ಸರ್ಕಾರ, ಹೀರೋಗಳ ಜನಪ್ರಿಯತೆ ಆಯಸ್ಸು ಕಡಿಮೆ!

‘ಮುಂದೆ ಏನಾಗುತ್ತದೆ ಎಂಬುದನ್ನು ಹೇಳುವುದು ಕಷ್ಟ.’ ಅಮೆರಿಕದ ಬೇಸ್‌ಬಾಲ್‌ ಆಟಗಾರ ಯೋಗಿ ಬೆರ್ರಾ ಹೇಳಿದ ಮಾತು ಇದು ಎನ್ನುತ್ತಾರೆ. ಅವರ ನಿಜ ಹೆಸರು ಲಾರೆಂಜೊ ಎಂದು. ಆದರೆ ಅವರು ಭಾರತೀಯರಂತೆ ಚಕ್ಕಳಮಕ್ಕಳ ಹಾಕಿ ಆರಾಮವಾಗಿ ಕುಳಿತುಕೊಳ್ಳುತ್ತಿದ್ದ ಕಾರಣ ಅವರಿಗೆ ‘ಯೋಗಿ’ ಎಂಬ ಅಡ್ಡಹೆಸರು ಬಂತು.

ನಾವು ಯೋಗಿ ಅಥವಾ ಅನುಭಾವಿಗಳಾಗಿ, 2019ರ ಲೋಕಸಭಾ ಚುನಾವಣೆಯಲ್ಲಿ ಏನಾಗಲಿದೆ ಎಂಬುದನ್ನು ಹೇಳುವುದರಿಂದ ದೂರವಿರೋಣ. ಆದರೆ, 2014ರ ಚುನಾವಣಾ ಫಲಿತಾಂಶದ ಅಂಕಿ–ಅಂಶಗಳನ್ನು ಸೂಕ್ಷ್ಮವಾಗಿ ಅವಲೋಕಿಸಿ ಅವುಗಳ ಆಧಾರದಲ್ಲಿ 2019ರಲ್ಲಿ ಏನಾಗಬಹುದು ಎಂಬ ವಿಶ್ಲೇಷಣೆ ನಡೆಸಬಹುದು.