಯ ಬರಲು ಈ ವಿಧಾನವನ್ನು ಬಳಸಲಾಗುತ್ತದೆ. ಸಾಮಾನ್ಯವಾಗಿ ದೊಡ್ಡ ಅಪಾರ್ಚರ್ ಅರ್ಥಾತ್ ಲೆನ್ಸ್ ಕವಾಟ ತೆರೆಯುವಿಕೆಯ ಮೂಲಕ ಇದನ್ನು ಸಾಧಿಸಲಾಗುತ್ತದೆ. ಸ್ಮಾರ್ಟ್‌ಫೋನ್‌ಗಳಲ್ಲಿ ಇದನ್ನು ತಂತ್ರಾಂಶದ ಮೂಲಕ ಮಾಡಲಾಗುತ್ತದೆ.

ಗ್ಯಾಜೆಟ್ ಸುದ್ದಿ: ಝೆಬ್ರೋನಿಕ್ಸ್ ಸ್ಮಾರ್ಟ್ ಟೈಂ 200 ಸ್ಮಾರ್ಟ್‌ವಾಚ್

ಕಡಿಮೆ ಬೆಲೆಗೆ ಉತ್ಪನ್ನಗಳನ್ನು ನೀಡುವ ಝೆಬ್ರೋನಿಕ್ಸ್ ಕಂಪನಿ ಈಗ ಕಡಿಮೆ ಬೆಲೆಗೆ ಸ್ಮಾರ್ಟ್‌ವಾಚ್ ತಯಾರಿಸಿದೆ. ಅವರು ಈಗ ಬಿಡುಗಡೆ ಮಾಡಿರುವ ಸ್ಮಾರ್ಟ್ ಟೈಂ 200 ಒಂದು ಫೋನ್ ಮತ್ತು ಆರೋಗ್ಯಪಟ್ಟಿಯ ವೈಶಿಷ್ಟ್ಯಗಳನ್ನು ಒಳಗೊಂಡ ಸ್ಮಾರ್ಟ್‌ವಾಚ್ ಆಗಿದೆ.

ಇದು ನ್ಯಾನೋ ಸಿಮ್, ಮೈಕ್ರೋಎಸ್‌ಡಿ ಮೆಮೊರಿ ಕಾರ್ಡ್, ಬ್ಲೂಟೂತ್, ಸ್ಪರ್ಶಪರದೆ, ಸ್ಪೀಕರ್, ಮೈಕ್ರೋಫೋನ್, ಪೆಡೋಮೀಟರ್ ಮತ್ತು ಕ್ಯಾಮೆರಾಗಳನ್ನು ಒಳಗೊಂಡಿದೆ. ಇದರ ಬ್ಯಾಟರಿ ಶಕ್ತಿ 380 mAh. ಆಯತಾಕಾರ ಮತ್ತು ವೃತ್ತಾಕಾರದ ಎರಡು ಆಕಾರಗಳಲ್ಲಿ ಈ ವಾಚ್ ಲಭ್ಯವಿದೆ. ಇದರ ಬೆಲೆ ₹2,999.

ಗ್ಯಾಜೆಟ್ ಸಲಹೆ

ಗಣೇಶಪ್ಪ ಅವರ ಪ್ರಶ್ನೆ: ನನ್ನ ಮಗಳಿಗೆ ಆಟವಾಡಲು ಒಂದು ಟ್ಯಾಬ್ಲೆಟ್ ಅಥವಾ ಸ್ಮಾರ್ಟ್‌ಫೋನ್ ಕೊಳ್ಳಬೇಕೆಂದುಕೊಂಡಿದ್ದೇನೆ. ಅದಕ್ಕೆ ಸಿಮ್ ಹಾಕುವ ಸೌಲಭ್ಯ ಬೇಕಾಗಿಲ್ಲ. ಯಾವುದನ್ನು ಕೊಳ್ಳಬಹುದು?

ಉ: ನೀವು ಏಸುಸ್, ಲೆನೊವೊ ಅಥವಾ ಐಬಾಲ್ ಅವರ ಕಡಿಮೆ ಬೆಲೆಯ ಟ್ಯಾಬ್ಲೆಟ್ ಕೊಳ್ಳಬಹುದು.

ಬರಹ ಇಷ್ಟವಾಯಿತೆ?

  • 9

    Happy
  • 0

    Amused
  • 0

    Sad
  • 0

    Frustrated
  • 2

    Angry

Comments:

0 comments

Write the first review for this !